ފޯނުން އެޕްލިކޭޝަން ހުށަހެޅޭ މިންވަރަށް، ޓޫރިޒަމް މިނިސްޓްރީގެ މަސައްކަތްތައް ޑިޖިޓައިޒް ކުރަނީ
18 ޑިސެމްބަރު 2019 | ބުދަ 14:27ރަށެއް ކަނޑައަޅާ ހިސާބުން އެ ރަށަކަށް ވެގެންދާނެ ގޮތް މޮނީޓަރ ކުރެވިގެންދާނެ
ފަތުރުވެރިކަމުގެ ޚިދުމަތް ދޭތަންތައް ހުޅުވުމަށްޓަކައި ބޮޑެތި ފަސޭހަތަކެއް ވެގެންދާނެ
މިނިސްޓްރީގެ މަސައްކަތްތައް ޑިޖިޓައިޒް ވެގެން ދިއުމުން ރައްޔިތުންނަށް ބޮޑެތި ފަސޭހަތަކެއް ވެގެންދާނެ ކަމަށް ޓުއަރިޒަމް މިނިސްޓްރީން ބުނެފިއެވެ.
ރާއްޖެޓީވީގެ 'ފަލަ ސުރުޚީ' ޕްރޮގްރާމުގައި ވާހަކަދައްކަވަމުން ސީނިއަރ ޕޮލިސީ ޑިރެކްޓަރ ރިފާތު ރަޝީދު ވިދާޅުވީ ރަށްތައް ދޫކުރުމުގައި އަދި ދޫކުރެވޭ ރަށްތައް ކަނޑައެޅުމަށްފަހު މޮނިޓަރ ކުރެވޭނެ އެއްވެސް ނިޒާމެއް މީގެކުރިން ޤާއިމު ކުރެވިފައި ނުވާ ކަމަށެވެ.
މިހާރު މިނިސްޓްރީގެ މަސައްކަތްތައް ޑިޖިޓައިޒް ކުރުމަށްޓަކައި ތަަރައްޤީކުރަމުން އަންނަ އޮޓޯމޭޝަން ޕްރޮޖެކްޓު ނިމުމުން ބަޔާކާއި ރަށެއް ޙަވާލު ކުރާ ހިސާބުން ނުވަތަ އެ ރަށެއް ކަނޑައަޅާ ހިސާބުން އެ ރަށަކަށް ވެގެންދާނެ ގޮތް ސިސްޓަމައިޒް ކޮށް، ޑިޖިޓައިޒްކޮށް، ޒަމާނީ ފެންވަރެއްގައި މޮނިޓަރ ކުރެވިގެންދާނެ ކަމަށެވެ.
އޭގެ އިތުރުން ރިފާތު ވިދާޅުވީ މިހާރު މިނިސްޓްރީގެ ފަރާތުން ދޭ އެކި އެކި ޚިދުމަތްތައް އޮންލައިން ވެގެން ދިއުމުން ގެސްޓް ހައުސް ފަދަ ފަތުރުވެރިކަމުގެ ޚިދުމަތް ދޭތަންތައް ހުޅުވުމަށްޓަކައި ބޮޑެތި ފަސޭހަތަކެއް ވެގެންދާނެ ކަމަށެވެ. އެގޮތުން އެޕްލިކޭޝަން ފޯރމެއް ހުށަހަޅަން މިނިސްޓްރީއަށް އައުމުގެ ބަދަލުގައި ފޯނުންވެސް އެޕްލިކޭޝަން ފޯރމު ހުށަހެޅުމުގެ ފުރުޞަތު އޮންނާނެ ކަމަށެވެ.
ރިފާތު ވިދާޅުވީ މިނިސްޓްރީގެ މަސައްކަތްތައް ޑިޖިޓައިޒް ވެގެން ދިއުމުން ޢާއްމުންނަށް ވަރަށް ބޮޑެތި ފަސޭހަތަކެއް ވެގެންދާނެ ކަމަށެވެ.
