ޓުއަރިޒަމްގެ ދާއިރާއަށް މިހާރު ދިމާވެފައިވާ ކަންކަމުގެ މައްޗަށް ވަޒީފާ ދޭ ފަރާތްތައް ތަމްސީލުކުރާ ނެޝަނަލް ފެޑެރޭޝަން އޮފް މޯލްޑިވިއަން އެމްޕްލޯޔަރސް އާއި ވަޒީފާއަދާކުރާ ފަރާތްތައް ތަމްސީލުކުރާ މޯލްޑިވްސް ޓްރޭޑް ޔުނިއަންސް ކޮންގްރެސް އާއި، ދިވެހި ސަރުކާރު ހިމެނޭ އައިއެލްއޯގެ މިންގަނޑުތަކަށް ފެތޭ ޓްރައިޕާޓައިޓް ކޮމިޓީއެއް އެކުލަވާލާ ވީއެންމެ އަވަހަކަށް މަޝްވަރާކުރުމަށް ނޭޝަނަލް ފެޑެރޭޝަން އޮފް މޯލްޑިވިއަން އެމްޕްލޯޔަރސް(އެންއެފްއެމްއީ) އިން ގޮވާލައިފިއެވެ.
އެޖަމިއްޔާއިން ނެރެފައިވާ ނޫސްބަޔާނެއްގައި ބުނެފައިވަނީ މި މަޝްވަރާތަކުގައި ސަރުކާރުން އިދާރީ އިސް ދައުރެއް އަދާކުރުމަކީ އެ ޖަމިއްޔާއިން ދެކޭގޮތުގައި މުހިންމު ކަމެއް ކަމަށެވެ.
ނޫސްބަޔާނުގައި އިތުރަށް ބުނެފައިވަނީ ޓުއަރިޒަމް އިންޑަސްޓްރީގައި ވަޒީފާ އަދާކުރާ ފަރާތްތަކާއި ވަޒީފާދޭ ފަރާތްތަކާއި އަދި ސަރުކާރުން ކުރަންޖެހޭ ކަންކަން ކުރުމުގައި ކުރިމަތިވެފައިވާ މައްސަލަތަކާއި މިކަންކަން ރަނގަޅުކުރުމަށް އަވަސް ފިޔަވަޅުތަކެއް އަޅަން ޖެހިފައިވާކަން ފާހަގަކުރެވިފައިވާ ކަމަށެވެ. އަދި މަސައްކަތްތެރިންނަށް ވަކިން ޚާއްސަކޮށް ޓުއަރިޒަމް އިންޑަސްޓްރީއަށް މިހާރު ކުރިމަތިވެފައިވާ މައްސަލަތައް ރަނގަޅުކުރުމަށް ސަރުކާރާއި، ކުންފުނިތަކުގެ މެނޭޖްމެންޓުންނާއި، ވަޒީފާ އަދާކުރާ ފަރާތްތައް ތަމްސީލުކުރާ ޓްރޭޑް ޔޫނިއަންތައް ގުޅިގެން އެކަށީގެންވާ މަސައްކަތްތަކެއް ކުރަންޖެހިފައިވާ ކަަމަށް ބަޔާނުގައި ބުނެފައިވެއެވެ.
އަދި އައިއެލްއޯގެ ހަމަތަކާއި އެއްގޮތަށް މިތިން ފަރާތުގެ މަންދޫބުން ހިމެނޭ ގޮތުން ޓްރައިޕާޓައިޓް ޑައިލޮގް ފަށައި ކުރިމަތިވެފައިވާ ގޮންޖެހުންތަކާއި އެކަންކަން ހައްލުކުރުމަށް އެޅިދާނެ ފިޔަވަޅުތައް ފާހަގަކޮށް އަދި ފާހަގަކުރެވޭ ކަންކަމަށް އިސްލާހީ ފިޔަވަޅު އަޅައި ނިންމާނޭ މުއްދަތެއް ކަނޑައެޅުމާއެކު އެކްޝަން ޕްލޭނެއް އެކުލަވާލަންޖެހޭ ކަމަށް އެ ޖަމިއްޔާއިން ދެކޭކަމަށްވެސް ބަޔާނުގައިވެ އެވެ.
މީގެއިތުރުން ޓުއަރިޒަމްގެ ދާއިރާގެ ކަންކަން ޚަރުދަނާކޮށް އިސްލާހުކުރުމަށް ސަރުކާރުން ފަށާފައިވާ މަސައްކަތްތައް ކުރިޔަށް ގެންދާ ގޮތާމެދު ޓުއަރިޒަމް މިނިސްޓަރަށާއި ސަރުކާރަށް އިތުބާރު އެބައޮތް ކަމަށް ބަޔާނުގައި ބުނެފައިވެ އެވެ.
