ގާސިމް މަރާލި މައްސަލައިގައި ހައްޔަރުކުރި މީހާ އެކަމަށް އިއުތިރާފްވެއްޖެ
ގާސިމް މަރާލި މައްސަލައިގައި މީހަކު ހައްޔަރުކުރީ ބުރާސްފަތި ދުވަހު
ގާސިމް ހަސަން
ގާސިމްގެ މަރާއި ގުޅިގެން ހައްޔަރުކުރި މީހާ އެކަމަށް އިއުތިރާފްވެއްޖެ ކަމަށް ފުލުހުން ހާމަކޮށްފި އެވެ.
މި މައްސަލައާއި ގުޅިގެން ފިރިހެނަކު ހައްޔަރުކޮށްފައިވަނީ، ބުރާސްފަތި ދުވަހުގައެވެ. އަދި އޭނާގެ އިނގިލީގެ ނިޝާނާއި، ގާސިމް މަރާލަން ބޭނުންކުރި ހަތިޔާރުން ފެނުނު އިނގިލީގެ ނިޝާނާ ދިމާވެފައިވާ ކަމަށް ވަނީ މައުލޫމާތު ލިބިފައެވެ.
ހައްޔަރުކުރި މީހާ އިއުތިރާފްވެފައިވާކަން ހާމަކުރައްވާ ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓްގައި ވިދާޅުވީ، އޭނާ ފުލުހުންގެ ތަހުގީގަށް އެއްބާރުލުން ދެމުން އަންނަ ކަމަށެވެ. އަދި އޭނާގެ ބަންދުގެ މުއްދަތު އިތުރުކުރަން ކްރިމިނަލް ކޯޓަށް ހާޒިރުކުރުމުން، އެ ކޯޓުން ވަނީ އޭނާގެ ބަންދަށް އިތުރު 15 ދުވަސް ޖަހައިދީފައެވެ.
އޭގެ އިތުރުން، ހަމަލާދިން ދުވަހުގެރޭ އޭނާ ލައިގެން ހުރި އަންނައުނުވެސް މިހާރު ހޯދިފައިވާކަމަށް ފުލުހުން ބުނެފައިވެއެވެ. އެރޭ އޭނާ ލައިގެން ހުރި އަންނައުނުތައް ހުރީ، ހަމަލާދިން ސަރަހައްދު ކައިރީގައި ހުންނަ ކޮންސްޓްރަކްޝަން ސައިޓެއްގައެވެ. އަދި ލިބިފައިވާ ފޮރެންސިކް ހެކިތަކާއި އިތުރު ހެކިތަކާއި އިތުރަށް ދިރާސާކުރަމުން އަންނަކަމަށް ކޮމިޝަނަރ ހަމީދު ވިދާޅުވެފައިވެއެވެ.
ގާސިމް މަރާލި މައްސަލައިގެ ތަހުގީގު ކުރިއަށް ގޮސްފައިވާ ހިސާބާއި ގުޅޭ އެންމެ ފަހުގެ މައުލޫމާތު، އަންނަ ހަފްތާގެ ކުރީކޮޅު ބާއްވާ ނޫސްވެރިންގެ ބައްދަލުވުމެއްގައި ހާމަކުރައްވާނެ ކަމަށްވެސް ކޮމިޝަނަރ ހަމީދު ވިދާޅުވިއެވެ.
ރަހުމްކުޑަގޮތަކަށް ވަޅިން ހަމަލާދީ، ގާސިމް މަރާލާފައި އޮތްވާ ފެނިފައިވަނީ ޑިސެމްބަރު މަހުގެ ހަތަރުވަނަ ދުވަހުގެ ރޭގަނޑުގެ ވަގުތެއްގައި ހުޅުމާލެއިންނެވެ. ގާސިމް މަރުވެފައިވަނީ، ގާތިލް އޭނާގެ ކަރަށް ވަޅި ހެރުމާ ގުޅިގެންނެވެ. ސީނުގައި ހަރަކާތްތެރިވި ބައެއް ފުލުހުންގެ ފަރާތުން ލިބިފައިވާ މައުލޫމާތުތަކަށް ބަލާއިރު، ގާސިމްއަށް ހަމަލާދީފައިވަނީ ކާރުގެ ތެރޭގައި ހުއްޓާ ކަމަށް ބެލެވޭ ކަމަށެވެ. ކާރުގެ ތެރެއިންވެސް ފުލުހުންނަށް ލޭ ފެނިފައިވެއެވެ.
