ދޯންޏެއް ބަންޑުންޖަހާލައިގެން އުޅެނިކޮށް ޓީއެމްއޭގެ ސީޕްލޭނަކަށް ފެނިގެން އެކަން އެމްއެންޑީއެފަށް ރިޕޯޓް ކޮށްފި އެވެ.
އެމްއެންޑީއެފުން ބުނީ "ކަނޑުރޯދި" ނަމަކަށްކިޔާ އެދޯނި ބަންޑުން ޖަހާލުމާއި ގުޅިގެން އެމްއެންޑީއެފްގެ ކޯސްޓްގާޑު ޝިޕް ހުރަވީ އެ ސަރަހައްދަށް ދިއުމަށް ދަތުރުކުރަމުންދާ ކަމަށެވެ.
މައުލޫމާތު ލިބިފައިވާގޮތުގައި އެދޯނި ބަންޑުން ޖަހާލާފައިވަނީ އދ. ހަންޏާމީދޫ ކަރިއަށެވެ.
މޫސުމާބެހޭ ގައުމީ އިދާރާ މޯލްޑިވްސް މީޓިއޮލޮޖިކަލް ސާރވިސް (މެޓް އޮފީސް)އިންނާއި އެމްއެންޑީއެފުން ވަނީ މޫސުމަށް ސަމާލުވުމަށް އިލްތިމާސްކޮށްފަ އެވެ. ހާއްސަކޮށް ކަނޑު ދަތުރުފަތުކުރާ ފަރާތްތައް ކޮންމެހެން ކުރަންޖެހޭ ދަތުރުތައް ފިޔަވާ އެހެނިހެން ދަތުރުތައް ނުދިއުމަށް ވަނީ އިލްތިމާސް ކޮށްފަ އެވެ.
މިހާދިިސާއާ ގުޅިގެން ލިބެމުންދާ އިތުރު މައުލޫމާތު:
14:00: އެމްއެންޑީއެފުން ބުނީ ކަނޑުރޯދި ދޯނީގައި 10 މީހުން ތިބި ކަމަށާއި އެ ހުރިހާ އެންމެން އދ. އޮމަދޫއަށް ގެންގޮސްފައިވާ ކަމަށެވެ.
އެމްއެންޑީއެފުން ބުނީ އެ ދޯނި ވަނީ އެސަރަހައްދަށް އަޑިއަށްގޮސްފައި ކަމަށާއި އެ ދޯނި ހޯދުމަށް އެސަރަހައްދުގައި އެމްއެންޑީއެފުން ހަރަކަތްތެރި ވަމުންދާ ކަމަށެވެ.
