ޚަޝޯގީގެ މަރާއި ގުޅިގެން 5 މީހަކަށް މަރުގެ ހުކުމްކޮށްފި
23 ޑިސެމްބަރު 2019 | ހޯމަ 10:45ޚަޝޯގީ މަރާލީ މިދިޔަ އޮކްޓޯބަރ 2 ގައި
ޖަމާލް ޚަޝޯޤީ
ތުރުކީވިލާތުގެ އިސްތަންބޫލުގަ ހުންނަ ސަޢުދީ ޢަރައްބިއްޔާގެ ކޮންސިއުލޭޓްގެ ތެރޭގައި މަރާލި ސަޢޫދީ ނޫސްވެރިއެއްކަމަށްވާ ޖަމާލް ޚަޝޯޤީގެ މަރުގެ މައްސަލައިގަ 5 މީހަކަށް މަރުގެ ހުކުމް ކޮށްފިއެވެ.
ސައުދީ އަރަބިއްޔާގެ ޕަބްލިކް ޕްރޮސެކިއުޓަރއާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯޓުކޮށްފައިވާ ގޮތުގައި އޭނާގެ މަރާއި ގުޅިގެން 5 މީހަކަށް މަރުގެ ޙުކުމް ކޮށްފައިވާ ކަމަށާއި އިތުރު 3 މީހަކަށް 24 އަހަރުގެ ޖަލު ޙުކުމެއް އިއްވާފައިވާ ކަމަށެވެ.
ސަޢުދީ ޢަރަބިއްޔާގެ ކޮންސަލްޓެންޓެއް ކަމަށްވާ ކުރީގެ ރޯޔަލް ކޯޓުގެ އެޑްވައިޒަރެއް ކަމަށްވާ ސަޢުދު އަލް ޢައްޘާނީގެ މައްޗަށް ޚަޝޯގީގެ މަރާއި ގުޅިގެން ތަހުޤީޤެއް ހިންގުނު ނަމަވެސް އޭނާގެ މައްޗަށް އެއްވެސް ކަހަލަ ޙުކުމެއް އިއްވާފައެއް ނުވެއެވެ. އަދި ސަޢުދީގެ ކުރީގެ ޖާސޫސީ އިދާރާގެ އިސްވެރިޔާގެ ނައިބު އަޙްމަދު އަލް އަސީރީ ވެސް ވަނީ އޭނާގެ މައްޗަށް ހެކި ނުލިބުމުގެ ސަބަބުން ދޫކޮށްލާފައެވެ. ސައުދީ އަރަބިއްޔާއިން ފަހުންވަނީ އޭނާ މަގާމުންވެސް ދުރުކޮށްފައެވެ.
އދގެ ސަލާމަތީ މަޖިލީހުގެ މެންބަރު 5 ޤައުމަށާއި އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކަށް ޝަރީޢަތް ކުރިއަށްދާ ގޮތް ބެލުމުގެ ފުރުޞަތު ސަޢުދީ ސަރުކާރުން ދީފައިވެއެވެ. ސަޢުދީގެ ވެރިއެއްގެ ޙައިޞިއްޔަތުން ޚަޝޯޤީގެ މަރުގެ ޒިންމާ ނަންގަވާކަމަށާއި، އެހެންނަމަވެސް އެ ޢަމަލު ހިންގަން އެއްވެސް އިރުޝާދެއް ދެއްވާފައިނުވާނެކަމަށް ދާދިފަހުން އަމީރު މުޙައްމަދު ބިން ސަލްމާން ވިދާޅުވެފައިވެއެވެ.
ވަރަށް އަނިޔާވެރި ގޮތަކަށް ޖަމާލް ޚަޝޯގީ މަރާލާފައިވަނީ، ތުރުކީގެ އިސްތަމްބޫލްގައި ހުންނަ ސައުދީ ކޮންސިއުލޭޓަށް ޚިދުމަތެއް ހޯދަން އެތާނގެ ތެރޭގަ ހުއްޓާ، މިދިޔަ އަހަރުގެ އޮކްޓޫބަރުމަހުގެ 2 ވަނަ ދުވަހުއެވެ. އޭނާ މަރާލީ، ސައުދީ އޭޖެންޓުންގެ 15 މެންބަރުންގެ ގްރޫޕަކުން ކަމަށް މަޢޫލޫމާތު ލިބެއެވެ. ޖަމާލުގެ މަރުގެ ޝަރީޢަތް ސައުދީ ސަރުކާރުން ކުރިޔަށްގެންދިޔައީ ވަރަށް ސިއްރިއްޔާތުގައެވެ.
