ވެރިކަމުގެ ބާރުތައް މުށުތެރެއަށް ލުމަކީ އަޅުގަނޑު ކުރާނެ ކަމެއް ނޫން: ރައީސް ޞާލިހު

ވެރިކަމުގެ ބާރުތައް މުށުތެރެއަށް ލުމަކީ އެމަނިކުފާނު ކުރައްވާނެ ކަމެއް ނޫންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެ އެވެ.

ކޮރޮސް ރޯޑްގައި އާދިއްތަ ދުވަހު ބޭއްވި "ވިއަވަތި ރާއްޖެ" މަޝްވަރާ ބައްދަލުވުމުގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ، ވެރިކަމުގެ ލައްޒަތާއި ޖާހަތު މަތިކުރުމަށްޓަކައި، ބާރުތައް މުށުތެރެއަށް ލުމަކީ އެމަނިކުފާނު ކުރައްވާނެ ކަމެއް ނޫންކަމުގެ ޔަޤީންކަން ދިވެހި ރައްޔިތުންނަށް އަރުވާ ކަމަށެވެ.

މިއަދަކީ ވަރަށް އުފާވެރި، އަދި އެހާމެ ހިތްމަޖެހުން ލިބޭ ދުވަހެއްކަމަށް ވިދާޅުވެ، ރައީސް ޞާލިހު ވިދާޅުވީ، އެމަނިކުފާނު ވެރިކަމަށް ވަޑައިގެންނެވުމަށް ކުރެއްވި ކެމްޕެއިންގެ ތެރެއިން ރައްޔިތުންނަށް ވީ އެންމެ ބޮޑު އެއް ވަޢުދު ފުއްދުމަށްޓަކައި، އެމަސައްކަތް ކުރެވެމުންދާ ދުވަސްކަމަށެވެ.

ރައީސް ޞާލިހު ވަނީ ލާމަރުކަޒީ ޤާނޫނަށް ސަރުކާރުން ހުށަޖެޅި އިޞްލާޙު ގެނައުމުގެ ބިލު މިރަސްމިއްޔާތުގައި ތަޞްދީޤު ކުރައްވާފައެވެ.

ރައީސް ޞާލިހު ވިދާޅުވީ ލާމަރުކަޒީ ޤާނޫނަކީ ވަރަށް ގިނަ މަޝްވަރާތަކަކާއި ވަރަށް ގިނަ ދިރާސާތަކަކާއި އަދި ވަރަށް ގިނަ ތަޖުރިބާތަކަކަށްފަހުގައި އެކުލަވާލެވުނު ޤާނޫނެއް ކަމަށެވެ.