އަންދާޒާކުރި ވަރަށްވުރެ ލިބުނު ޓެކްސް އާމްދަނީ އިތުރުވެއްޖެ

ނޮވެމްބަރު މަހުގެ ނިޔަލަށް ލިބޭނެކަމަށް އަންދާޒާ ކުރިވަރަށްވުރެ، ދައުލަތަށް ލިބުނު ޢާމްދަނީ 33.5 އިންސައްތަ އިތުރުކަމަށް މީރާގެ ތަފާސްހިސާބުތަކުން ދައްކައިފިއެވެ.

ނޮވެންބަރު މަހު މީރާއަށް 1.15 ބިލިއަން ރުފިޔާގެ ޢާމްދަނީއެއް ލިބިފައިވެއެވެ. މިއީ 2018ވަނަ އަހަރުގެ ނޮވެންބަރު މަހު ލިބުނު ޢާމްދަނީއަށް ވުރެ 17.7 އިންސައްތަ އިތުރު ޢަދަދެކެވެ. ނޮވެންބަރު މަހު ދައުލަތަށް ލިބުނު ޢާމްދަނީގެ ތެރެއިން ދިވެހި ފައިސާއިން ލިބިފައިވަނީ، 358.68 މިލިއަން ރުފިޔާއެވެ. އަދި ޑޮލަރުން ޢާމްދަނީގެ ގޮތުގައި ލިބިފައިވަނީ 51.59 މިލިއަންއެވެ.

މީރާގެ ތަފާސްހިސާބުތަކަށް ބަލާއިރު އެންމެ ބޮޑު ޢާމްދަނީއެއް ލިބިފައިވަނީ ޖީއެސްޓީންނާއި، ލީސް ޕީރިއަޑް އެކްސްޓެންޝަން ފީއިންނާއި ގްރީން ޓެކްސްގެ ގޮތުގައެވެ. އެގޮތުން ޖީއެސްޓީއާއި ޓީޖީއެސްޓީ ހިމެނޭގޮތަށް ދައުލަތަށް 651.68 މިލިއަން ރުފިޔާގެ ޢާމްދަނީއެއް ލިބިފައިވެއެވެ. ލީސް ޕީރިއަޑް އެކްސްޓެންޝަން ފީގެ ގޮތުގައި 153.60 މިލިއަން ރުފިޔާ ލިބިފައިވާއިރު، ގްރީން ޓެކްސްގެ ގޮތުގައި 73.15 މިލިއަން ރުފިޔާ ލިބިފައިވެއެވެ.

އަހަރުގެ މިހާތަނަށް ޓެކްސްގެ ގޮތުގައި ދައުލަތަށް ލިބިފައިވާ ޖުމުލަ ޢާމްދަނީއަށް ބަލާއިރު، 15.23 ބިލިއަން ރުފިޔާގެ ޢާމްދަނީއެއް ލިބިފައިވެއެވެ. ނިމިދިޔަ އަހަރުގެ މިހާތަނަށް ދައުލަތަށް ޓެކްސް ޢާމްދަނީގެ ގޮތުގައި ލިބިފައިވަނީ 14.91 ބިލިއަން ރުފިޔާއެވެ.