ސްޕެނިޝް ލަލީގާގައި ރެއާލް މެޑްރިޑަށް ތާވަލުގެ އެއްވަނަ އަށް އަރަން ލިބުނު ފުރުސަތު ނަގައިލައިފިއެވެ.

ވެލެންސިއާގެ ދަނޑުގައި ވެލެންސިއާ އާއި ދެކޮޅަށް ކުޅުނު މެޗު ނިމުނީ 1-1 ގެ ނަތީޖާ އަކުން އެއްވަރު ވެގެންނެވެ.

މެޗުގެ ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހަން ރަނުގެ ފުރުސަތު ތަކެއް ލިބި ވަނީ ބޭކާރު ވެފައެވެ. އެގޮތުން މެޗުގެ ފުރަތަމަ ހާފުގައި ރެއާލް މެޑްރިޑްގެ ފޯވަރޑް ކަރިމް ބެންޒެމާ އަށާއި މިޑްފިލްޑަރ މޮޑްރިޗް އަށް ވަނީ ހުސް ފުރުސަތުތަކެއް ލިބި ބޭކާރުވެފައެވެ.

މެޗުގެ ފުރަތަމަ ހާފު ނިމިގެންދިޔައީ 0-0 ގެ ނަތީޖާ އަކުންނެވެ.

މެޗުގެ ދެވަނަ ހާފު ފަށައިގެން ވެލެންސިއާ އިން އެޓީމުގެ ކުޅުން ރަނގަޅުކޮށް ރެއާލް ގެ ގޯލަށް ނުރައްކާ ކޮށްފައިވެއެވެ. އެގޮތުން މެޗުގެ 78 ވަނަ މިނެޓުގައި ވެލެންސިއާ އިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ ކާލޮސް އެވެ. މި ލަނޑާއެކު ރެއާލުން ވަނީ އެޓީމުގެ އެޓޭކްތައް އިތުރަށް ވަރުގަދަ ކޮށްފައެވެ. އެގޮތުން ރެއާލުން ވަނީ ވެލެންސިއާގެ ގޯލަށް ފުލުފުލުގައި ހަމަލާ އުފައްދައިފައެވެ. އެގޮތުން ރެއާލުން ވަނީ މެޗުގެ އެންމެ ފަހު މިނެޓުގައި ލަނޑު ޖަހާ މެޗުގެ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ތަޖުރިބާކާރު ފޯވާޑް ކަރިމް ބެންޒެމާ އެވެ.

މި ނަތީޖާ އާއި އެކު ވާދަވެރި ބާސެލޯނާ އަށް ވަނީ ލަނޑުގެ ތަފާތުން ތާވަލުގެ އެއްވަނަ މަގާމު ލިބިފައެވެ. ދެވަނައިފައި ރެއާލުން އޮތީ 35 ޕޮއިންޓާއެކުގައެވެ. އަދި ތިން ވަނައިގައި އޮތް ސެވިއްޔާ އަށް ލިބިފައިވަނީ 31 ޕޮއިންޓެވެ.