ކްރިމިނަލް ކޯޓުން މެނުއަލްކޮށް ކުރަމުންދިޔަ ކޭސް މެނޭޖްކުރުމުގެ ކަންކަން ސިސްޓަމެއް މެދުވެރިކޮށް ކުރަން ފަށައިފި
5 ޖެނުއަރީ 2020 | އާދީއްތަ 08:16ކޯޓަށް ހާޒިރުވުމުގެ އަމުރުތަކާއި ޑޮކިއުމަންޓްތައް ތައްޔާރު ކުރުމަށް ކުރިން ބޭނުން ކުރަމުންދިޔައީ މައިކްރޯސޮފްޓް އެކްސެލް ޝީޓާއި ވޯޑް
ކްރިމިނަލް ކޯޓުގައި ޝަރީއަތް ކުރާ ރޫމެއް
ކްރިމިނަލް ކޯޓުގައި މިހާތަނަށް ކޭސްތައް މެނޭޖްކުރަމުން ދިޔައީ މެނުއަލްކޮށް ކަމަށާއި ނަމަވެސް އާދިއްތަ ދުވަހުން ފެށިގެން، ކޭސް މެނޭޖްމަންޓް ސިސްޓަމް ބޭނުން ކުރަން ފަށާފައިވާ ކަމަށް ކްރިމިނަލް ކޯޓުން ބުނެފި އެވެ.
ކްރިމިނަލް ކޯޓުން ބުނީ، އެކޯޓުގައި މިހާތަނަށް ކޭސްތައް މެނޭޖްކުރަމުން އައިސްފައިވަނީ މައިކްރޯސޮފްޓް އެކްސެލް ފައިލްތަކުގައި ލިޔެގެން ކަމަށެވެ. އަދި ކޯޓަށް ހާޒިރުވުމުގެ އަމުރުތަކާއި ޑޮކިއުމަންޓްތައް އެކުލަވާލަމުން އައިސްފައިވަނީ މެނުއަލްކޮށް، މައިކްރޯސޮފްޓް ވޯޑުގައި، ކޮންމެ އެއްޗެއް ވަކިވަކިން ލިޔެގެން ކަމަށެވެ.
ކްރިމިނަލް ކޯޓުން ބުނީ، 1 ޖެނުއަރީ 2020 ވަނަ ދުވަހުން ފެށިގެން އިލެކްޓްރޯނިކް ސިސްޓަމަކުން ކޭސް މެނޭޖްކުރަން ފެށި، އަދި ކުރިން ބޭނުންކުރަމުން ދިޔަ އެކްސެލް ޝީޓްތައް ދޫކޮށްލާފައިވާ ކަމަށެވެ.
މޯލްޑިވްސް އީކޯޓު މެނޭޖްމަންޓް ސިސްޓަމްގެ އެކިބައިތަކުގެ ތެރެއިން ކްރިމިނަލް ކޯޓުން މިހާތަނަށް ބޭނުން ކުރަމުން އައިސްފައިވަނީ ހާޟިރީއާއި، ޗުއްޓީއާއި، ސަލާމުގެ ކަންކަން މެނޭޖުކުރާ މޮޑިއުލް ކަމަށް ކްރިމިނަލް ކޯޓުން ބުނެއެވެ. އަދި ކޯޓަށް ހުށަހެޅޭ މައްސަލަތައް މެނޭޖް ކުރުމަށް ފަރުމާކުރި ކޭސް މެނޭޖްމަންޓް މޮޑިއުލްގެ ބައިތަކެއް ނިމިފައިވާތީ، އެބައިތައް ބޭނުންކުރަން މިހާރު ފަށާފައިވާ ކަމަށް ކްރިމިނަލް ކޯޓުން ބުނެއެވެ.
އެގޮތުން މިހާރު އެކޯޓުގަ ހިނގަމުންދާ 1661 މައްސަލައިގެ މަޢުލޫމާތު 31 ޑިސެމްބަރު 2019 ވަނަ ދުވަހުގެ ނިޔަލަށް ސިސްޓްމަށް އެންޓަރ ކުރެވިފައިވާ ކަމަށް ކްރިމިނަލް ކޯޓުން ބުނެއެވެ. އަދި 05 ޖެނުއަރީ 2020 ވަނަ ދުވަހުން ފެށިގެން މައްސަލަތައް ތާވަލުކޮށް، ކޯޓަށް ހާޒިރުވުމުގެ އަމުރުތަކާއި އެހެނިހެން އަމުރުތަކާއި ގިނަ ޑޮކިއުމަންޓްތަކެއް ސިސްޓަމްގެ ތެރެއިން އޮޓަމެޓިކުން ނަންބަރު ޖެހިގެން ޖެނެރޭޓްވެގެންދާނެ ކަމަށް ވެސް ކްރިމިނަލް ކޯޓުން ބުނެއެވެ.
ކްރިމިނަލް ކޯޓުން ބުނީ، މިހާރު ދެތިން ކްލިކަކުން، ކޯޓަށް ހާޒިރުވުމުގެ އަމުރެއް ތައްޔާރުކޮށް، ޕްރިންޓް ކޮށްލެވޭނެ ކަމަށެވެ. އަދި ކޭސް މެނޭޖްމަންޓް ސިސްޓަމް އެއްކޮށް ޑޮވެލޮޕްކޮށް ނިންމުމަށް އަދި ހައެއްކަ މަސް ދުވަސް ނަގާނެ ކަމަށް ލަފާކުރެވޭ ކަމަށެވެ. އަދި ސިސްޓަމް އެއްކޮށް ފުރިހަމަވުމުން ޕްރޮސެކިއުޓަރ ޖެނެރަލްގެ އޮފީހުން ކޯޓަށް މައްސަލަތައް ހުށަހެޅުމަށްޓަކައި، އިލެކްޓްރޯނިކް ޕޯޓަލްއެއް ޤާއިމުކޮށް، ކްރިމިނަލް ކޯޓުގެ ކޭސް މެނޭޖްމަންޓް ސިސްޓަމަށް އިލެކްޓްރޯނިކްކޮށް މައްސަލަތައް ފައިލް ކުރެވޭނެ ކަމަށެވެ. އެ ޕޯޓަލް ހެދުމުގެ މަސައްކަތް ވެސް މިހާރު ފެށިފައިވާ ކަމަށް ކްރިމިނަލް ކޯޓުން ބުނެއެވެ.
