ބްރައިޓަން އިން ޗެލްސީ މޮޅުވިޔަ ނުދީ ހިފަހައްޓައިފި

އިނގިރޭސި ޕްރެމިއަރ ލީގުގަ، ޗެލްސީ އަދި ބްރައިޓަން ބައްދަލުކުރި މެޗު އެއްވަރުވެގެން ނިމިއްޖެއެވެ.

ބްރައިޓަންގެ ދަނޑުގަ ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެން ދިޔައިރު ޗެލްސީން ވަނީ ބްރައިޓަންގެ ގޯލަށް ނުރައްކާކޮށްފައެވެ. އެގޮތުން ޗެލްސީން ފުލުފުލުގައި ބްރައިޓަންގެ ގޯލަށް ނުރައްކާ ކޮށްފައިވާއިރު މެޗުގެ 10 ވަނަ މިނެޓުގަ ޗެލްސީން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ އަޒްބިލި ކުއެޓާ އެވެ. މި ލަނޑާއެކު ބްރައިޓަންއިން އެޓީމުގެ ކުޅުން ރަނގަޅުކުރި އިރު އެޓީމުން ވަނީ ޗެލްސީގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މެޗުގެ 38 ވަނަ މިނެޓުގައި ބްރައިޓަންގެ ވެބް ސަޓަރ އަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ބޯޅަ ގޯލާއި އަމާޒުނުވެ ދިޔައީ ބޭރަށެވެ. މީގެ އިތުރުން މެޗުގެ 43 ވަނަ މިނެޓުގަ ބްރައިޓަންގެ ލިއެނާޑޯ ފޮނުވާލި ހަމަލާ ޗެލްސީގެ ކީޕަރު ވަނީ ހުޝިޔާރު ކަމާއި އެކު ދިފާއު ކޮށްފައެވެ.

މެޗުގެ ފުރަތަމަ ހާފު ނިމިގެން ދިޔައީ 1-0 ގެ ނަތީޖާއަކުންނެވެ.

މެޗުގެ ދެވަނަ ހާފު ފަށައިގެން ޗެލްސީން މޮޅު އެޓޭކިންގ ގޭމެއް ކުޅުނުއިރު އެޓީމުން ގެންދިޔައީ ބްރައިޓަންގެ ގޯލަށް ނުރައްކާ ކުރަމުންނެވެ. އެގޮތުން މެޗުގެ 67 ވަނަ މިނެޓުގަ ޗެލްސީއަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އެގޮތުން ޗެލްސީގެ ހުޑްސަން ފޮނުވާލި ބޯޅަ ދިއައީ އަރިމަތީ ދަނޑި ކައިރިން ބޭރަށެވެ. ބްރައިޓަންއިން ވަނީ މެޗުގެ 84 ވަނަ މިނެޓުގަ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ އަލްބަންއެވެ.

މި ނަތީޖާއާއި އެކު ޗެލްސީން ތާވަލުގެ ހަތަރުވަނައިގައި އޮތީ ލިބުނު 36 ޕޮއިންޓާއެކުގައެވެ. ތާވަލުގެ އެއްވަނައިގަ އޮތް ލިވަރޕޫލަށް 55 ޕޮއިންޓް ލިބިފައިވާއިރު މި މެޗުން ބަލިވި ބްރައިޓަން އަށް ލިބިފައިވަނީ 24 ޕޮއިންޓެވެ.