އިންސާނީ ވަގުފާރިއަށް ތުހުމަތުކުރެވޭ 3 މައްސަލައެއް ފުލުހުންނަށް ހުށަހަޅައިފި
25 ޑިސެމްބަރު 2019 | ބުދަ 18:173 މައްސަލައެއް ތަހުގީގުކުރުމަށް ވަނީ ހުށަހަޅާފައި
އިމިގްރޭޝަން
އިންސާނީ ވަގުފާރިއަށް ތުހުމަތުކުރެވޭ 3 މައްސަލައެއް ތަހުޤީގު ކުރުމަށްޓަކައި މޯލްޑިވިސް އިމިގްރޭޝަނުން ފުލުހުންނަށް ހުށަހަޅައިފިއެވެ.
މީޑިއާތަކަށް މައުލުމަތު ހިއްސާކުރަމުން ބުދަ ދުވަހު އިމިގްރޭޝަނުން ބުނެފައިވަނީ، އިންސާނީ ވަގުފާރިއަށް މަގުފަހިވާގޮތަށް ގިނަ މަސްރޫޢުތަކަކަށް ބިދޭސީ މަސައްކަތްތެރިން ގެނައުމުގައި މަކަރުވެރި ޢަމަލު ހިންގާ އަދި ސައްޙަ ނޫން ލިޔެކިއުން ހުށަހަޅާފައިވާކަމަށް ތުހުމަތު ކުރެވިގެން 3 ކުންފުންޏެއްގެ މައްސަލަ ތަހުޤީގު ކުރުމަށްޓަކައި 11 ޑިސެމްބަރ 2019 ގައި މޯލްޑިވްސް އިމިގްރޭޝަނުން މޯލްޑިވްސް ޕޮލިސް ސާރވިސް އަށް ހުށަހަޅައިފައިވާކަމަށެވެ.
އިމިގްރޭޝަނުން ބުނެފައިވަނީ މިމައްސަލަތައް ތަހުޤީގު ކުރުމަށްޓަކައި މޯލްޑިވްސް ޕޮލިސް ސާރވިސް އަށް ފޮނުވުނީ، މައްސަލަތަކާއި ގުޅިގެން ކުރެވިފައިވާ މުޢާމަލާތްތަކާއި، މިމައްސަލަތަކުގައި ޝާމިލުވާކަމަށް ތުހުމަތުކުރެވޭ ފަރާތްތަކުގެ އެންމެހާ މަޢުލޫމާތުތަކާއި އެކުގައިކަމަށާއި މ މައްސަލަތަކުގެ ތަހުޤީގު ނިމެންދެން މި ތިން ކުންފުނީގެ ޙިއްސާދާރުންނާއި، މިމައްސަލަތަކާއި ގުޅުންހުރި އެންމެހާ ފަރާތްތަކަށް އިމިގްރޭޝަނުން ފޯރުކޮށްދެމުންދިޔަ ބިދޭސީންނާއި ގުޅުންހުރި އެންމެހާ ޚިދުމަތްތަކެއް މެދު ކަނޑާލާފައިވާކަމަށެވެ.
މި 3 މައްސަލައާއިއެކު، އިންސާނީ ވަގުފާރިއަށް މަގުފަހިވާގޮތަށް ބިދޭސީ މަސައްކަތްތެރިން ގެނައުމުގައި ޢަމަލުކޮށްފައިވާކަމަށް ތުހުމަތުކުރެވޭ ޖުމްލަ 27 މައްސަލަ، އިމިގްރޭޝަނުން ތަހުޤީގު ކުރުމަށްޓަކައި ފުލުހުންނަށް ވަނީ ހުށަހަޅާފައެވެ. އިންސާނީ ވަގުފާރިއަށް ހުޅުވިފައިވާ ދޮރުތައް ބަންދުކުރުމަށްޓަކައި ކަމާއިގުޅުންހުރި މުއައްސަސާތަކާއި ގުޅިގެން އިމިގްރޭޝަނުން އަބަދުވެސް މަސައްކަތްކުރާނެކަމުގެ ޔަޤީންކަން އެންމެހާ ފަރާތްތަކަށް އަރުވާކަމަށްވެސް އެފަރާތްތަކުން ވަނި ބުނެފައެވެ.
