ބްރޯޑްކޮމްގެ މެމްބަރުކަމަށް ކުރިމަތިލުމުގެ ފުރުސަތު ހުޅުވާލައިފި

ހުސްވެފައިވާ މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)ގެ މެމްބަރުކަމުގެ މަގާމަށް ކުރިމަތިލުމުގެ ފުރުސަތު، ދެވަނަ ފަހަރަކަށް ރައީސް އޮފީހުން ހުޅުވާލައިފި އެވެ.

ހޯމަ ދުވަހު ރައީސް އޮފީހުން ކުރި އިއުލާނެއްގައި ވަނީ ޑިސެމްބަރު މަހުގެ 16 ވަނަ ދުވަހާ ހަމައަށް މި މަގާމަށް ކުރިމަތިލުމުގެ ފުރުސަތު ހުޅުވާލާފަ އެވެ. މި މަގާމަކީ، އެ ކޮމިޝަންގެ ނައިބު ރައީސްގެ މަގާމުގައި ހުންނެވި ފާތިމަތު ޒައިނާ ވަކިކުރަން މަޖިލީހުން ފާސްކުރުމުން ހުސްވެފައިވާ މަގާމެކެވެ.

ޒައިނާ ވަކިކުރުމަށް ފަހު ހުސްވެފައިވާ މަގާމަށް، ފުރަތަމަ ފަހަރު ހުޅުވާލުމުން އެ ފުރުސަތަށް އިޖާބަދެއްވާ ކުރިމަތިލެއްވި ބޭފުޅުންގެ ތެރެއިން ތިން ބޭފުޅެއްގެ ނަން ރައީސް އިބްރާހިމް މުހައްމަދު ސޯލިހު ވަނީ ރައްޔިތުންގެ މަޖިލީހަށް ފޮނުއްވާފަ އެވެ. އޭގެ ތެރޭގައި ހިމެނެނީ، ޑރ. އިބްރާހިމް ޝިޔާމް، ހަސަން އިރުފާން އަދި އިމްރާނާ ބިންތް އަބްދުﷲ އެވެ. ނަމަވެސް، މިއިން އެއްވެސް ބޭފުޅެއްގެ ނަން ކޮމިޓީން ފާސްވެފައެއް ނުވެއެވެ.

މަޖިލީހުގެ ގަވައިދުގައިވާ ގޮތުން ނަމަ، ކޮމިޓީން އިންޓަވިއު ކުރާ ފަރާތްތަކުގެ ތެރެއިން ތަޅުމަށް ފޮނުވޭނޭ، ކޮމިޓީގެ ޖުމްލަ މެމްބަރުންގެ 2/3 (ތިންބައިކުޅަ ދެބައި) އަގުލަބިއްޔަތުން ފާސްވާ ފަރާތްތަކުގެ ނަން އެކަންޏެވެ.

މި މަގާމަށް ބޭފުޅަކު ހޮވުމާއިއެކު، ބްރޯޑްކާސްޓިންގ ކޮމިޝަނަށް ހުރިހާ މެމްބަރުން ހަމަވާނެއެވެ. އެންމެ ފަހުން ރައްޔިތުންގެ މަޖިލީހުން ފާސްކުރި ނަންތަކާއިއެކު، މިހާރު އެ ކޮމިޝަންގައި ތިއްބެވީ ހަ މެމްބަރުންނެވެ.