1 ޖެނުއަރީގައި 392،078 ކުދިން އުފަންވި
އެންމެ ގިނައިން ކުދިން އުފަންވީ އިންޑިއާގައި، އެއީ 67،385 ކުދިން
1 ޖެނުއަރީ 2020 ގައި އުފަންވި ކުދިންތަކެއް ހޮސްޕިޓަލުގައި
މި އަހަރުގެ ފުރަތަމަ ދުވަހު 392،078 ކުދިން އުފަންވިކަމަށް ޔުނިސެފުން ހާމަކޮށްފިއެވެ.
ޔުނިސެފާއި ހަވާލާދީ ބައިނަލްއަގުވާމީ މީޑިއާތަކުން ބުނެފައިވަނީ ޖެނުރައީ 1 ވަނަ ދުވަހު 392،078 ކުދިން އުފަންވި އިރު މީގެ ތެރެއިން 17 ޕަސެންޓް ނުވަތަ 67،385 ކުދިންނަކީ އިންޑިއާއަށް އުފަންވި ކުދިންނެވެ.
އިންޑިއާގެ އިތުތުން އިތުރު ގަތް ގައުމުއްގައި އުފަންވި ކުދިންގެ އަދަދު އުޅެނީ ހާހުން މަތީގައެވެ. އެގޮތުން ޗައިނާ އުޅެނީ މި ލިސްޓްގެ ދެވަނައިގައެވެ. ޖެނުއަރީ 1 ވަނަ ދުވަހު ޗައިނާގައި އުފަންވީ 46،299 ކުދިންނެވެ. އަދި ނައިޖީރިއާގައި 26،039 ކުދިން އުފަންވި އިރު، ޕާކިސްތާނުގައި 6787 ކުދިން، އިންޑޮނޭޝިއާގައި 13،020 ކުދިން، އެމެރިކާގައި 10،452 ކުދިން، ކޮންގޯގައި 10،247 އަދި އިތޯޕިއާގައި 8،493 ކުދިން އުފަންވެފައިވެއެވެ.
ޔޫއެންއިން ޖޫން މަހު އާންމުކުރި ދުނިޔޭގެ އާބާދީއާބެހޭ ރިޕޯޓަށް ބަލާއިރު، 2027 ވަނަ އަހަރު އިންޑިއާއިން ޗައިނާ ވައްޓާލުމަށްފަހު ދުނިޔޭގެ އެންމެ އާބާދީ ބޮޑު ގައުމަށް ވެގެންދާނެއެވެ.
ޔުނިސެފްގެ ތަފާސްހިސާބުތަކަށް ބަލާއިރު، 2018 ވަނަ އަހަރު 2.5 މިލިއަން ކުދިން ވަނީ އުފަންވުމަށްފަހު ކޮންމެވެސް ސަބަބަކާ ހެދި މަރުވެފައެވެ. އުފަންވި ކުދިން ފުރަތަމަ މަހުގެ ތެރޭގައި މަރުވެފައިވާ ކަމަށް ބެލެވެނީ، ފުރިހަމަވެފައި ނެތުމާއި، ވިހެއުމުގެ ތެރޭގައި ދިމާވި ކަންތައްތަކާއި، އަދި ބައެއް އިންފެކްޝަންތަކުގެ ސަބަބުންނެވެ.
މީގެ އިތުރުން ކޮންމެ އަހަރަކުވެސް އުފަންވާކުދިންގެ ތެރެއިން 2.5 އިންސައްތަ ކުދިންނަކީ ވިހާ އިރުވެސް މަރުވެފައިވާ ކުދިން ކަމަށް ޔުނިސެފުން ވަނީ ބުނެފައެވެ.
