މާލޭ ވިޔަފާރި ބަނދަރުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން އެމްޕީއެލް އިން "ސޭފްޓީ ވީކް" ގެ ނަމުގައި ޙަރަކާތެއް ފަށައިފިއެވެ.

ސޭފްޓީ ވީކް ފަށާފައިވަނީ އެކަމަށްޓަކައި މާލޭ ވިޔަފާރި ބަނދަރުގައި ބޭއްވި ރަސްމިއްޔާތުގައެވެ.

ބުދަ ދުވަހުން ފެށިގެން އަންނަ ހޯމަ ދުވަހުގެ ނިޔަލަށް ކުރިއަށް ގެންދިޔުމަށް ހަމަޖެހިފައިވާ އެ ޙަރަކާތަކީ މަސައްކަތުގެ މާޙައުލުގައި ރައްކާތެރިކަމާ ގުޅޭ ގޮތުން ހޭލުންތެރިކޮށް ރައްކާތެރިކަމަށް ބަލާ ޘަޤާފަތެއް ދެމެހެއްޓުމަށް ފެށި ޙަރަކާތެކެވެ.

މި ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުން އެމްޕީއެލްގެ ސީއީއޯ ޝާހިދު ޢަލީ ވިދާޅުވީ، ކޮންމެ ތަނެއްގައި ވެސް އަދި ކޮންމެ ބަނދަރެއްގައި ވެސް ސަލާމަތާއި ރައްކާތެރިކަމުގެ ގޮތުން ކޮންމެ މުޢައްސަސާއެއްގައި ވެސް ސަލާމަތާއި ރައްކާތެރިކަމުގެ ޘަޤާފަތެއް ޤާއިމު ކުރަންޖެހޭ ކަމަށެވެ. އަދި ކަމާގުޅެ ގިނަ ޤަވައިދުތަކެއް ވުޖޫދުކުރެވިފައިވީ ނަމަވެސް، ޤަވާއިދަށް ޢަމަލުކުރަން ތިބޭ ފަރާތްތަކުން އެޤަވައިދު ވާ ކަންކަން ޤަބޫލުކުރާކަމުގައި ނުވާނަމަ އެކަށީގެންވާގޮތުގައި އެ ޤަވާއިދުތައް ތަންފީޒު ނުކުރެވޭނެކަމަށެވެ.

ޝާހިދު ވިދާޅުވީ އެއް ހަފުތާއަށް ކުރިއަށް ގެންދާ ސޭފްޓީ ވީކްގެ ބޭނުމަކީ ސަލާމަތުގެ ހޭލުންތެރިކަން އިތުރުކުރުމާއި ރައްކާތެރިކަމާ ގުޅޭ ގޮތުން ދެކޭގޮތް ބަދަލުކުރުން ކަމަށެވެ. އަދި އަހަރުގެ އެންމެ ފަހު ހަފުތާގައި މި ޙަރަކާތް ބޭއްވުމުގެ ބޭނުމަކީ، ސަލާމަތާއި ރައްކާތެރިކަމާ ގުޅޭ ކަންތައް މި ހިނގާ އަހަރު ކުރިއަށް ދިޔަ ގޮތް ބަލައި، ރަނގަޅުކުރަން ޖެހޭ ކަންކަން ދެނެގަނެ، އަންނަ އަހަރަށް ސަލާމަތީ ކަންތައްތައް ވަރުގަދަ ކުރުމަށް ސަލާމަތާއި ރައްކާތެރިކަމުގެ ފިޔަވަޅު ވަރުގަދަކުރުންކަމަށެވެ.

ސޭފްޓީ ވީކްގެ ޙަރަކާތްތައް ފެށުމުގެ ގޮތުން ރައްކާތެރިކަމާ ގުޅޭ ގޮތުން ޚާއްޞަ ލަވައެއް ވެސް އެމްޕީއެލް އިން ވަނީ ތަޢާރަފުކޮށްފައެވެ. އަދި ސޭފްޓީ ވީކްގެ ޚާއްޞަ ލޯގޯ އެއްވެސް ވަނީ ތަޢާރަފުކޮށްފައެވެ.