ޕޮގްބާއަކީ ދުނިޔޭގައި މިވަގުތުހުރި އެންމެ މޮޅު މިޑްފިލްޑަރ: ސޮލްޝަޔާ

މެންޗެސްޓާ ޔުނައިޓެޑްއަށް ކުޅެމުންއަންނަ ފްރާންސްގެ މިޑްފިލްޑަރ ޕައުލް ޕޮގްބާއަކީ މިވަގުތު ދުނިޔޭގައި ހުރި އެންމެ މޮޅު މިޑްފިލްޑަރު ކަމަށް މެންޗެސްޓާ ޔުނައިޓެޑްގެ ކޯޗު އޮލެ ގަނަރ ސޯލްޝަޔާ ބުނެފިއެވެ.

ވެޓްފާރޑް އަތުން މެންޗެސްޓާ ޔުނައިޓެޑް 2-0 ގެ ނަތީޖާ އަކުން ބަލިވި މެޗަށްފަހު މީޑިއާގައި ޕްގްބާ މި ސީޒަނަށްފަހު ޔުނައިޓެޑް ދޫކޮށްލާނެ ކަމުގެ އަޑު ގަދަވުމާއި ގުޅިގެން ޔުނައިޓެޑްގެ ކޯޗު ސޯލްޝަޔާ ބުނީ މީޑިއާގައި ދެކެވޭ ވާހަކަތަކާއި މެދު އޭނާ ނުވިސްނާ ކަމަށާއި އޭނާގެ ސްކޮޑްގައި ހުރި އެންމެ މުހިންމު ކުޅުންތެރިޔަކީ މިވަގުތު ދުނިޔޭގައި ހުރި އެންމެ މޮޅު މިޑްފިލްޑަރ (ޕޮގްބާ) ކަމަށެވެ.

ޕޮގްބާ މިވަގުތުހުރީ އެންމެ އެކަށޭނެ ފޯމެއްގައި ނޫންކަމަށް ބުނަމުން ސޯލްޝަޔާ ބުނީ ނިއުކާސްޓަލް އާއި ދެކޮޅަށް ޔުނައިޓެޑް ނިކުންނަ މެޗުގައި އޭނާ ނުފެނިދާނެ ކަމަށާއި ނަމަވެސް އޭނާ އެބުރި ފޯމަށް އެޅުމުން ޕޮގްބާއަކީ ޔުނައިޓެޑްގެ ފުރަތަމަ އެގާރައިން ޖާގަ ކަށަވަރުކުރާނެ ކުޅުންތެރިއެއް ކަމަށެވެ.

ސޯލްޝަޔާ އިތުރަށް ބުނީ ޕޮގަބާއަކީ ކޮންމެ މަގާމަކަށްވެސް ކުޅުމުގެ ގާބިލްކަން ލިބިފައިވާ ކުޅުންތެރިއެއް ކަމަށާއި އޭނާ އަކީ ކޮންމެ ވަގުތެއްގައިވެސް ނަތީޖާ ނެރެވޭނެ ކުޅުންތެރިއެއް ކަމަށެވެ. މީގެ އިތުރުން ސޯލްޝަޔާ ބުނީ ޕޮގްބާ ދަނޑުމަތީގައި ހުރުން އެއީ ޒުވާން ކުޅުންތެރިންނަށް ލިބިގެންދާ ހިތްވަރެއް ކަމަށާއި އޭނާ އަކީ ދަނޑުމަތީގައި ޒުވާން ކުޅުންތެރިންނަށް ނަމޫނާ ކުޅުންތެރިއެއް ކަމަށެވެ.

މި ސީޒަނުގައި ޔުނައިޓެޑުން ނެރެމުންދަނީދަށް ނަތީޖާ ތަކެކެވެ. ޔުނައިޓެޑް މިވަގުތު އޮތީ ލީގު ތާވަލުގެ 8 ވަނައިގައި ލިބުނު 25 ޕޮއިންޓާއިއެކުގައެވެ. ލީގުތާވަލުގެ އެއްވަނައިގައި އޮތް ލިވަރޕޫލަށް 49 ޕޮއިންޓް ލިބިފައިވާއިރު ލެސްޓާ ސިޓީއަށް ލިބިފައިވަނީ 39 ޕޮއިންޓެވެ. އަދި ތިންވަނައިގައި އޮތް ސިޓީއަށް ލިބިފައިވަނީ 38 ޕޮއިންޓެވެ.