މާލެ ސިޓީގެ ފުރަތަމަ މޭޔަރު، ސަރަނގު އާދަމް މަނިކުވެސް މޭޔަރު ކަމަށް!
6 ޖެނުއަރީ 2020 | ހޯމަ 09:53އެންމެ ފުރަތަމަ ލޯކަލް ކައުންސިލްތަކުގެ އިންތިހާބު ބާއްވާފައިވަނީ 2011 ވަނަ އަހަރުގެ ފެބްރުއަރީގައި
މާލެ ސިޓީގެ ކުރީގެ މޭޔަރު ސަރަނގު އާދަމް މަނިކު (ކަނާތްފަރާތުން ދެ ވަނައަށް) އަދި މާލެ ސިޓީގެ ކުރީގެ ކައުންސިލަތުން
މާލޭގެ ފުރަތަމަ މޭޔަރު ސަރަނގު އާދަމް މަނިކު، އަނެއްކާވެސް މާލޭގެ މޭޔަރުކަމަށް ވާދަކުރައްވަން ނިންމަވައިފި އެވެ.
އަންނަ އޭޕްރީލް މަހު ބާއްވާ ލޯކަލް ކައުންސިލްތަކުގެ އިންތިޚާބުގައި މާލެ ސިޓީ މޭޔަރުކަމަށް އާދަމް މަނިކު ވާދަ ކުރައްވާނެ ކަމަށް އޭނާއާ ޙަވާލާދީ ބައެއް މީޑިއާތަކުގައި ވަނީ ރިޕޯޓު ކޮށްފަ އެވެ.
އާދަމް މަނިކަކީ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ ދަށުން ފުރަތަމަ ބޭއްވި ލޯކަލް ކައުންސިލްތަކުގެ އިންތިޚާބުގައި މާލެ ސިޓީ ކައުންސިލަށް ވާދަކުރައްވައި ގޮނޑި ކާމިޔާބު ކުރައްވާ، އަދި އެކައުންސިލުން މާލޭ ސިޓީގެ މޭޔަރު ކަމަށް ކަނޑައެޅި ފަރާތެވެ. އެންމެ ފުރަތަމަ ލޯކަލް ކައުންސިލް އިންތިޚާބު ބާއްވާފައިވަނީ 2011 ވަނަ އަހަރުގެ ފެބްރުއަރީ މަހުގެ 5 ވަނަ ދުވަހު އެވެ.
ލާމަރުކަޒީ ޤާނޫނަށް ބޮޑެތި އިޞްލާޙުތަކެއް ގެނެސްފައިވާއިރު، އަންނަ އޭޕްރީލް މަހު ބާއްވާ ކައުންސިލްތަކުގެ އިންތިޚާބުގައި، ކޮންމެ ސިޓީއެއްގެ މޭޔަރުކަމާއި، އަތޮޅު ކައުންސިލްގެ ރައީސް ކަމާއި، ރަށު ކައުންސިލްގެ ރައީސްކަން ކަނޑައަޅާނީ، ސީދާ ރައްޔިތުންގެ ވޯޓުން ނެވެ.
މިއީ ލާމަރުކަޒީ ޤާނޫނުގެ ދަށުން ބޭއްވޭ ހަތަރު ވަނަ ލޯކަލް ކައުންސިލްތަކުގެ އިންތިޚާބެވެ.
މާލެ ސިޓީގެ މޭޔަރުކަމަށް އާދަމް މަނިކު ވާދަކުރައްވާއިރު، މިހާތަނަށް މާލޭ ސިޓީ ކައުންސިލަށް ވާދަކުރައްވާނެކަން ހާމަކުރައްވާފައި ވަނީ، މިހާރުވެސް މާލެ ސިޓީ ކައުންސިލްގެ މޭޔަރު ޝިފާ މުޙައްމަދާއި، މާލެ ސިޓީ ކައުންސިލްގެ ޑެޕިއުޓީ މޭޔަރު ޝަމާއު ޝަރީފާއި، މާލެ ސިޓީ ކައުންސިލްގައި މެދު ހެންވޭރު ދާއިރާ ތަމްސީލް ކުރައްވާ އަޙްމަދު ނިޔާޒާއި، އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު އަދި އިބްރާހިމް ރަޝީދު (ބްރޯ) އެވެ.
