ބާސެލޯނާގެ ކީޕަރު ޓާ ސްޓޭގެންއަށް އަނިޔާވެ މި ހަފްތާގައި ފަށާ ސުޕަ ކަޕް ނުކުޅެވޭނެ ކަމަށް އެ ކްލަބުން ބުނެފިއެވެ.
މީޑިއާ ރިޕޯޓްތައް ބުނާ ގޮތުން ސްޓޭގެން އަށް އަނިޔާވީ ސްޕެނިޝް ލީގުގައި އަލްވޭސް އާއި ދެކޮޅަށް ކުޅުނު މެޗުގައެވެ. ބާސެލޯނާއިން ބުނީ ސްޓޭގެންގެ ކަނާތު ކަކުލަށް ލިބިފައިވާ އަނިޔާ ސީރިއަސް ކަމަށާއި މިހާތަނަށް ހެދި ޓެސްޓު ތަކުގެ ނަތީޖާތައް ދައްކާ ގޮތުން އަންނަ ހަފްތާގައި ކުޅުމަށް ހަމަޖެހިފައިވާ ސްޕެނިޝް ސުޕަ ކަޕްގެ މެޗުތަކުން ސްޓެގެން ނުފެންނާނެ ކަމަށެވެ.
ބާސެލޯނާގެ ކޯޗު އާނެސްޓޯ ވަލްވޭޑޭ ބުނީ ސްޓޭގެންގެ ކަކުލުގެ އަނިޔާ ސީރިއަސް ކަމަށާއި އޭނާއަށް ފަރުވާދޭން ފެށިއިރުވެސް ސުޕަ ކަޕްގެ މެޗުތަކުގައި އޭނާ ނުފެންނާނެ ކަމަށް ބެލެވުނު ކަމަށާއި އޭނާ އަނިޔާގައި ހުއްޓައި ކުޅުވަން ބޭނުން ނުވާ ކަމަށެވެ. އަދި މީގެއިތުރުން ވެލްވާޑޭ ބުނީ އޭނާ ކަކުލުގެ އޮޕަރޭޝަނެއް ކުރަން ޖެހުމުގެ ބިރު އެބައޮތް ކަމަށާއި އޭނާ ބޭނުންވަނީ ސްޓެގެން އެންމެ ފިޓްކޮށް ދަނޑަށް އެނބުރި އައުން ކަމަށެވެ.
ސްޓޭގެންގެ ބަދަލުގައި ކުރިޔަށް ބާސެލޯނާ ކުޅޭ މެޗުތަކުގައި އެޓީމުގެ ގޯލު ބަލަހައްޓާނީ މި ސީޒަނުގައި އެޓީމާއި ގުޅުނު ކީޕަރު ނެޓޯއެވެ.
ސައުދި އަރަބިއްޔާގައި މިމަހު 8 ކުން 12 އަށް ކުރިޔަށްދާ ސްޕެނިޝް ސުޕަ ކަޕްގައި ކުޅޭނީ ހަތަރު ޓީމެވެ. އެއީ ބާސެލޯނާގެ އިތުރުން ވާދަވެރި ރެއާލް މެޑްރިޑާއި އެތްލެޓިކޯ މެޑްރިޑް އަދި ވެލެންސިއާއެވެ. ފުރަތަމަ ސެމީގައި ވެލެންސިއާއާއި ރެއާލް
މެޑްރިޑް ބައްދަލުކުރާއިރު ދެވަނަ ސެމީގައި ބައްދަލުކުރާނީ އެތްލެޓިކޯ މެޑްރިޑާއި ބާސެލޯނާއިންނެވެ.
