ވޯޓު ޗާޕްކުރާ ގޮތަށް ގެންނަ ބަދަލާއެކު ވޯޓު ކަރުދާހުގެ ޢަދަދު މަދުވާނެ: އީސީ ޝަރީފް
ގާނޫނުގައި އޮތްގޮތަށް ވޯޓު ކަރުދާސް ޗާޕްކުރާނަމަ 1.1 މިލިއަން ވޯޓްކަރުދާސް ޗާޕްކުރަން ޖެހޭ
އިލެކްޝަންސް ކޮމިޝަންގެ ރައީސް އަހުމަދު ޝަރީފް
އަންނަ އެޕްރީލް މަހު ބާއްވާ ލޯކަލް ކައުންސިލް އިންތިޚާބުގަ ވޯޓުލުމަށް ބޭނުންކުރާ ކަރުދާސް ޗާޕުކުރުމަށް އިލެކްޝަންސް ކޮމިޝަނުން ގެންނަމުންދާ ބަދަލުތަކާއެކު ވޯޓު ޗާޕުކުރާ ޢަދަދަށް، އަދި އެކަމަށް ބޭނުންވާ ބަޖެޓަށް ވެސް ލުއިތަކެއް ލިބިގެންދާނެކަމަށް އިލެކްޝަންސް ކޮމިޝަނުގެ ރައީސް އަޙްމަދު ޝަރީފު ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގުރާމުގަ ވާހަކަދައްކަވަމުން ޝަރީފު ވިދާޅުވީ ލާމަރުކަޒީ ޤާނޫނަށް ގެނައި ބަދަލާއެކު ކައުންސިލަރުން އިންތިޚާބު ކުރާ ގޮތަށް ބަދަލު ގެނެސް އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް މެންބަރުން އިންތިޚާބުކުރަން ހިމެނުމުން 1.190 މިލިއަން ކަރުދާސް ޗާޕު ކުރަން ޖެހޭ ކަމަށެވެ. ނަމަވެސް އިލެކްޝަންސް ކޮމިޝަނުން ބައެއް މަސައްކަތްތައްކޮށް ފަސޭހަކަމާއެކު އަދި ޚަރަދު ކުޑަ ގޮތަކަށް އެކަން ކުރެވޭނެ ގޮތްތައް ބަލަމުން އަންނަ ކަމަށް ޝަރީފު ވިދާޅުވިއެވެ.
އޭނާ ވިދާޅުވީ ވޯޓު ކަރުދާސް އިތުރުވެއްޖެއްޔާ އޮޅުން ބޮޅުން އަރާފާނެ ކަމަށާއި، އީސީން މަޝްވަރާކޮށް ވަކި ގޮތަކަށް ނިންމުމުގެ މަރުޙަލާ ހަމައަށް އެކަން ގޮސްފައިވާ ކަމަށެވެ. ޝަރީފު ވިދާޅުވީ 2017 ވަނަ އަހަރުގެ ލޯކަލް ކައުންސިލް އިންތިޚާބުގަ ޗާޕު ކުރީ ގާތްގަޑަކަށް 400،000 ވޯޓު ކަރުދާސް ކަމަށާއި، 400،000 ވޯޓް ކަރުދާސް ޗާޕު ކުރެވުނު އިރުގައި މި ފަހަރު ޤާނޫނަށް ގެނެވުނު ބަދަލާއި ގުޅިގެން ކޮންމެ ވޯޓަކަށް ވަކި ކަރުދާސްކޮޅެއް ޗާޕުކޮށްފި ނަމަ 1.190 މިލިއަން ކަރުދާސްކޮޅު ޗާޕު ކުރަން ޖެހޭ ކަމަށެވެ.
ލާމަރުކަޒީ ޤާނޫނަށް ބަދަލު ގެނައުމުގެ ކުރިން ބަޖެޓު ކުރެވިދައި އޮތީ ވޯޓު ކަރުދާސް ޗާޕްކުރުމަށް 4 ވަރަކަށް މިލިއަން ރުފިޔާއެވެ. ޝަރީފު ވިދާޅުވީ ބަޖެޓުކޮށްފައި އިންނާނީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ވޯޓު ކަރުދާސް ނުލާ ކަމަށެވެ. އަދި އެއިރު ޤާނޫނަށް ގެނެވުނު އިޞްލާޙުތައް ފާސްނުވާތީ އެކަން ނޭނގޭ ކަމަށާއި، އެހެންނަމަވެސް މިހާރު އޮތް ޕްލޭނާ އެއްގޮތަށް ވޯޓު ކަރުދާސް ޗާޕްކުރާނަމަ ބޭނުންވާނީ އިތުރަށް 1.5 މިލިއަން ރުފިޔާ ކަމަށެވެ.
ޝަރީފު ވިދާޅުވީ ވޯޓު ކަރުދާހުގެ ޢަދަދު މަދުވުމުން ގުނުމުގެ މަރުޙަލާގައި ލުއިފަސޭހަވެގެންދާނެ ކަމަށެވެ. އަދި ގުނުމުގައާއި ނަތީޖާ އަވަހަށް އިޢުލާން ކުރުމަށްވެސް މަގުފަހިވެގެންދާނެކަމަށެވެ.
