ވެސްޓްހަމް އަތުން މޮޅުވެ ލެސްޓާއަށް ތާވަލުގެ ދެވަނައިގައި 4 ޕޮއިންޓްގެ ލީޑެއް

އިނގިރޭސި ޕްރިމިއަރ ލީގުގައި ވެސްޓްހަމް ޔުނައިޓެޑާއި، ލެސްޓަރ ސިޓީ ބައްދަލުކުރި މެޗު ލެސްޓަރއިން ކާމިޔާބުކޮށް ލީގު ތާވަލުގެ ދެވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

ވެސްޓްހަމް ޔުނައިޓެޑް ދަނޑުގަ ކުޅުނު މި މެޗު ނިމިގެންދިޔައީ 2-1 ގެ ނަތީޖާއަކުންނެވެ.

މި މެޗު ފަށައިގެން ވެސްޓްހަމްއިން ލެސްޓަރގެ ގޯލަށް ނުރައްކާކޮށް ގިނަ ޙަމަލާތަކެއް އުފެއްދިއިރު މެޗުގެ 8 ވަނަ މިނެޓުގައި ވެސްޓްހަމް ޔުނައިޓެޑުގެ މެނުއަލް ލެންޒިނީ ފޮނުވާލި ނުރައްކާތެރި ޙަމަލާ ގޯލާ ޢަމާޒުވެފައެއް ނުވެއެވެ. އޭނާ ބޮލުން ފޮނުވާލި ޙަމަލާ ދިޔައީ ގޯލު ދަނޑި ކައިރިން ބޭރަށެވެ. އަދި މެޗުގެ 22 ވަނަ މިނެޓުގައި އަރްތާ މަސުއާކޫ ފޮނުވާލި ހަމަލާ ލެސްޓަރގެ ކީޕަރުވަނީ ހުށިޔާރުކަމާއި އެކު ދިފާޢު ކޮށްފައެވެ. މި މެޗުގެ 40 ވަނަ މިނެޓުގައި ލެސްޓަރ ސިޓީން ވަނީ ލަނޑު ޖަހާ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށް ދިނީ އަޔޯޒީގެ އެހީތެރިކަމާއެކު ކެލެޗީއެވެ. މި ލަނޑާއެކު ވެސްޓްހަމް އިން ވަނީ ލެސްޓާގެ ގޯލަށް ފުލުފުލުގައި ހަމަލާ އުފައްދައިފައެވެ. މެޗުގެ 45 ވަނަ މިނެޓުގައި ވެސްޓްހަމްއިން ވަނީ ލަނޑު ޖަހައި މެޗުގެ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޕަބްލޯއެވެ.

މެޗުގެ ދެވަނަ ހާފު ފަށައިގެން ލެސްޓަރއިން ވަނީ އެޓީމުގެ ކުޅުން ރަނގަޅުކޮށް ގިނަ ޙަމަލާތަކެއް ވެސްޓްހަމްގެ ގޯލަށް ފޮނުވާލައިފައެވެ. މެޗުގެ 56 ވަނަ މިނެޓުގައި ލެސްޓަރއިން ވަނީ ލަނޑު ޖަހާ ދެވަނަ ފަހަރަށް ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ގްރޭއެވެ.

މި ނަތީޖާއާއެކު ލެސްޓަރއިން ވަނީ ތާވަލުގެ ތިންވަނައިގައި އޮތް މެންޗެސްޓަރ ސިޓީއަށް ވުރެ ހަތަރު ޕޮއިންޓް އިތުރަށް ހޯދާފައެވެ. ލެސްޓާަރން ތާވަލުގެ ދެވަނައިގައި އޮތީ 42 ޕޮއިންޓާއެކުގައެވެ. ތާވަލުގެ ތިންވަނައިގައި އޮތް ސިޓީ އަށް 38 ޕޮއިންޓު ލިބިފައިވާއިރު ތާވަލުގެ އެއްވަނައިގަ އޮތީ 52 ޕޮއިންޓާއެކުގައެވެ.