އަންނަ އަހަރުގެ ޖޫން 16 ވަނަ ދުވަހުގެ ކުރިން ބިލު ދައްކާ ފަރާތްތަކުގެ ޖޫރިމަނާ މާފުކުރަނީ
26 ޑިސެމްބަރު 2019 | ބުރާސްފަތި 07:54ގަވާއިދުން ބިލު ނުދައްކާ 13894 ފަރާތެއް ވޭ
އެމްޑަބްލިއުއެސްސީއިން ބެއްވި ޕްރެސްކޮންފަރެންސް
މިހާރު ބިލު ނުދައްކާ ހުރި ފަރާތްތަކުން 16 ޖޫން 2020 ގެ ކުރިން ބިލު ދައްކައިފި ނަމަ އެފަރާތްތަކުގެ ޖޫރިމަނާ މާފު ކުރާނެ ކަމަށް އެމްޑަބްލިއުއެސްސީއިން ބުނެފިއެވެ.
އެމްޑަބްލިއުއެސްސީއިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކުންފުނީގެ މެނޭޖިންގް ޑިރެކްޓަރ އާދަމް އާޒިމް ވިދާޅުވީ މިހާރު ބިލު ނުދައްކާ ހުރި ފަރާތްތަކުގެ ތެރެއިން އަންނަ އަހަރުގެ ޖޫން މަހުގެ 16ގެ ކުރިން، ބިލުގެ ފައިސާގެ އަދަދު ދައްކާ ފަރާތްތަކުގެ ޖޫރިމަނާއަށް އަރާފައިވާ ވަރު މާފުކުރާނެ ކަމަށެވެ.
އާޒިމް ވިދާޅުވީ އޭރަށް އޮންނާނީ އެއްބަސްވުމެއް ކަމަށާއި އެ އެއްބަސްވުންވެސް ހަދައިދޭނީ އެފަރާތަކަށް ލުއިވާ ގޮތަށް ކަމަށެވެ. އާޒިމް ވިދާޅުވީ އެމްޑަބްލިއުއެސްސީން ބާއްވަން ބޭނުންވަނީ ރައްޔިތުންނަށް އެންމެ ލުއިފަސޭހަ ގޮތުގައި ޚިދުމަތް ފޯރުކޮށްދޭ ތަނެއްގެ ގޮތުގައި ކަމަށެވެ. އާޒިމް ވަނީ ބިލު ނުދެއްކޭ ފަރާތްތަކަށް މި ރަނުގެ ފުރުސަތު ބޭނުން ކުރުމަށް ގޮވާލާފައެވެ.
މިގެއިތުރުން މި ނޫސްވެރިންގެ ބައްދަލުވުމުގައި އާޒިމް ވިދާޅުވީ ގަވާއިދުން ބިލު ނުދައްކާ 13894 ފަރާތެއް ވާ ކަމަށެވެ. އަދި އެއްއަހަރަށް ވުރެ ގިނަ ދުވަހު ބިލަށް ފައިސާ ނުދައްކާ 1570 ފަރާތެއްވާއިރު 12 މަސް ބިލަށް ފައިސާ ނުދައްކާ 1700 އަށް ވުރެ ގިނަ ފަރާތެއް ހިމެނޭ ކަމަށެވެ. އަދި 2 މަހަށް ވުރެ ގިނަ ދުވަހު ފައިސާ ނުދެއްކި 4492 ފަރާތެއް ހިމެނޭ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިހާރު އިންޓްރެސްޓް ނަގަމުންދާ ގޮތް ވެސް ބަދަލުލިރެވިފައިވާ ކަމަށެވެ. ކުރިން އެމްޑަބްލިއެސްސީއިން ނަގަމުން ދިޔައީ ކޮމްޕައުންޑް އިންޓްރެސްޓްއެވެ. ނަމަވެސް އެގޮތަށް އިންޓްރެސްޓު ނެގުމުން ޖޫރިމަނާއަށް އަރާވަރު އިތުރުވުމުގެ ސަބަބުން އެ ކުންފުނިންވަނީ ސިމްޕަލް އިންޓްރެސްޓަށް ބަދަލުކޮށްފައެވެ. އާޒިމް ވިދާޅުވީ ދެން 'އިންޓްރެސްޓުގެ މައްޗަށް އިންޓްރެސްޓެއް ނާރާނެ' ކަމަށެވެ.
އާޒިމް ވަނީ ހުރިހާ ފަރާތްތަކަށް ވެސް 16 ޖޫން 2020 ގެ ކުރިން ބިލު ދައްކަވާނެ ގޮތުގެ މައުލޫމާތު ހޯދައި އެ އިންތިޒާމް އެ ކުންފުނި މެދުވެރިކޮށް ހަމަޖެއްސުމަށް އިލްތިމާސްކުރައްވާފައެވެ. އެގޮތުން ބިލުތަކަށް އަރާ އަދަދު އިންސްޓޯލްމެންޓުގެ ގޮތުގައި ދައްކަން ބޭނުންވާނަމަ އެ ކުންފުނީގެ ކައުންޓަރުން އެ އިންތިޒާމް ހަމަޖެހިގެންދާނެ ކަމަށާއި '105' އަށް ގުޅުމުން އިތުރު މައުލޫމާތު ލިބިގެންދާނެ ކަމަށް ވިދާޅުވިއެވެ. އާޒިމް ވިދާޅުވީ އެމްޑަބްލިއުއެސްސީގެ އެޕްލިކޭޝަން މެދުވެރިކޮށްވެސް ބިލަށް ފައިސާ ދެއްކޭނެ ކަމަށެވެ.
