އާންމުކޮށް ފެތުރޭ ބަލިތަކުގެ ތެރެއިން އެންމެ ނުރައްކާތެރީ ޑެންގީއާ އިންފުލުއެންޒާ: އެޗްޕީއޭ
ޑެންގީއާ އިންފުލުއެންޒާ ޖެހޭ މީހުންގެ ނިސްބަތް އިތުރު
އެޕިޑިމިއޮލޮޖިސްޓް ޑރ.އިބްރާހިމް އަފްޒަލް
ގައިންގަޔަށް އަރާ ބަލިތަކާއި އާންމު ގޮތެއްގައި ފެތުރެމުންދާ ބަލިތަކުގެ ތެރެއިން އެންމެ ނުރައްކާތެރިކަން ބޮޑީ ޑެންގީއާ އިންފުލުއެންޒާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އެޗްޕީއޭގެ އެޕިޑަމޮއޮލޮޖިސްޓް ޑރ.އިބްރާހިމް އަފްޒަލް ވިދާޅުވީ ބައްޔެއްގެ ސީރިއަސް ކަމަށް ބަލާއިރު ބަލަނީ ދެކަމަކަށް ކަމަށެވެ. އެއްކަމަކީ ބަލިޖެހޭ މީހުންގެ ނިސްބަތާއި، ބަލިން މީހުންގެ ފުރާނައަށް ނުރައްކާވޭތޯ ކަމަށެވެ. އެގޮތުން މިހާތަނަށް މޫސުމާއެކު ފެތުރެމުންދާ ބަލިތަކުން އެންމެ ނުރައްކާތެރި ބައްޔަކަށް ފާހަގަކުރެވިފައިވަނީ ޑެންގީއާއި އިންފުލުއެންޒާ ކަމަށް ޑރ.އަފްޒަލް ވިދާޅުވިއެވެ.
ޑރ.އަފްޒަލް ވިދާޅުވީ ޚާއްސަކޮށް ޑެންގީ އަދި އިންފުލުއެންޒާ އަދި މިނޫނަސް ގައިންގަޔަށް އަރާ ބައްޔަކުން މީހަކު މަރުވެއްޖަނަމަ ނުވަތަ ހާލަތު މާބޮޑަށް ސީރިއަސް ވެއްޖެ ނަމަ އެކޭސްއެއް ޑޮކްޓަރުންގެ ޕެނަލްއަކުން ބަލާނެ ކަމަށެވެ. އެބަލި މީހާ ފުރަތަމަ ޑޮކްޓަރަށް ދައްކަން އައި ދުވަހާއެކު މުޅި ޕްރޮސަސް ބަލާ ކަމަށް ޑރ.އަފްޒަލް ވިދާޅުވިއެވެ. އަދި ވަކި ގޮތަކަށް ކޭސް ނިންމާނީ އިހުމާލެއްވޭތޯއާ ވަރަށް ރަނގަޅަށް ބެލުމަށް ކަމަށެވެ.
ޑރ.އަފްޒަލް ވިދާޅުވީ ޑެންގީއާ އިންފުލުއެންޒާ ބައެއް އަތޮޅުތަކުގަ ކެނޑިނޭޅި ކޮންމެ އަހަރަކު ވެސް އިތުރުވަމުންދާ ކަމަށެވެ. އެހެންކަމުން އެރަށްތަކަށް ޚާއްސަ ދަތުރުތައް ކުރެވި މޮނިޓަރ ކުރަމުންދާ ކަމަށް ޑރ.އަފްޒަލް ވިދާޅުވިއެވެ.
މިފަދަ ބަލިތައް ކޮންޓްރޯލް ކުރުމަށް އެންމެހާ ރައްޔިތުންގެ އެއްބާރުލުން ބޭނުންވާކަން ފާހަގަކުރައްވައި ޑރ.އަފްޒަލް ވިދާޅުވީ މަދިރި އުފެދި އާލާވާތަންތަން ނައްތާލަންޖެހޭ ކަމަށާއި، މަދިރިން ރައްކާތެރިވާންޖެހޭ ކަމަށެވެ. އަދި ވިދާޅުވީ މަދިރި އާލާވާތަންތަން ސާފުކުރާއިރު، އެކަމަށް ޚާއްސަ ސަމާލުކަމެއްދީގެން ސާފުކުރަންޖެހޭ ކަމަށާއި، އޭގެން ރައްކާތެރިވުމަށް ހުރިހާ ފިޔަވަޅެއް އަޅާނެ ކަމަށެވެ.
އިންފުލުއެންޒާއިން ރައްކާތެރިވުމުގެ ގޮތުން ވެކްސިން ޖެހުމަށް ވެސް އެޗްޕީއޭއިން ވަނީ އިލްތިމާސްކޮށްފައެވެ.
