ޔޫވީ އާއި ދެކޮޅަށް ނިކުންނަ މެޗު ފަސޭހައެއް ނުވާނެ: މޯހަން
24 ޑިސެމްބަރު 2019 | އަންގާރަ 14:53ޔުނައިޓެޑް ވިކްޓްރީއަކީ ރަނގަޅަށް ޕްރެކްޓިސް ކުރަމުން އަންނަ ޓީމެއް
ކްލަބް އީގަލްސްގެ ކޯޗު މޯހަން
ދިރާގު ދިވެހި ލީގުގައި ޔުނައިޓެޑް ވިކްޓްރީ އާއި ދެކޮޅަށް ނިކުންނަ މެޗު ފަސޭހަ ނުވާނެކަމަށް ކްލަބް އީގަލްސްގެ ކޯޗު މުހައްމަދު ޝިޔާޒް (މޯހަން) ބުނެފިއެވެ.
އެފްއޭއެމް ހައުސްގައި އޮތް ޕްރި މެޗު ޕްރެސް ކޮންފަރެންސްގައި ވާހަކަދައްކަމުން މޯހަން ބުނީ މިވަގުތު އީގަލްސް އޮތީ އެންމެ އެކަށޭނެ ހާލަތެއްގައި ނޫންކަމަށާއި އީގަލްސްގެ ސްކޮޑުގައި އަނިޔާގެ މައްސަލަތަކާއި ސަސްޕެންޝަނުގެ މައްސަލަ އުޅޭކަމަށެވެ.
ޔުނައިޓެޑް ވިކްޓްރީއަކީ ރަނގަޅަށް ޕްރެކްޓިސް ކުރަމުން އަންނަ ޓީމެއް ކަމަށް ބުނަމުން މޯހަން ބުނީ ނިމިދިޔަ ދެމެޗުން އެޓީމު ބަލިވިކަމުގައި ވިޔަސް އެޓީމު މި މެޗަށް ނިކުންނާނީ ވަރުގަދަކޮށް ކަމަށެވެ.
ޓީމުތައް މިވަގުތު އޮތް ހާލަތު އެންމެންއަށްވެސް އިނގޭ ކަމަށާއި އެކަމާ ވިއްދައި އެފްއޭއެމް އަށް ފާޑު ކިޔުމަކުން އަދި ހައްލު ނުފެންނާނެ ކަމަށާއި ހައްލު ހޯދަން އެންމެން އެއްވެގެން މަސައްކަތްކުރަން ޖެހޭ ކަމަށް މޯހަން ބުންޏެވެ. މީގެއިތުރުން މޯހަން ބުނީ ގިނަ ކޯޗުން ކިޔައިފައިވަނީ ވަރަށް ހަރުދަނާ ފާޑު ކިޔުންތަކެއް ކަމަށާއި ނަމަވެސް ހައްލު ފެންނާނީ އެންމެން އެއްވެ އެއް މޭޒަކަށް އައިސް ހައްލު ހޯދަން މަސައްކަތްކުރުމުން ކަމަށް މޯހަން ބުންޏެވެ. އީގަލްސްއަށް އޮތް އެންމެ ބޮޑު ގޮންޖެހުމަކީ މިސީޒަނުގައި ކުރިޔަށް ވާންޖެހެނީ ކޮން ގޮތެއްކަން ނޭނގުން ކަމަށާއި އެހެންކަމުން ކުޅުންތެރިން ތައްޔާރުކުރުމަކީ ފަސޭހަ ކަމެއް ނޫން ކަމަށާއި އަދި ކުޅުންތެރިން މޯޓިވޭޓް ކުރެވޭނެ ގޮތެއް ނެތް ކަމަށް މޯހަން ބުންޏެވެ.
ކްލަބް އީގަލްސް މިވަގުތު އޮތީ ލީގު ތާވަލުގެ ހަތަރުވަނައިގައި ލިބުނު 21 ޕޮއިންޓާއި އެކުގައެވެ. އެއްވަނައިގައި އޮތް މާޒިޔާއަށް 35 ޕޮއިންޓް ލިބިފައިވާއިރު ދެވަނައިގައި އޮތް ކްލަބް ގްރީން ސްޓްރީޓްސް އަށް ލިބިފައިވަނީ 23 ޕޮއިންޓެވެ. އަދި ތިންވަނައިގައި އޮތް ޓީސީ އަށް ލިބިފައިވަނީ 22 ޕޮއިންޓެވެ.
