ސީޕްލޭން ޓާމިނަލް ހިންގުމުގެ ގާބިލުކަން އެމްއޭސިއެލް ގައި އެބަހުރި: ފައްޔާޒު
30 ޑިސެމްބަރު 2019 | ހޯމަ 08:10އެކަމާއިމެދު ޝައްކު ނުކުރައްވާ ކަމަށް ވިދާޅުވީ
ވެލާނާ އިންޓަރނޭޝަނަލް އެއަރޕޯޓުގެ އާ ސީޕްލޭން ޓާމިނަލް
ސީޕްލޭން ހިންގުމުގެ ގާބިލުކަން މޯލްޑިވްސް އެއާޕޯޓްްސް ކޮމްޕެނީ ލިމިޓެޑް (އެމްއޭސީއެލް)ގައި އެބަހުރި ކަމަށް އިކޮނޮމިކް މިިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު ކުރެއްވި ޓްވީޓެއްގައި ވިދާޅުވީ، މާލެ ވައިގެ ބަނދަރު ވެލާނާ އިންޓަނޭޝަނަލް އެއަޕޯޓް ތަރައްގީކޮށް ހިންގުން ޖީއެމްއާރް އަތުން ނެގުނީ އެމްއޭސީއެލް އަށް އެކަން ކުރުމުގެ ގާބިލުކަން ހުރީމަ ކަމަށެވެ.
މިނިސްޓަރު ވިދާޅުވީ، ''ކުޑަ ކުޑަ'' ސީޕްލޭން ޓާމިނަލް ހިންގުމުގެ ހިންގުމުގެ ފުރިހަމަ ގާބިލުކަން އެމްއޭސީއެލް ގައި އެބަހުރި ކަމަށާއި، އެކަން އެގޮތަށް ކުރާނެ ކަމާއިމެދު ޝައްކެއް ނެތް ކަމަށެވެ.
ޓްވީޓް ނިންމަވާލައްވަމުން ފައްޔާޒު ވިދާޅުވީ، އެއްބަސްވުންތަކަށް އިހްތިރާމްކޮށް އެކަން ކުރިޔަށްދާނެ ކަމަށެވެ.
ސިޕްލޭން ޓާމިނަލް ހިންގުމުގެ ގާބިލްކަން އެމްއޭސީއެލްގައި އެބަހުރި ކަމަށް ފައްޔާޒު ވިދާޅުވެފައިވާއިރު، އާ ސީ ޕްލޭން ޓާމިނަލް، ނުއަގުގައި ވަކި ބަޔަކަށް ކުއްޔަށް ދޭން އުޅޭ ކަމުގެ ތުހުމަތުކޮށް އޮޑިޓެއް ހަދަން އޮޑިޓް އޮފީހަށް ހުށަހަޅަން ރައްޔިތުންގެ މަޖިލީހުގެ މާލިއްޔަތު ކޮމެޓީން ވެސް މީގެ ކުރިން ވަނީ ފާސްކޮށްފައެވެ.
މާލިއްޔަތު ކޮމެޓީގައި ވާހަކަ ދައްކަވަމުން ދާންދޫ ދާއިރާގެ މެންބަރު ޔައުގޫބް އަބްދުﷲ ވިދާޅުވެފައިވަނީ، އެމްއޭސީއެލް އިން އަލަށް ހަދާ ސީ ޕްލޭން ޓާމިނަލް ކުޑަ އަގެއްގައި ކުއްޔަށް ދޫކުރުމަށް ނިންމާފައިވާ ކަމުގެ މައުލޫމާތެއް ލިބިފައިވާ ކަމަށެވެ.
އެކަން އެހެން ވެއްޖެނަމަ އެކަމުގެ ސަބަބުން ދައުލަތަށް އާމްދަނީގެ ގޮތުގައި ލިބޭ މިންވަރު ކުޑަވެގެން ދާނެއެވެ. ސީޕްލޭން ޓާމިނަލް ހިންގަން ޓީއެމްއޭއަށް ދިނުމަށް އެމްއޭސީއެލު މަޝްވަރާ ކޮށްފައިވާ ކަމަށްވެއެވެ.
އެއާޕޯޓުގެ އިރުމަތީ ފަރާތުގައި އޮންނަ ފަޅު ހިއްކައިގެން ހަދާ އާ ޓާމިނަލް ހެދުމުގެ ގޮތުން 18،000 އަކަމީޓަރުގެ ސަރަހައްދެއް، ވަނީ ހިއްކާފައެވެ.
އާ ސީ ޕްލޭން ޓާމިނަލްގެ މަސައްކަތް ކުރިއަށް ގެންދަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ)އާ ހަވާލުކޮށްގެންނެވެ. އެއީ 40 މިލިއަން ޑޮލަރުގެ މަޝްރޫއެކެވެ.
