އެސްޕަންޔޯލްއިން ވަރުގަދަ ބާސާ މޮޅުވިޔަނުދީ ހިފަހައްޓައިފި

ސްޕެނިޝް ލަލީގާގައި އެންމެ ފަހުގެ ޗެމްޕިއަން ބާސެލޯނާއާއި ލީގު ތާވަލުގެ ފުލުގައި އޮތް އެސްޕަންޔޯލް ބައްދަލުކުރި މެޗު އެއްވަރުވެގެން ނިމިއްޖެއެވެ.

އެސްޕަންޔޯލް ދަނޑުގައި ކުޅުނު މި މެޗު ނިމިގެންދިޔައީ 1-1 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ ވަރަށް ކުރީ ކޮޅު އެސްޕަންޔޯލްއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު މެޗުގެ 23 ވަނަ މިނެޓުގައި އެޓީމަށް ކާމިޔާބު ކޮށްދިނީ ޑޭވިޑް ލޮޕޭޒްއެވެ. މިއީ ލިބުނު ހިލޭ ޖެހުމެއްގެ ބޭނުން ހިފައި އޭނާ ބޮލުން ކާމިޔާބުކުރި ލަނޑެކެވެ. މި ލަނޑާއެކު ބާސެލޯނާއިން އެޓީމުގެ ކުޅުން ރަނގަޅުކޮށް އެސްޕަންޔޯލްގެ ގޯލަށް ނުރައްކާކުރިއެވެ. އެގޮތުން މެޗުގެ 26 ވަނަ މިނެޓުގައި ބާސެލޯނާގެ ކެޕްޓަން ލިއޮނެލް މެސީއަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. އެގޮތުން އޭނާ ފޮނުވައިލި ބޯޅަ އެސްޕަންޔޯލްގެ ކީޕަރުވަނީ ހުށިޔާރު ކަމާއިއެކު ދިފާއުކޮށްފައެވެ. ފުރަތަމަ ހާފުގައި ބާސެލޯނާއިން ކުރި އެޓޭކްތައް އެސްޕަންޔޯލްގެ ޑިފެންޑަރުން ވަނީ ހުށިޔާރުކަމާއިއެކު ދިފާއު ކޮށްފައެވެ.

މެޗުގެ ދެވަނަ ހާފު ފަށައިގެން ބާސެލޯނާއިން ވަނީ އެޓީމުގެ ކުޅުން އިތުރަށް ރަނގަޅުކޮށް އެސްޕަންޔޯލްގެ ގޯލަށް ނުރައްކާކޮށްފައެވެ. އެގޮތުން މެޗުގެ 50 ވަނަ މިނެޓުގައި ޖޯޑީ އަލްބާ ތަނަވަސްކޮށްދިން ފުރުސަތެއްގެ ބޭނުން ހިފައި ބާސެލޯނާގެ އިތުބާރު ފޯވާޑް ލުއިސް ސުއަރޭޒްވަނީ އެޓީމަށް ލަނޑެއް ކާމިޔާބުކޮށްދީ މެޗުގެ ނަތީޖާ ހަމަހަމަ ކޮށްދީފައެވެ. އަދި އޭގެ ނުވަ މިނެޓު ފަހުން ލުއިސް ސުއަރޭޒް ތަނަވަސްކޮށްދިން ފުރުސަތެއްގެ ބޭނުން ހިފައި ވިޑާލް ވަނީ ބާސާއަށް އިތުރު ލަނޑެއް

ކާމިޔާބުކޮށްދީ މެޗުގެ ލީޑު ނަގައިފައެވެ. މި ލަނޑާއެކު އެސްޕަންޔޯލްއިން ވަނީ އެޓީމުގެ ކުޅުން ރަނގަޅުކޮށްފައެވެ. އެގޮތުން މެޗުގެ 88 ވަނަ މިނެޓުގައި އެސްޕަންޔޯލްގެ ވޫ ލީ ވަނީ އެޓީމަށް ލަނޑު ޖަހައިދީ މެޗުން ޕޮއިންޓެއް ހޯދައިދީފައެވެ.

މި ނަތީޖާއާއި އެކު ބާސާއިން ލީގު ތާވަލުގެ އެއްވަނައިގައި އޮތީ ލިބުނު 40 ޕޮއިންޓާއެކުގައެވެ. ލީގު ތާވަލުގެ ދެވަނައިގައި އޮތް ރެއާލް މެޑްރިޑްއަށް ވެސް 40 ޕޮއިންޓް ލިބިފައިވާއިރު ތިންވަނައިގައި އޮތް އެތްލެޓިކޯ މެޑްރިޑަށް ލިބިފައިވަނީ 35 ޕޮއިންޓެވެ.