ސަން ސިޔާމާއި، އަދީބުގެ އަތުން އަނިލް ރިޝްވަތު ނެންގެވިކަމަށް ބުނެ މައްސަލަ އޭސީސީއަށް!

ކުރީގެ ބަންޑާރަ ނައިބު މުހައްމަދު އަނިލްއާއި ގުޅޭ ކޮރަޕްޝަންގެ މައްސަލަތަކެއް އަމިއްލަ ފަރާތަކުން އެންޓި ކޮރަޕްޝަން ކޮމިޝަން (އޭސީސީ) އަށް ހުށައަޅައިފިއެވެ.

އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތުދެއްވަމުން އޭސީސީގެ މީޑިއާ އޮފިޝަލު ވިދާޅުވީ، އަނިލްއާއި ގުޅޭގޮތުން 3 މައްސަލައެއް ހުށައެޅިފައިވާ ކަމަށެވެ. އަމިއްލަ ފަރާތަކުން ހުށައެޅި މި 3 މައްސަލަވެސް އޭސީސީއަށް ހުށައަޅާފައިވަނީ ބުދަ ދުވަހު އެވެ.

ކުރީގެ ނައިބް ރައީސް އަހުމަދު އަދީބުގެ އަތުން އަނިލް ރިޝްވަތު ނެންގެވިކަމަށް ބުނާ މި މައްސަލައިގައި އެ ފައިސާ އިން މެލޭޝިއާއިން އެޕާޓްމެންޓަކާއި، ކާރެއް ބައްލަވައިގެންނެވި ކަމަށް ބުނެފައިވާކަމަށް ބައެއް ނޫސްތަކުން ރިޕޯޓްކޮށްފައިވެއެވެ.

ކުރީގެ ސަރުކާރުގެ ބޮޑެތި ކޮރަޕްޝަންގެ އަމަލުތަކާއި ދައުލަތުގެ ފައިސާއަށް ހިޔާނާތްތެރިވުމުގެ މައްސަލަތަކެއް ފެންމަތިވެފައިވާއިރު، އެކަމުގައި އިސްކޮށް އުޅުނު ކަމުގެ ތުހުމަތު ކުރެވޭ ފަރާތްތަކާއި އަނިލްއާއި ގާތް ގުޅުމެއް އޮންނަ ކަމަށް ގިނަ ބަޔަކު ތުހުމަތު ކުރެއެވެ. އެގޮތުން މުއައްސަސާތަކުން ގާނޫނާ ހިލާފަށް ކަންކަން ކުރާނަމަ އެކަންކަން އިސްލާހުކޮށް، ރަނގަޅު ކުރުމަށް ގާނޫނީ ލަފާ ދެއްވާ، އަދި ޝަރުއީ ކޯޓުތަކުގައި ޖިނާއީ މައްސަލަތައް ފިޔަވައި، ދައުލަތް ތަމްސީލް ކުރައްވާ ފަރާތަކީ އަނިލްއަށްވީނަމަވެސް އަނިލް ބޮޑަށް ފެނިގެންދިޔައީ މަނީ ލޯންޑަރިންގގެ ދައުވާ ސާބިތުވެ ޖަލު ހުކުމް ތަންފީޒު ކުރަމުންދާ ކުރީގެ ރައީސް ޔާމީނަށް ގާނޫނީ ލަފާ ދެއްވާ ބޭފުޅެއްގެ ގޮތުގައި ކަމަށް ގިނަ ބަޔަކު ބުނެއެވެ.