ސްޓޫޑެންޓް އޮފް ދަ އިޔަރއިން މަޝްހޫރުވި ވަރުންގެ ކައިވެނި އަންނަ އަހަރުގެ އެޕްރީލްގައި!

ބޮލީވުޑްގެ އެންމެ މަޝްހޫރު އެއް ފިލްމުކަމަށް ވާ "ސްޓޫޑެންޓް އޮފްދަ އިޔަރ" އިން އާންމުންގެ މެދުގައި ބޮޑު މަގުބޫލުކަމެއް ހޯދި ވަރުން ދަވަންގެ ކައިވެނި އަންނަ އަހަރުގެ އެޕްރީލްމަހު ކުރުމަށް ތައްޔާރުވަމުން އަންނަކަމުގެ ހަބަރުތައް ފެތުރެން ފަށައިފިއެވެ.

ބޮލީވުޑްގެ ހަބަރުތައް ބުނާގޮތުން ވަރުން 32، އާއި އެނާގެ ލޯބިވެރިޔާ ނަތާޝާ ދަލާލް 30، ކައިވެނިކުރާނެ ކަމަށް ބެލެވެނީ އެޕްރީލް މަހުގެ ފަހުކޮޅު ނުވަތަ މެއި މަހުގެ ކުރީކޮޅުގައެވެ. އަދި އެކަމަށް ދެ ފަރާތުގެ އާއިލާ އިން މިހާރު ތައްޔާރީތައް ވަމުން އަންނަ ކަމަށްވެއެވެ.

މީގެ ކުރިން މިއަހަރު ފަހުކޮޅު އެ ދެމީހުން ކައިވެނި ކުރާނެ ކަމަށް ހަބަރުތައް ފެތުރުނެވެ. ނަމަވެސް ވަރުންގެ ބައްޕަ ވަނީ އެ ވާހަކަތައް ދޮގުކޮށްފައެވެ.

ވަރުންއާއި ނަތާޝާ އަކީ ކުޑަ އިރުއްސުރެ އެކުގައި އުޅެ ބޮޑުވި ރަށްޓެހިންނެވެ. އަދި އެ ދެމީހުންގެ ދެމެދުގައި ލޯބީގެ ގުޅުމެއް އުފެދި އެވާހަކަތައް ހަބަރުތަކަށް އަރަން ފެށި އިރު ހެލޯ އިންޑިއާގެ މެގަޒިން އަކަށް ދިން އިންޓަވިއުއެއްގައި ނަތާޝާ ވަނީ އެ ދެމީހުންގެ ލޯބީގެ ވާހަކަ ހިއްސާ ކޮށްފައެވެ. އަދި ރަށްޓެހިންގެ ގޮތުގައި އެތަކެއް އަހަރުތަކެއް ވަންދެން ތިބުމަށްފަހު ދެމީހުން ލޯބީގެ ގޮތުން ގުޅުނު ކަމާއި ކައިވެނީގެ ކަންކަން ވެސް ރާވަމުންދާ ކަމަށް ނަތާޝާ ވަނީ ހާމަކޮށްފައެވެ.