2020 ވަނަ އަހަރުން ފެށިގެން މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން، މައުލޫމާތެއް ނުލިބިގެން އިންފޮމޭޝަން ކޮމިޝަނަރުގެ އޮފީހަށް ހުށަހެޅޭ މައްސަލަތައް ބަލާނީ، އާންމުކޮށް ހުޅުވާލެވިގެން ބާއްވާ އަޑުއެހުމެއްގައި ކަމަށް އިންފޮމޭޝަން ކޮމިޝަނަރުގެ އޮފީހުން ބުނެފި އެވެ.

އިންފޮމޭޝަން ކޮމިޝަނަރުގެ އޮފީހުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އިންފޮމޭޝަން ކޮމިޝަނަރު ހުސައިން ފިޔާޒު މޫސާ ވިދާޅުވީ، އެ އޮފީހުގެ މަސައްކަތްތައް ބައްޓަން ކުރާނީ، ވީހާވެސް ބޮޑަށް ދައުލަތުގެ އިދާރާތަކާއި ސަރުކާރުގެ ކުންފުނިތަކާއި އަދި މައުލޫމާތު ހޯދާ ލިބިގަތުގެ ހައްގުގެ ގާނޫނުގެ ދަށުން މައުލޫމާތު ފޯރުކޮށް ދޭންޖެހޭ މުއައްސަސާތަކުން މައުލޫމާތު ހޯދަން އެދޭ ފަރާތްތަތަކަށް އެ މައުލޫމާތު ހޯދުމުގައި ހުރި ދަތިތައް ނައްތާލާ، ވީހާވެސް ބޮޑަށް ދެފުއްފެންނަ ގޮތަކަށް ކަމަށެވެ.

އެގޮތުން މައުލޫމާތު ހޯދުމަށް އެދި، މައުލޫމާތު ނުލިބިގެން، އިންފޮމޭޝަން ކޮމިޝަނަރުގެ އޮފީހަށް ހުށަހެޅޭ މައްސަލަތައް ބަލާނީ، މައްސަލަ ހުށަހެޅި ފަރާތާއި، ރައްދުވާ ފަރާތް ހާޒިރުކޮށް، އެކޮމިޝަނުގައި ބޭއްވޭ އަޑު އެހުމެއްގަ ކަމަށެވެ. އަދި އެއަޑުއެހުން ކުރިއަށްދާނީ އާންމުކޮށް ހުޅުވާލެވިގެން އެ އޮފީހުގައި ބޭއްވޭ އަޑުއެހުމެއްގަ ކަމަށް ވެސް ފިޔާޒު ވިދާޅުވި އެވެ.

ފިޔާޒު ވިދާޅުވީ، މައުލޫމާތު ނުލިބިގެން، މި ހިނގާ 2019 ވަނަ އަހަރު އެ އޮފީހަށް ޖުމްލަ 42 މައްސަލައެއް ހުށަހެޅިފައިވާ ކަމަށެވެ. އަދި އޭގެ ތެރެއިން 34 މައްސަލަ ނިންމާފައިވާއިރު، 5 މައްސަލައެއް އެ އޮފީހުގައި ކުރިއަށްދާ ކަމަށެވެ. އަދި 3 މައްސަލައެއް ޝަރުއީ ކޯޓުގައި ކުރިއަށްދާ ކަމަށެވެ.

ފިޔާޒު ވިދާޅުވީ މައުލޫމާތު ހޯދާ، ލިބިގަތުގެ ހައްގުގެ ގާނޫނުގެ ދަށުން މައުލޫމާު ފޯރުކޮށްދެންޖެހޭ އޮފީސްތަކުން، ކޮންމެހެން ސިއްރުކުރަންޖެހޭ މައުލޫމާތެއް ފިޔަވާ ފޯރުކޮށްދިނުމަކީ ވަރަށް މުހިއްމު ކަމެއް ކަމަށެވެ.

މީގެއިތުރުން، ފިޔާޒު ވިދާޅުވީ، މައުލޫމާތު ހޯދާ ލިބިގަތުގެ ހައްގުގެ ގާނޫނުގެ ދަށުން ދައުލަތާއި ސަރުކާރުގެ އިދާރާތަކާއި ސަރުކާރުގެ ކުންފުނިތައް އަދި ސިޔާސީ ޕާޓީތަކުގެ ތެރެއިން ދައުލަތުގެ ބަޖެޓުުން ފައިސާ ހަރަދުކުރާ އިދާރާތަކުން، ކޮންމެ އަހަރަކު އެއް ފަހަރު ރިޕޯޓެއް އިންފޮމޭޝަން ކޮމިޝަނަރުގެ އޮފީހަށް ހުށަހަޅަން ޖެހޭ ކަމަށެވެ. ނަމަވެސް އެ ރިޕޯޓް ހުށަހަޅަނީ އެ މުއައްސަސާތަކުގެ ތެރެއިން އެންމެ 12 ޕަސެންޓް ކަމަށާއި 88 ޕަސެންޓްގެ އޮފީސްތަކުން ހުށަނާޅާ ކަމަށެވެ.

ފިޔާޒު ވިދާޅުވީ، އަންނަ ޖެނުއަރީ މަހުގެ ނިޔަލަށް މި ހިނގާ 2019 ވަނަ އަހަރުގެ ރިޕޯޓް ހުށަޅަން ޖެހޭނެ ކަމަށެވެ. ފިޔާޒު ވިދާޅުވީ، އެއީ ރިޕޯޓެކޭ ބުންޏަސް، އެއީ އެ އޮފީހުގެ ފޯމެޓަކަށް ހަދާފައިވާ ފޯމަކުން ހުށަހަޅަންޖެހޭ ރިޕޯޓެއްކަމަށްވާތީ އެ ރިޕޯޓް ހުށަހެޅުމަކީ މާ އުދަނގޫ ކަމަކަށް ނުވާނެ ކަމަށެވެ.