އިންޑިއާ މުޒާހާރާގަ ތާށިވި 4 ފުލުހެއްގެ ހިމާޔަތުގަ ނުކުތީ ހަތް މުސްލިމުން!

އިންޑިއާގައި ދާދި ފަހުން ފާސްކުރި ރަށްވެހިކަމުގެ ބިލާއެކު އެޤައުމުގެ އެކި ޞަރަޙައްދުތަކުގައި ކުރަމުންދާ މުޒާހަރާތައް ހޫނެވެފައިވަނިކޮށް ގުޖުރާތު ސްޓޭޓުގެ "ޝާހު އޭ އަލަމް" ޞަރަޙައްދުގަ މުޒާހަރާ ކުރަމުންދިޔަ ޢާންމުންގެ ތެރެއިން މުޒާހަރާ ކޮންޓްރޯލް ކުރުމަށް ނުކުތް ފުލުހުންނަށް ހަތް މުސްލިމަކު ޙިމާޔަތްދީ ސަލާމަތްކޮށްދީފިއެވެ.

ޢާންމުވެފައިވާ ވީޑިއޯއާއި ފޮޓޯތަކުން ފެންނަ ގޮތުގައި ގެއެއްގެ ކައިރީގައި މުޒާހަރާ ކުރަމުންދާ މީހުންގެ މެދުގައި ފުލުހުންތަކެއް ތާށިވެފައި ތިބި އިރު އެމީހުން ތިބީ ގޮސް ހުސްވެފައެވެ. އަދި ޢާންމުން އެމީހުންނާ ދިމާލަށް ގަލާ އެކި ކަހަލަ އެއްޗެހި އުކަމުން ދަނިކޮށް އެމީހުންގެ އައްޑަނައަކަށް ނުކުތީ މުސްލިމު ޒުވާނެކެވެ.

އަދި އޭނާއެކު އިތުރު ހަ މުސްލިމު ޒުވާނުން ނުކުމެ އަތުގެ އިޝާރާތުން ޙަމަލާ ނުދިނުމަށް ގޮވަމުން ގޮސްފައިވެއެވެ. އަދި މުޒާހަރާގެ ބައިވެރިންގެ ކިބައިން ސަލާމަތްކޮށްގެން އަމާން ހިސާބަކަށް ގެންދާ މަންޒަރު ފެނެއެވެ. މި ފުލުހުންނަކީ އެއްގަމު އުޅަނދެއްގަ ނުކުތް ފުލުހުންތަކެކެވެ. އަދި ފުލުހުން ދުއްވި އުލނަދު ހުއްޓުވާ މުޒާހަރާގެ ބައިވެރިން ފުލުހުން ވަށާލާ ޙަމަލާދޭން ފެށިއެވެ.

މުސްލިމު ޒުވާނުންތަކެއް ހަތަރު ފުލުހަކު މުޒާހަރާގެ ބައިވެރިންގެ ތެރެއިން ސަލާމަތްކުރި ވީޑިއޯ ވަނީ ވައިރަލް ވެފައެވެ. އަދި 7 ޒުވާނުންނަށް ގިނަ ބަޔަކު އަންނަނީ ތަޢުރީފު ކުރަމުންނެވެ.

މި މަހުގެ 4 ވަނަ ދުވަހު އިންޑިއާގެ ޤާނޫނުހަދާ މަޖިލީހުން ފާސްކުރި ރަށްވެހިކަމުގެ ބިލާއެކު އިންޑިއާގެ އެކި ހިސާބުތަކުގައި ދަނީ ވަރުގަދަ މުޒާހަރާތަކެއް ކުރަމުންނެވެ. އަދި މި މުޒާހަރާތަކުގައި ފުލުހުން ބަޑިޖެހުމުގެ ސަބަބުން ބައެއް މީހުން މަރުވެފައިވާއިރު އެތައް ސަތޭކަ ބަޔަކަށް އަނިޔާވެފައިވެއެވެ. އަދި ފުލުހުންގެ ބަންދުގައި ވެސް އެތައް ސަތޭކަ ބަޔަކު އެބަތިއްބެވެ.

މުސްލިމުންނަށް ފުރުޞަތު ހަނިވާގޮތަށް އިންޑިއާގެ ޤާނޫނު ހަދާ މަޖިލީހުން ފާސްކުރި ރަށްވެހިކަމުގެ ބިލުގެ ސަބަބުން މުސްލިމުން ފިޔަވައި އެހެން ދީންތަކުގެ މީހުންނަށް އިންޑިއާގެ ރަށްވެހިންނަށް ވުމުގައި ދަތިތަކެއް ނެތެވެ. މި ބިލުގައި ވަކި ގޮތެއް ކަނޑައަޅާފައިވަނީ މުސްލިމުންނަށް އެކަންޏެވެ.