ޔޫރަޕުގެ ބޮޑެތި ކްލަބުތަކުން ފާރަލަމުން އަންނަ ސަލްޒްބާރގްގެ ނޯވޭ ފޯވަރޑް އާލިން ހާލަންޑްގެ ސޮއި ޖަރުމަނުގެ ބޮރޫޝިއާ ޑޯޓްމަންޑް އިން ހޯދައިފިއެވެ.

އުމުރުން 19 އަހަރުގެ ހާލަންޑް ގެ ސޮއި ޑޯޓްމަންޑްއިން ހޯދީ 2024ގެ ނިޔަލަށެވެ.

ޑޯޓްމަންޑާއި ގުޅުމަށްފަހު ހަލާންޑް ބުނީ އޭނާ ޑޯޓްމަންޑްގެ 80،000 ހާހަށްވުރެ ގިނަ ސަޕޯޓަރުންގެ ކުރިމަތީގައި ކުޅެން ކެތްމަދުވެފައި ހުރިކަމަށާއި ބޭނުންވަނީ ޑޯޓްމަންޑާއެކު ކާމިޔާބު ހޯދުމަށް ކަމަށެވެ. ޔޫރަޕުގެ ބޮޑެތި ކުލަބުތަކުގެ ލޯ އަމާޒުވި ހާލަންޑަކީ މި ސީޒަނުގައި ޔޫރަޕުގެ އެންމެ ޝަރަފުވެރި މުބާރާތްކަމަށްވާ ޗެމްޕިއަންސް ލީގުގައި ދެވަނައަށް އެންމެ ގިނަ ލަނޑު ޖަހައިދިން ކުޅުންތެރިޔާއެވެ.

މީޑިއާ ރިޕޯޓުތައް ބުނާގޮތުން ހަލާންޑްއަށް އިޓަލީގެ ޗެމްޕިއަން ޔުވެންޓަރސް، އިނގިރޭސި ގަދަ ބާރު މެންޗެސްޓަރ ޔުނައިޓެޑް އަދި ސްޕެއިންގެ ގަދަ ބާރު ރެއާލް މެޑްރިޑުންވެސް ފާރަ ލައިފައިވެއެވެ. އޭގެ ތެރެއިން ޔުވެންޓަރސްއިން ހާލަންޑާ އެކު އެއްބަސްވުމަކާއި ގާތަށް އައިއިރު އެންމެ ފަހު ވަގުތުގައި ހާލަންޑްގެ އެޖެންޓް ވަނީ އޭނާގެ އެއްބަސްވުމުގެ އަގު ބޮޑު ކޮށްފައެވެ. ޔުވެންޓަރސްގެ އޮފިޝަލަކު މީޑިއާގައި ބުނީ އެންމެ ފަހު ވަގުތާއި ޖެހުމުން ހަލާންޑްގެ ފަރާތުން ގިނަ ޑިމާންޑްތަކެއް ކުރި ކަމަށެވެ.

ހަލާންޑް ވަނީ މިސީޒަނުގައި އޮސްޓިރާ ލީގުގައި ސަލްޒްބާރގްއަށް ކުޅެދިން 14 މެޗުން 16 ލަނޑު އެޓީމަށް ކާމިޔާބުކޮށްދީފައެވެ. މީގެއިތުރުން ޗެމްޕިއަންސް ލީގުގައި އޭނާ ވަނީ އަށް ލަނޑު އެޓީމަށް ކާމިޔާބުކޮށްދީފައެވެ.