ޕޮލިސް ބަލިކޮށް ގުޑީސްއިން ތާވަލުގެ ދެވަނައަށް ޖެހިލައިފި

ގައުމީ ވޮލީ ލީގުގައި ހުކުރު ދުވަހުގެ ރޭ ކުޅުނު މެޗުން ޕޮލިސް ކްލަބް ބަލިކޮށް ގުޑީސް ސްޕޯޓްސް ކްލަބުން ތާވަލުގެ ދެވަނައަށް ޖެހިލައިފިއެވެ.

މި މެޗު ގުޑީސްއިން ކާމިޔާބުކުރީ ފަހަތުންއަރައި ތިން ސެޓު ދެ ސެޓުންނެވެ.

މިއީ މިފަހަރުގެ މުބާރާތުގައި ގުޑީސްއިން ޕޮލިސް ބަލިކުރި ދެވަނަ ފަހަރެވެ. ލީގުގެ ފުރަތަމަ ބުރު މި ދެޓީމުން ކުޅުނު މެޗު ގުޑީސްއިން ކާމިޔާބުކުރީ ތިން ސެޓު އެއް ސެޓުންނެވެ.

ޒުވާނުންގެ މަރުކަޒު އެތެރޭ ކޯޓުގައި ރޭ ކުޅުނު މެޗުގެ ފުރަތަމަ ދެ ސެޓު ޕޮލިހުން ކާމިޔާބުކުރިއިރު މި ދެ ސެޓު ޕޮލިހުން ކާމިޔާބުކުރީ 25-22 އަދި 25-18 އިންނެވެ. މި ދެ ސެޓުގައި ޕޮލިހުގެ ބިދޭސީ ކުޅުންތެރިޔާ ދިފްތީ ރޮމޭޝްގެ އިތުރުން އަލީ ހުޒާމް (ހުޒަންޓޭ) އަދި އިސްމާއިލް ސާޖިދު (ކުޑަކާއްޓޭ) ގެ ފަރާތުން މޮޅު ކުޅުމެއް ފެނިގެންދިޔައެވެ.

ފުރަތަމަ ދެ ސެޓު ޕޮލިހުން ގެންދިޔަ ނަމަވެސް ގުޑީސްއިން ވަނީ ފަހު ތިން ސެޓުގައި މޮޅު ކުޅުމެއް ދައްކައި މެޗުން މޮޅުވެފައެވެ. މި ތިން ސެޓު ގުޑީސް އިން ގެންދިޔައީ 25-27، 23-25 އަދި 13-15 އިންނެވެ. މި ތިން ސެޓުގައި ގުޑީސްގެ ބިދޭސީ ކުޅުންތެރިޔާ ގަޔާސް ކީރްތީ އާއި ގުޑީސް ޓީމުގެ ހަސަން ނިލާމް (ޕާޓޭ) އަދި ކެޕްޓަން ހުސެއިން ވިޝާމް (ބުޅިކެ) ގެ ފަރާތުން ވަނީ ތަފާތު މޮޅު ކުޅުމެއް ފެނިގެން ގޮސްފައެވެ.

މުބާރާތުގައި ހުކުރު ދުވަހު ހަވީރު ކުޅުނު މެޗު ސިފައިން ވަނީ ސީދާ ތިން ސެޓުން ސިޓީ ބަލިކޮށްފައެވެ. މި މެޗުގެ ސެޓުތައް ސިފައިން ގެންދިޔައީ 25-12، 25-16 އަދި 25-12 އިންނެވެ.

މި ނަތީޖާ އާއި އެކު ސިފައިންގެ ކްލަބް ލީގު ތާވަލުގެ އެއްވަނައިގައި އޮތީ ލިބުނު 12 ޕޮއިންޓާއެކުގައެވެ. ދެވަނައިގައި އޮތް ގުޑީސްއަށް 11 ޕޮއިންޓް ލިބިފައިވާއިރު ތިން ވަނައިގައި ޕޮލިސް އޮތީ 10 ޕޮއިންޓާއެކުގައެވެ.