އިނގިރޭސި ޕްރިމިއާ ލީގުގައި އަގުއެރޯ އަދި ޑިބްރައިނާގެ ލަނޑުން މެންޗެސްޓާ ސިޓީއިން ޝެފިލްޑް ޔުނައިޓެޑް ބަލިކޮށްފިއެވެ.

ސީޓީގެ އަމިއްލަ ދަނޑުގައި ކުޅުނު މި މެޗު ސިޓީއިން ކާމިޔާބުކުރީ 2-0 ގެ ނަތީޖާ އަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ ފުރަތަމަ ހާފުގައި ސިޓީއިން ވަނީ ޝެފިލްޑްގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވައިލައިފައެވެ. އެގޮތުން މެޗުގެ 36 ވަނަ މިނެޓުގައި ސިޓީގެ ރަހީމް ސްޓާލިންގއަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. މީގެ އިތުރުން މެޗުގެ 45 ވަނަ މިނެޓުގައި ސިޓީގެ އަގުއެރޯއަށް ވަނީ ރަނުގެ ފުރުސަތެއްލިބި ބޭކާރުވެފައެވެ.

މިހާފުގައި ޝެފިލްޑްގެ ޑިފެންޑަރުންގެ ފަރާތުން މޮޅު ކުޅުމެއް ފެނިގެންދިޔައިރު ސިޓީގެ އެޓޭކްލައިން އިން ފޮނުވާލި ގިނަ ހަމަލާތަކެއް ޝެފިލްޑްގެ ޑިފެންޑަރުން ވަނީ ހުއްޓުވައިފައެވެ. މެޗުގެ ފުރަތަމަ ހާފު ނިމިގެންދިޔައީ 0-0 ގެ ނަތީޖާއަކުންނެވެ.

މެޗުގެ ދެވަނަ ހާފު ފަށައިގެން ސިޓީއިން ގެންދިޔައީ ޝެފިލްޑްގެ ގޯލަށް ފުލުފުލުގައި ހަމަލާތައް ފޮނުވައިލަމުންނެވެ. އެގޮތުން މެޗުގެ 48 ވަނަ މިނެޓުގައި ސިޓީގެ ސާޖިއޯ އަގުއެރޯއަށް ވަނީ ލަނޑު ޖަހަން ރަނުގެ ފުރުސަތެއްލިބި ބޭކާރުވެފައެވެ. އޭނާ ފޮނުވާލި ބޯޅަ ދިޔައީ އަރިމަތީ ދަނޑި ކައިރިން ބޭރަށެވެ. މެޗުގައި ސިޓީއިން ލީޑު ނެގީ މެޗުގެ 52 ވަނަ މިނެޓުގައެވެ.

މި ލަނޑު އެޓީމަށް ކާމިޔާބުކޮށްދިނީ ސާޖިއޯ އަގުއެރޯއެވެ. މި ލަނޑަށްފަހުވެސް ސިޓީއިން ވަނީ ފުލުފުލުގައި ޝެފިލްޑްގެ ގޯލަށް ނުރައްކާކޮށްފައެވެ. ސިޓީގެ ދެވަނަ ލަނޑު މެޗުގެ 82 ވަނަ މިނެޓުގައި އެޓީމަށް ކާމިޔާބުކޮށްދިނީ ރިޔާދް މަހްރޭޒްގެ އެހީތެރިކަމާއިއެކު ކެވިން ޑިބްރެއިނާއެވެ.

މި ނަތީޖާއާއި އެކު ތާވަލުގެ ތިންވަނައިގައި އޮތް ސިޓީއަށް ލިބިފައިވަނީ 41 ޕޮއިންޓެވެ. ލީގު ތާވަލުގެ އެއްވަނައިގައި އޮތް ލިވަރޕޫލްއަށް 55 ޕޮއިންޓް ލިބިފައިވާއިރު ދެވަނައިގައި އޮތް ލެސްޓާ ސިޓީއަށް ލިބިފައިވަނީ 42 ޕޮއިންޓެވެ. ތާވަލުގެ ހަތަރުވަނައިގައި ޗެލްސީއިން އޮތް އިރު ތާވަލުގެ ފަސްވަނައިގައި އޮތީ މެންޗެސްޓާ ޔުނައިޓެޑެވެ.