ޖޫރިމަނާ ކުރަނީ ދައުލަތަށް ފައިސާ ހޯދުމަށް ކަމަށް ސޯޝަލްމީޑިއާގަ ދެކެވެމުންދާ ވާހަކަތަކަށް ފުލުހުން ރައްދު ދީފި
ނޮވެމްބަރ މަހު މާލޭގައި ފުލުހުން ސްޓިކާ 5287 އުޅަނދެއްގައި ސްޓިކަރ ޖަހާފައިވޭ
ނޮވެމްބަރ މަހު މާލޭގައި ފުލުހުން ސްޓިކާ 5287 އުޅަނދެއްގައި ސްޓިކަރ ޖަހާފައިވޭ
ޓްރެފިކް ފުލުހުން ވަކި ވަގުތުތަކެއްގައި ނުކުމެ، ޖޫރިމަނާ ކުރަނީ ގަސްތުގައި ދައުލަތަށް ފައިސާ ހޯދުމުގެ ބޭނުމުގައި ކަމަށް ސޯޝަލް މީޑިއާގައި ދެކެވެމުންދާ ވާހަކައަށް ފުލުހުން ރައްދު ދީފިއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން ސަބް އިންސްޕެކްޓަރ އޮފް ޕޮލިސް، މުހައްމަދު ނައީމް ވިދާޅުވީ ޓްރެފިކް ފުލުހުންނަކީ މަގުމަތި ތަރުތީބުކުރުމުގެ މެންޑޭޓު އޮތް ފަރާތްކަމަށެވެ. ނައީމް ވިދާޅުވީ އެކަން ޓްރެފިކް ފުލުހުން ނުކުރާނަމަ އެ މަސައްކަތް ކުރާނެ އިތުރުބައެއް ނުތިބޭނެ ކަމަށާއި ޓްރެފިކް ފުލުހުން މަސައްކަތްކުރަމުންދަނީ މަގުމައްޗަކީ މިހުންނަށް ފަސޭހަތަނެއްގެ ގޮތުގައި ހެދުމަށްކަމަށެވެ.
ނައީމް ވިދާޅުވީ މި ފަދަ މައްސަލަތައް ފާހަގަކުރެވުމުން ހަރަކާތްތެރިވާން ފަށާނެ ކަމަށާއި އެންމެ ފަހުން މީހުންގެ ނަޒަރުގައި ގޯސްވާނީ ފުލުހުން ކަމަށެވެ. ނައީމް ވިދާޅުވީ ޤަވާއިދާއި ޚިލާފަށް ޢަމަލުތައް ބަހައްޓަމުންގެންދާ ފަރާތްތަކަށް މަގު ދައްކައިދިނުމަކީ އެބޭފުޅުންގެ ޒިންމާއެއް ކަމަށެވެ.
ފުލުހުންގެ ޓްރެފިކް މެނޭޖްމެންޓް ޑިޕާޓްމެންޓުން ނެރޭ ތަފާސް ހިސާބުތަކަށް ބަލާލާއިރު ހުސްވި ނޮވެންބަރ މަހު މާލޭގައި 5287 އުޅަނދެއްގައި ފުލުހުން ސްޓިކަރ ޖަހާފައިވެއެވެ. އަދި ނޮވެންބަރު މަހު ފުލުހުން ބަލާފައިވާ އުޅަނދުތަކުގެ ޖުމުލަ ޢަދަދަކީ 3533 ކެވެ. އޭގެކުރީ މަހު ފުލުހުން ބަލާފައިވަނީ 4784 އުޅަނދެކެވެ.
ޤަވާއިދާ ޚިލާފަށް ޕާކު ކުރާ ފުރަތަމަ ފަހަރު ޖޫރިމަނާ ކުރަނީ 250 ރުފިޔާއިންނެވެ. އެކަން ތަކުރާރު ކޮށްފިނަމަ ދެވަނަ ފަހަރު 500 ރުފިޔާއިން ޖޫރިމަނާކުރެއެވެ. އަދި ތިން ވަނަ ފަހަރު 750 ރުފިޔާއިން އިން ޖޫރިމަނާކުރެއެވެ.
