ލޯކަލް ކައުންސިލުތަކުގެ އިންތިޚާބު: އަލަށް ގުޅޭ 100 މެންބަރުންގެ ފޯމަށް ޑީއާރުޕީގެ ޓިކެޓު ދޭގޮތައް!
އިތުރަށް ބަލާނީ ގާނޫނީ ޝަރުތު ފުރިހަމަ ވޭތޯ
ޑީއާރުޕީގެ ލީޑަރު އަބްދުﷲ ޖާބިރު
އަންނަ އޭޕްރީލް މަހު ބާއްވާ ލޯކަލް ކައުންސިލުތަކުގެ އިންތިޚާބުގައި ޑީއާރުޕީން ވާދަކުރަން ނިންމައި، އެ ޕާޓީއަށް އަލަށް ގުޅޭ 100 މެންބަރުންގެ ފޯމާއެކު، ހުށަހެޅުމުން ކައުންސިލް އިންތިޚާބުގައި ވާދަކުރުމުގެ ފުރުޞަތު ދިނުމަށް ޑީއާރުޕީން ނިންމައިފި އެވެ.
ޑީއާރުޕީން ބުނީ، އެޕާޓީގެ ޓިކެޓުގައި އަންނަ އަހަރު ބާއްވާ ލޯކަލް ކައުންސިލުތަކުގެ އިންތިޚާބުގައި ވާދަކުރުމަށް ޝައުޤުވެރިވާ ފަރާތްތަކަށް އެ ފުރުޞަތު ހުޅުވާލުމަށް ޑީއާރުޕީގެ ކައުންސިލުން ނިންމާފައިވާ ކަމަށެވެ. އަދި ޓިކެޓު ދިނުމުގައި ބެލޭނީ މަދުވެގެން 100 އާ މެންބަރުންގެ ފޯމު ހުށަހެޅުމާއެކު ޤާނޫނީ ޝަރުޠު ފުރިހަމަ ވުމުން ކަމަށްވެސް ޑީއާރުޕީން ބުނެއެވެ.
ރާއްޖޭގައި ސިޔާސީ ޕާޓީތައް އުފެއްދުމުގެ ހުއްދަ ލިބުމާއެކު އެފެއްދި، ޑީއާރުޕީއަކީ ކުރިން ރާއްޖޭގެ ވަރުފަދަ ސިޔާސީ ޕާޓީއެކެވެ. ނަމަވެސް، ފަހުން އެޕާޓީގެ ތެރޭގައި މައްސަލަތައް އުފެދި، ޕާޓީ ރޫޅި މާބޮޑު ޙަރަކާތެއް ނުފެނެ އެވެ.
ކުރީގެ ރައީސް މައުމޫން އަބްދުލްޤައްޔޫމުގެ ވެރިކަމުގައި އެމަނިކުފާނު އިސްވެ ހުންނަވައި އުފެއްދި ޑީއާރުޕީން ކުރިމަތިލި ފުރަތަމަ ރިޔާސީ އިންތިޚާބު ކާމިޔާބު ކުރެއްވީ އޭރުގެ އިދިކޮޅު ލީޑަރު އެމްޑީޕީގެ ރައީސް، އަދި ކުރީގެ ރައީސް މުޙައްމަދު ނަޝީދު އެވެ.
އޭގެ ފަހުން ޑީއާރުޕީގެ ލީޑަރޝިޕްގެ ތެރޭގައި މައްސަލަ އުފެދި، ރައީސް މައުމޫން ވަނީ ޕީޕީއެމްގެ ނަމުގައި ސިޔާސީ ޕާޓީއެއް އުފައްދަވާފަ އެވެ. އަދި 2013ގެ ރިޔާސީ އިންތިޚާބު ޕީޕީއެމްގެ ރިޔާސީ ޓިކެޓުގައި ކުރީގެ ރައީސް ޢަބްދުﷲ ޔާމީނު ކާމިޔާބު ކުރެއްވުމާއެކު އަހަރެއް ނުވަނީސް ޕީޕީއެމްގެ ތެރޭގައި ވެސް މައްސަލަތައް އުފެދި، ޕީޕީއެމުން ރައީސް މައުމޫން ވަނީ ބޭރުކޮށްލައްވާފަ އެވެ. ދާދިފަހުން ރައީސް މައުމޫން ވަނީ އެމަނިކުފާނުގެ ތިން ވަނަ ޕާޓީކަމަށްވާ އެމްއާރުއެމް ނަމުގައި ޕާޓީއެއް އުފައްދަވާފަ އެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ އިންތިޚާބުގައި ކާށިދޫ ދާއިރާގެ ގޮނޑި، މަޝްހޫރު ވިޔަފާރިވެރިޔާ ޢަބްދުﷲ ޖާބިރު ކާމިޔާކު ކުރެއްވުމާއެކު، އޭނާ ވަނީ ޑީއާރުޕީއާ ގުޅިވަޑައިގެން، އެޕާޓީގެ ލީޑަރަށް ވެވަޑައިގަންނަވާފަ އެވެ.
އޭގެ ފަހުން ޑީއާރުޕީގެ ކައުންސިލުގެ ބައްދަލުވުންތައް ބާއްވައި ބައެއް މުހިއްމު ނިންމުންތައް ދަނީ ނިންމަމުން ނެވެ. އެގޮތުން، ކުރިއަށް ހުރި އިންތިޚާބުތަކުގައި ޑީއާރުޕީގެ ފަރާތުން ވާދަކުރެއްވުމަށް ވަނީ ނިންމާފައި ވެއެވެ. އަދި ޑީއާރުޕީއަށް މެންބަރުން އިތުރުކުރުމުގެ ޙަރަކާތްތަކެއްވެސް ހިންގަމުން ދެއެވެ.
