އައިޖީއެމްއެޗްގެ ޑޮކްޓަރުން ތަމްރީނުކުރުމަށް އިންޑިއާއާއެކު އެއްބަސްވުމެއްގައި ސޮއިކޮށް އިންޑިއާއަށް ޑޮކްޓަރުން ފޮނުވުމަށް ނިންމާފައިވާ ކަމަށް އައިޖީއެމްއެޗުން ބުނެފިއެވެ.

"ރާއްޖެ ޓީވީ" ގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން ޕީއާރް މެޑިކަލް ޑައިރެކްޓަރ އަހުމަދު ސިރާޖް ވިދާޅުވީ އައިޖީއެމްއެޗްގެ މެނޭޖްމަންޓުން ވަރަށް ބޮޑު އިސްކަމެއް ދެއްވައިގެން ޑޮކްޓަރުން ތަރައްގީކުރުމުގެ ކަންކަން ކުރިއަށް އެބަގެންދަވާ ކަމަށެވެ. އަދި އެ ހޮސްޕިޓަލުގައި ތިއްބެވި ވަރަށް ގިނަ ސުޕަރ ސްޕެޝަލިސްޓުން މި ފެށޭ އަހަރުގެ ތެރޭގައި އަލުން ހިދުމަތާއި ގުޅިވަޑައިގަންނަވާނެ ކަމަށެވެ.

މީގެ އިތުރުން މިއަހަރުގެ ތެރޭގައި ވެސް ތިން ބޭފުޅަކު ތަމްރީނުތަކަށް ފުރައިގެން ގޮސްފައިވާ ކަމަށާއި، އަންނަ އަހަރުގެ ބަޖެޓުގައި ޓްރެއިނިންގ އަށް ވަރަށްބޮޑު ބައެއް ހާއްސަކުރެވިފައި އެބައޮތް ކަމަށެވެ.

އައިޖީއެމްއެޗްގެ އެކްޓިން މެޑިކަލް ޑައިރެކްޓަރ ޑރ. ޔޫސުފް ޝާން ވިދާޅުވީ ވަރަށް އަވަހަށް އިންޑިއާއާއި އެކު އައިޓެކް އެގްރީމެންޓެއްގައި ސޮއިކުރެވިގެންދާނެ ކަމަށެވެ. އަދި އޭގެ ދަށުން އިންޑިއާއިން ވެސް ހިލޭ އެހީގައި ސްޕެޝަލިސްޓުން ޓްރެއިންކުރުމާއި، އެމްބީބީއެސް ޑޮކްޓަރުން ޓްރެއިން ކުރުމާއި އަދި ސުޕަރ ސްޕެޝަލިސްޓުން ތަމްރީން ކުރުމުގެ ކަންކަން ވެސް ކުރިއަށް ގެންދެވޭނެ ކަމަށެވެ.

އަދި މި މަހުގެ ތެރޭގައި ސޮއިކުރުމުގެ ކަންތައްތައް ކުރިއަށް ދާނެ ކަމަށާއި، އޭގެ ފަހުން އެކޮޅުން ވެސް ބޭފުޅުން ރާއްޖެ ވަޑައިގެން އެބޭފުޅުންގެ ދަށުގައި އައިޖީއެމްއެޗްގެ ޑޮކްޓަރުންނަށް އިތުރު ޓްރެއިނިން ލިބިގެންދާނެ ކަމަށެވެ.