ދަނޑުވެރިން އުފައްދާ ތަކެތި މާރކެޓްކުރާ ކުންފުނި އަންނަ ފެބްރުއަރީ މަސް ކުރިން އުފައްދަނީ
12 ޑިސެމްބަރު 2019 | ބުރާސްފަތި 07:52ކޮންސެޕްޓް ޕޭޕަރ ތައްޔާރު ކުރެވި އިކޮނޮމިކް މިނިސްޓްރީއަށް ވަނީ ހުށައެޅިފައި
މިނިސްޓްރީ އޮފް ފިޝަރީޒް އެގްރިކަލްޗަރ އެންޑް މެރިން ރިސޯސަސް އިން ނޫސްވެރިންނާ ބައްދަލުކުރުން
ދަނޑުވެރިން އުފައްދާ ތަކެތި މާރކެޓްކުރާ ކުންފުނި އަންނަ ފެބްރުއަރީ މަހުގެ ކުރިން އުފެއްދޭނެކަމަށް މިނިސްޓްރީ އޮފް ފިޝަރީޒް އެގްރިކަލްޗަރ އެންޑް މެރިން ރިސޯސަސް އިން ބުނެފިއެވެ.
އިކޮނޮމިކް މިނިސްޓްރީގެ އެހީތެރިކަމާއެކު އުފައްދާ މި ކުންފުންޏާބެހޭ ގޮތުން ބުރާސްފަތި ދުވަހު މީޑިއާއާއި ބައްދަލުކުރައްވައި މިނިސްޓްރީގެ އެސިސްޓެންޓް ޑިރެކްޓަރ ހުސައިން ފައިސަލް ވިދާޅުވީ، ދަނޑުވެރިކަމާއި ގުޅޭ އެގްރިކަލްޗަރ ކޯޕަރޭޝަނެއް އުފެއްދުމަށް ބޭނުންވާ ކޮންސެޕްޓް ޕޭޕަރ ތައްޔާރު ކުރެވި، އިކޮނޮމިކް މިނިސްޓްރީއަށް ހުށައަޅާފައިވާ ކަމަށެވެ. މިނިސްޓްރީން ބުނީ، އަންނަ އަަހަރުގެ ފެބްރުއަރީ މަހުގެ ކުރިން ކޯޕަރޭޝަން އުފެއްދޭނެ ކަމަށާއި، އިންޓަނޭޝަލް ފަންޑް ފޯ އެގްރިކަލްޗަރ ޑިވެލޮޕްމަންޓް (އިފާޑް) އާއެކު އަންނަ އަހަރު ތެރޭގައި ކުންފުނި އިތުރަށް ފުޅާ ކުރުމަށްވެސް ކަންތައްތަކެއް ރޭވިފައިވާ ކަމަށެވެ.
ފައިސަލް ވިދާޅުވީ، ކުންފުނި އުފެދުމުން ދަނޑުވެރިން އުފައްދާ ތަކެތި ގަނެ މާކެޓު ކުރުމުގައި ފަސޭހަތަކެއް ލިބިގެންދާނެ ކަމަށާއި، ދަނޑުވެރިކަމަށް ބޭނުންކުރާ އާލަތްތައް ހެއު އަގުގައި ހޯދުމުގެ މަގުތަކެއް ތަނަވަސްވެގެންދާނެ ކަމަށެވެ.
ދަނޑުވެރިން އުފައްދާ ތަކެތި މާކެޓް ނުކުރެވޭތީ ދަނޑުވެރިންނަށް އެކަމުން ރަނގަޅު މަންފާ އެއް ލިބިގެން ނުދާކަމުގެ ޝަކުވާ ވަރަށް ގިނަ ފަރާތްތަކުން ކުރެއެވެ. އެހެންކަމުން އެކަމަށް މަގުފަހިކުރުމަށްޓަކައި ކުންފުންޏެއް އުފައްދަވަން މަސައްކަތް ކުރައްވާކަމަށާއި އެކަމަށްޓަކާ އިފާޑްއާއެކު ޕްރޮޖެކްޓެއް އެކުލަވާލުމުގެ މަސައްކަތް ކުރައްވަމުން ގެންދަވާކަމަށް މިނިސްޓަރވެސް ވަނީ ވިދާޅުވެފައެވެ.
