ދިރާގު ދިވެހި ޕްރިމިއަރ ލީގުގައި މާޒިޔާ އަދި ގްރީން ސްޓްރީޓްސް ބައްދަލުކުރި މެޗުގައި މާޒިޔާއިން 6 ލަނޑު ގްރީން ކޮޅަށް ޖަހާ އެއްވަނައިގައި 11 ޕޮއިންޓުގެ ލީޑެއް ނަގައިފިއެވެ.

ގަލޮޅު ރަސްމީ ބޯޅަ ދަނޑުގައި ހޯމަ ދުވަހު ހަވީރު ކުޅުނު މި މެޗު މާޒިޔާއިން ކާމިޔާބުކުރީ ފަހަތުން އަރައި 6-1 ގެ ނަތީޖާ އަކުންނެވެ.

މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެޗުގައި ދެ ޓީމުން ވެސް ލަނޑު ޖަހަން ފުރުސަތުތައް ތަނަވަސްކޮށްފައިވެއެވެ. މެޗުގެ ކުރީ ކޮޅު ގްރީން އިން ލަނޑު ޖަހައި ލީޑު ނެގިއެވެ. މި ލަނޑު މެޗުގެ 20 ވަނަ މިނެޓުގައި އެޓީމަށް ކާމިޔާބުކޮށްދިނީ އިތުބާރު ފޯވަރޑް ކެޕްޓަން އަލީ އަޝްފާގް (ދަނގަޑޭ) އެވެ.

މި ލަނޑާއެކު މާޒިޔާއިން އެ ޓީމުގެ ކުޅުން ރަނގަޅު ކޮށް ގްރީންގެ ގޯލަށް ނުރައްކާ ކޮށްފައިވެއެވެ. އެގޮތުން މެޗުގެ 25 ވަނަ މިނެޓުގައި މާޒިޔާއިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ބިދޭސީ ފޯވަރޑް ސްޓެވާޓް އެވެ. މި ލަނޑާ އެކު މާޒިޔާ ކުޅުންތެރިން ވަނީ ޕްރެޝަރެއް ނެތި ކުޅެފައެވެ. އެގޮތުން މެޗުގެ ފުރަތަމަ ހާފު ނިމުމުގެ ކުރިން ސްޓެވާޓް ވަނީ އިތުރު ލަނޑެއް ޖަހާ ލީޑު ނަގައިފައެވެ.

މެޗުގެ ފުރަތަމަ ހާފު ނިމިގެން ދިޔައީ 2-1 ގެ ނަތީޖާ އަކުންނެވެ.

މެޗުގެ ދެ ވަނަ ހާފު ފެށިގެން ގްރީން އިން އެޓޭކިންގ ގޭމެއް ކުޅެމުން ގެންދިޔައިރު މެޗުގެ 50 ވަނަ މިނެޓުގައި ދަނގަޑޭ އަށް ވަނީ ޕެނަލްޓީ އެއް ލިބި ބޭކާރުވެފައެވެ.

އޭނާ ފޮނުވާލި ބޯޅަ ގޯލާ އަމާޒު ވާގޮތެއް ނުވިއެވެ. މެޗުގައި މާޒިޔާއިން ޖެހި ތިންވަނަ ލަނޑު މެޗުގެ 59 ވަނަ މިނެޓުގައި ހަމްޒާ މުހައްމަދު (ހަމްޕު) ކާމިޔާބުކޮށްދިން އިރު، މެޗުގެ ހަތަރު ވަނަ ލަނޑު 62 ވަނަ މިނެޓުގައި އެޓީމަށް ކާމިޔާބުކޮށްދިނީ އަސްސަދުﷲ އަބްދުﷲ އެވެ. އަދި މެޗުގެ 66 ވަނަ މިނެޓުގައި ސްޓެވާޓް ވަނީ އިތުރު ލަނޑެއް ޖަހާ އޭނާގެ ހެޓްރިކް ފުރިހަމަ ކޮށްފައެވެ. މެޗުގެ 71 ވަނަ މިނެޓުގައި އަސްސަދުﷲ އަބްދުﷲ އިތުރު ލަނޑެއް ޖެހި އިރު މެޗުގައި މާޒިޔާއިން ޖެހި އެންމެ ފަހު ލަނޑު މެޗުގެ 84 ވަނަ މިނެޓުގައި އެޓީމަށް ކާމިޔާބުކޮށްދިނީ އިބްރާހީމް މަހްދީ (އިއްބެ) އެވެ. މިއީ އަނިޔާ އަށް ފަހު އިއްބެ ކުޅުނު ފުރަތަމަ މެޗުވެސް މެއެވެ.

ދިރާގު ދިވެހި ލީގުގައި މިރޭ ބައްދަލުކުރާނީ ޓީސީ ސްޕޯޓްސް ކްލަބާއި ނިލަންދޫ އެވެ.