ރައްޔިތުންގެ މަޖިލީހާއި ލޮކްސަބާއާއި ދެމެދު އެމްއޯޔޫއެއްގައި ސޮއިކޮށްފި
9 ޑިސެމްބަރު 2019 | ހޯމަ 14:47މި ދަތުރުފުޅުގައި ރައީސް މުޙައްމަދު ނަޝީދު އިންޑިއާގެ ބޮޑުވަޒީރާއި ބައްދަލުކުރައްވާނެ
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދާއު ލޯކް ސަބާގެ ރައީސް، ޝްރީ އޯމް ބިރްލާ އެމްއޯޔޫގައި ސޮއި ކުރައްވަނީ
އިންޑިޔާގެ ޤާނޫނު ހަދާ މަޖިލިސް (ލޮކް ސަބާ) އާއި ރައްޔިތުންގެ މަޖިލީހާއި ދެމެދު މެމޮރަންޑަމް އޮފް އަންޑަރސްޓޭޑިންގއެއްގައި ސޮއިކޮށްފިއެވެ.
އިންޑިއާގެ ޤާނޫނުހަދާ މަޖިލީހުގެ ތިރިގެ، ލޮކް ސަބާއާއި ރައްޔިތުންގެ މަޖިލީހާއި ދެމެދު "އެގްރީމެންޓް ފޮރ ކޯޕަރޭޝަން ބިޓްވީން ލޮކް ސަބާ އޮފް ދަ ރިޕަބްލިކް އޮފް އިންޑިއާ އެންޑް ދަ ޕީޕަލްސް މަޖިލިސް އޮފް ދަ ރިޕަބްލިކް އޮފް މޯލްޑިވްސް"ގެ ނަމުގައި އެމްއޯޔޫއެއްގައި ސޮއިކޮށްފައިވާއިރު، މި އެމްއޯޔޫގައި ރައްޔިތުންގެ މަޖިލީހުގެ ފަރާތުން ސޮއިކުރެއްވި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދެވެ. ލޮކް ސަބާގެ ފަރާތުން ސޮއިކުރެއްވީ ލޮކް ސަބާގެ ރައީސް، ޝްރީ އޯމް ބިރްލާއެވެ.
އިންޑިޔާގެ ޤާނޫނު ހަދާ މަޖިލީހާއި ރައްޔިތުންގެ މަޖިލީހާއި ދެމެދު ވެވޭ މިއެއްބަސްވުމުގައި ދެ ފަރާތުންވެސް ބަރުލަމާނީ ގުޅުން ރަނގަޅުކުރުމަށް ބާރު އެޅުމަށާއި، ދެ ޤައުމުގެ މެދުގައި އޮތް ޒަމާންވީ އެކުވެރި ގުޅުން އިތުރަށް ކުރިއެރުވުމަށް ހިމަނާފައިވާ ކަމަށް ރައީސް ނަޝީދު ވަނީ އެންމެ ފަހުން ބޭއްވި ރައްޔިތުންގެ މަޖިލީހުގެ ޖަލްސާގައި ވިދާޅުވެފައެވެ.
ރާޖްޔާ ސަބާގެ ޗެއަރމަން، ޝްރީ އެމް. ވެންކައިއަ ނައިޑު އަދި އިންޑިއާގެ ޤާނޫނު ހަދާ މަޖިލިސްގެ ތިރި ގެ، ލޮކް ސަބާގެ ރައީސް، ޝްރީ އޯމް ބިރްލާގެ ދަޢުވަތަށް، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުއާއި ރައްޔިތުންގެ މަޖިލީހުގެ މެންބަރުން އިންޑިއާއަށް ކުރައްވާ ދަތުރުފުޅުގައި ރައްޔިތުންގެ މަޖިލީހުގެ ވަފުދުގެ ބޭފުޅުންވަނީ ހޯމަ ދުވަހުގެ ހެނދުނު މަހަތްމާ ގާންދީގެ ހަދާނީ ބިނާއަށް ޒިޔާރަތްކުރައްވާފައެވެ.
އަދި ހޯމަ ދުވަހުގެ މެންދުރު އިންޑިއާގެ ޤާނޫނުހަދާ މަޖިލިސްކުރާ ގެއަށް ވަޑައިގެން އެތަން ބައްލަވާލެއްވިއެވެ. މީގެ އިތުރުން މެންދުރު ފަހު ރައީސް މުޙައްމަދު ނަޝީދާއި ވަފުދުގެ ބޭފުޅުންވަނީ ރާޖްޔާ ސަބާގެ ޗެއަރމަން، ޝްރީ މ. ވެންކައިއަ ނައިޑޫއާއި ލޮކް ސަބާގެ ރައީސް، ޝްރީ އޯމް ބިރްލާއާގެ އަރިހަށް އިޙްތިރާމްގެ ޒިޔާރަތެއް ކުރައްވާފައެވެ.
މިދަތުރުފުޅުގައި ރައްޔިތުންގެ މަޖިލީހުގެ ރައީސް، ގުޖުރާތް ލެޖިސްލޭޓިވް އެސެމްބްލީގެ ރައީސްގެ އަރިހަށް އިޙްތިރާމްގެ ޒިޔާރަތެއްކުރެއްވުމުގެ އިތުރުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އިންޑިއާގެ "ލޮކް ސަބާ ޓީވީ"އަށް އިންޓަވިއުއެއް ދެއްވުމަށްވެސްވަނީ ހަމަޖެހިފައެވެ. 5 ދުވަހަށް ކުރައްވާ މި ދަތުރުފުޅުގައި ރައީސް މުޙައްމަދު ނަޝީދު އިންޑިއާގެ ބޮޑު ވަޒީރު ނަރެންދްރަ މޯދީއާއި ބައްދަލުކުރައްވާނެކަމަށް ރައްޔިތުންގެ މަޖިލީހުން ވަނީ ބުނެފައެވެ.
މިމަހުގެ 9 ން 13 ށް ރައްޔިތުންގެ މަޖިލީހުގެ ވަފުދު އިންޑިއާއަށް ކުރައްވާ ދަތުރުފުޅުގައި 15 މެމްބަރުންގެ ހިމެނެއެވެ. މިވަފުދު އެކުލަވާލާފައިވަނީ، މަޖިލީހުގައި ހިމެނޭ ހުރިހާ ސިޔާސީ ޕާޓީއެއް ތަމްސީލުކުރެވޭގޮތައް ކަމަށާއި، އެ މެމްބަރުންނާއި އަމީން ޢާންމުގެ އިތުރުން ކައުންސެލަރ ޖެނެރަލް ބައިވެރިވެވަޑައިގަންނަވައެވެ.
