ސިފައިން ބަލިކޮށް ޕޮލިހުން ތާވަލުގެ ދެވަނައަށް!

ގައުމީ ވޮލީ ބޯޅަ ލީގުގެ ފިރިހެން ޑިވިޝަނުގެ ފުރަތަމަ ބުރުގެ ފަހު މެޗުގަ ދިވެހި ސިފައިންގެ ކްލަބު އަތުން މޮޅުވެ ޕޮލިހުން ލީގު ތާވަލުގެ ދެވަނައަށް ޖެހިލައިފިއެވެ.

މި ބައްޔަކީ ދިވެހި ސިފައިންގެ ކްލަބުން ބަލިވި ފުރަތަމަ ބައްޔެވެ.

ފުރަތަމަ ބުރުގަ ކުޅުނު ހުރިހާ މެޗަކުން ބަލިވެ ސްޕޯޓްސް ކްލަބް ހޯކްސް ވަނީ މުބާރާތުން ކަޓާފައެވެ. ލީގުގެ ދެވަނަ ބުރު ފަށާނީ ހުކުރު ދުވަހުއެވެ.

ޕޮލިހުން ސިފައިންގެ މައްޗަށް ކުރި ހޯދީ ފަހަތުން އަރާ ތިން ސެޓު އެއް ސެޓުންނެވެ. މި މެޗުގެ ސެޓުތައް ދިޔައީ 25-22، 20-25، 18-25 އަދި 25-21 އިންނެވެ.

ޒުވާނުންގެ މަރުކަޒު އެތެރޭ ކޯޓުގައި ގިނަ ސަޕޯޓަރުން ކުރިމަތީގަ ކުޅުނު މި މެޗުގެ ފުރަތަމަ ސެޓު ފަށައިގެން ގިނަ ވަގުތު ލީޑު ކުރަމުން ގެންދިޔައީ ޕޮލިހުންނެވެ. އިސްމާއިލް ސާޖިދު (ކުޑަ ކާއްޓޭ) އާއި އަލީ ހުޒާމް (ހުޒަންޓެ) ގެ ފަރާތުން މޮޅު ކުޅުމެއް މި ސެޓުގައި ފެނިގެންދިޔައިރު، ޕޮލިހުން ލީޑު ނެގިޔަ ނުދީ ސިފައިން ގެންދިޔައީ އެއްވަރެއްގައި ހިފަހައްޓަމުންނެވެ. މީގެ ފައިދާ ނަގާ ސިފައިން ވަނީ ސެޓުގެ ފަހު ވަގުތު އެޓީމުގެ ބިދޭސީ ކުޅުންތެރިޔާގެ މުބާޝަރު ރާޖާގެ މޮޅު ކުޅުމާއެކު ސެޓު ކާމިޔާބުކޮށްފައެވެ.

ޖެހިގެން އައި ތިން ސެޓު ޕޮލިހުން ވަނީ އިތުބާރު ކަމާއެކު ކުޅެ ކާމިޔާބުކޮށްފައެވެ.

ލީގުގެ ފުރަތަމަ ބުރު އެއްވަނައިގައި ނިންމާލީ ސިފައިންނެވެ. ލީގުގަ މިހާތަނަށް ސިފައިން ބަލިވީ ހަމައެކަނި ޕޮލިހުން އަތުންނެވެ. އެއްވަނައިގަ އޮތް ސިފައިންނާއި ދެވަނައިގަ އޮތް ޕޮލިހާއި އަދި ތިންވަނައިގަ އޮތް ގުޑީސްއަށް ނުވަ ޕޮއިންޓު ލިބިފައިވާއިރު ހަތަރު ވަނައިގައި ސްޕޯޓްސް ކްލަބު ސިޓީ އޮތީ ތިން ޕޮއިންޓާއެކުގައެވެ.