މަޖިލީހަކީ 'ރަބަރު ސްޓޭމްޕް' ޖަހާ ތަނެއް ނޫން، ވަޒީރުންނަށް ފުރިހަމަ އިތުބާރު އެބައޮތް: ހޫދު
25 ޑިސެމްބަރު 2019 | ބުދަ 07:59ރައީސްގެ ފުރިހަމަ އިތުބާރު އޮތް ކަމަށް ވިދާޅުވި
ވަޒީރުންގެ ކެބިނެޓް
ރައްޔިތުންގެ މަޖިލީހަކީ 'ރަބަރު ސްޓޭމްޕް' ޖަހާ ތަނެއް ނޫން ކަމަށާއި ވަޒީރުންނަށް ވެސް ފުރިހަމަ އިތުބާރު އެބައޮތް ކަމަށް ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވެއްޖެއެވެ.
ބުދަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހޫދު ވިދާޅުވީ މަޖިލީހުން ކުރަމުންގެންދަވާ މަސައްކަތާއި މެދު ފަޚުރުވެރިވާ ކަމަށެވެ. އަދި ވަޒީރުންނާ މެދު ސަރުކާރުގެ ފުރިހަމަ އިތުބާރު އޮތް ކަން ހޫދު ހާމަކުރެއްވިއެވެ.
ހޫދު މިހެން ވިދާޅުވެފައިވާއިރު އިސްލާމިކް މިނިސްޓަރު ޑރ. އަޙްމަދު ޒާހިރުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހަޅުއްވާނެ ކަމަށް ސަރުކާރު ހިންގާ މައި ޕާޓީ އެމްޑީޕީއަށް ނިޞްބަތްވާ، ބިލަތްދޫ ދާއިރާގެ މެންބަރު އަޙްމަދު ހަލީމް (ދޮންބިލެއް) ވަނީ ވިދާޅުވެފައެވެ. އަދި މިނިސްޓަރުގެ އިތުބާރު ނެތް ކަމުގެ މައްސަލަ ހުށަހެޅުމަށް ނިންމެވީ ހަރުކަށި ފިކުރާއި ދެކޮޅަށް މަސައްކަތް ކުރަމުންގެންދާ ޝައިޚުންނާ ދެކޮޅަށް މިނިސްޓަރ މަސައްކަތް ކުރައްވަމުން ގެންދަވާތީ ކަމަށް މެންބަރު ވިދާޅުވެފައިވެއެވެ.
އަދި މަޖިލީހުގެ މަސައްކަތްތަކަށް ބަލާލާއިރު 28 ފަހަރު ވަޒީރުންނާއި ސުވާލުކޮށްފައިވެއެވެ. ވަޒީރުންނާއި ސުވާލު ކުރުމަށް ޖުމްލަ 46 ސުވާލު ހުށަހަޅާފައިވެއެވެ.
