ސަރުކާރުގެ މަޝްރޫޢުތައް ބިޑަކާއި ނުލާ ސަރުކާރުގެ ހިއްސާ އޮންނަ ކުންފުނިތަކަށް މަޝްރޫޢުތައް ދޫކުރެވޭ ގޮތަަށް މާލިއްޔަތު ޤާނޫނުގައި އޮތް މާއްދާ އުވާލާ، އެ މާއްދާގައި ހިމެނޭ މަފްޙޫމްތައް ހިމެނޭގޮތަށް ދައުލަތުގެ މާލިއްޔަތުގެ ޤަވާއިދަށް ބަދަލު ގެންނައުމަށް އެންޓި ކޮރަޕްޝަން ކޮމިޝަން (އޭސީސީ)ން ލާފާދީފިއެވެ.

މާލިއްޔަތުގެ ޤަވާއިދުގެ 10.27 ވަނަ މާއްދާއަށް ގެނެސްފައިވާ އިޞްލާޙުގެ ކޮރަޕްޝަން ރިސްކް އެނަލިސިސްއެއް ހެދި، ކޮރަޕްޝަން ހުއްޓުވުމަށާއި، ކޮރަޕްޝަނުގެ ހިރާސް ކުޑަކުރެވޭނެ ނިޒާމެއް ޤާއިމުކޮށް، ދައުލަތުގެ ޕްރޮކިއުމަންޓާބެހޭ އިޖުރާޢަތުތައް އިޞްލާޙުކުރުމަށްޓަކައި އޭސީސީން ވަނީ ކަރުދާހެއް ތައްޔާރުކޮށްފައެވެ.

އޭސީސީން ތައްޔާރު ކުރި ކަރުދާހުގައިވާގޮތުން 10.27 ވަނަ މާއްދާގެ (ހ) އަދި (ށ) ގައި އޮތްގޮތުން، ޢާންމުކޮށް ބީލަމަށް ހުޅުވާނުލައި ސަރުކާރުގެ ޙިއްސާ އޮންނަ ކުންފުންޏަކާއި މަސައްކަތް ޙަވާލުކުރުމުގެ ފުރުޞަތު އޮންނަ ކަމަށެވެ. އަދި މީގެކުރިން މި މާއްދާގެ ދަށުން ސަރުކާރުގެ ބައެއް މަސައްކަތްތައް ޙަވާލުކޮށްފައިވަނީ، އެ ޙަވާލުކުރެވޭ މަސައްކަތަކީ، އެ ކުންފުނީގެ މެންޑޭޓުގައި ހިމެނޭ މަސައްކަތެއްތޯ ބެލުމަކާނުލައި ކަމަށެވެ. އަދި ޙަވާލުކުރެވޭ މަސައްކަތް އެ ކުންފުންޏަށް ނުކުރެވުމުގެ ސަބަބުން، އެ ކުންފުނިން އެ މަސައްކަތް ތިންވަނަ ފަރާތަކަށް ޙަވާލުކުރަނީ ގިނަފަހަރަށް ޢާންމުކޮށް ބީލަމަށް ހުޅުވާނުލައި ދައުލަތަށް ގެއްލުންވާގޮތަށް ކަމަށެވެ.

އޭސީސީން ބުނީ މިގޮތަށް މިކަން ގިނަފަހަރަށް ކޮށްފައިވަނީ، ދައުލަތުގެ ޕްރޮކިއުމަންޓް އުޞޫލުތަކަށް ޢަމަލުނުކޮށް ވަކި ފަރާތަކަށް ފައިދާ ހޯދައިދިނުމުގެ ބޭނުމުގައި ކަން ފާހަގަކުރެވިފައިވާ ކަމަށެވެ. އަދި، އެ މަސައްކަތް ޙަވާލުކުރެވޭ ކުންފުނީގައި އެ މަސައްކަތްކުރުމުގެ ޤާބިލުކަން ނެތުމުގެ ސަބަބުން، ދައުލަތުން އެ ކުންފުންޏާ މަސައްކަތް ޙަވާލުކޮށްފައިވާ އަގަށްވުރެ ކުޑައަގެއްގައި އެ މަސައްކަތް ތިންވަނަ ފަރާތަކާ ޙަވާލުކޮށްގެން ކުރުވާ ކަމަށެވެ.

އޭސީސީން ބުނީ އެފަދަ ގޮތަކަށް ކުންފުނިތަކާއި މަޝްރޫޢުތައް ޙަވާލު ކުރުމުން ނުކުންނަ ނަތީޖާއަކީ ދައުލަތުގެ އިދާރާއަކުން މާލިއްޔަތުގެ ޤަވާއިދަށް ޢަމަލުކުރަން ބޭނުންނުވާ ކޮންމެ ޙާލަތެއްގައި ކޯޕަރޭޓިވް ސޮސައިޓީއަކާ އެ މަސައްކަތް ޙަވާލުކޮށްގެން ކުރުވުމުގެ ފުރުޞަތު އޮތުން ކަމަށެވެ. އަދި މިގޮތަށް ދައުލަތުގެ މަޝްރޫޢުތައް ޙަވާލުކުރާއިރު، އެ ކޯޕަރޭޓިވް ސޮސައިޓީއަކީ ދައުލަތުގެ މަޞްލަޙަތު އޮތް ކޯޕަރޭޓިވް ސޮސައިޓީއެއްތޯ ބަލާނެ މިންގަނޑެއް މާލިއްޔަތުގެ ޤަވާއިދުން އެނގެންނެތްކަމާއި އަދި އެކަން އެނގެން އޮތްނަމަވެސް، ކޯޕަރޭޓިވް ސޮސައިޓީއަކާ ދައުލަތުގެ މަޝްރޫޢުތައް ޙަވާލުކުރުމުގެ ސަބަބުން ވާދަވެރި ބީލަމެއްގެ ފުރުޞަތު ގެއްލި، މާރކެޓް ރޭޓަށްވުރެ ބޮޑުކޮށް ދައުލަތަށް ޚިދުމަތާއި ތަކެތި ހޯދުމުގެ އިޙްތިމާލު ނުހަނު ބޮޑުވެގެންދާ ކަމަށް އެ ކޮމިޝަނުން ބުނެފައިވެއެވެ.

އެ ކޮމިޝަނުން ބުނީ ދައުލަތުން ކުރިއާލައި ރާވައިގެން ދައުލަތުގެ ބަޖެޓުން ޚަރަދުކުރާ ބޮޑެތި މަޝްރޫޢުތައް ޢާންމުކޮށް ބީލަމަށް ހުޅުވާނުލައި ދޫކުރަންޖެހިއްޖެ ޙާލަތެއްގައި ދޫކުރަން އެ ކޮމިޝަނަށް ފެންނަނީ، ސަރުކާރުގެ ސަތޭކަ އިންސައްތަ ހިއްސާ އޮންނަ ކުންފުނިތަކަށްކަމަށް ބަޔާންކުރާ މާއްދާއެއް ޤަވާއިދުގައި ހިމެނުމަށް ފަހުކަމަށެވެ. ނަމަވެސް، އެ ޙާލަތުގައިވެސް، އެފަދަ ކުންފުންޏަކާ މަސައްކަތް ޙަވާލުކުރަންވާނީ ދެފުށްފެންނަ ނިޒާމެއްގެ ތެރެއިން ކުންފުނީގެ މެންޑޭޓުގައި ހިމެނޭ މަސައްކަތެއްތޯ ބެލުމަށްފަހު ހަމަ އަގުގައި ކަމަށް އޭސީސީން ބުނެފައިވެއެވެ. އަދި އެފަދަ ގޮތަކަށް މަސައްކަތް ނުވަތަ މަޝްރޫޢުތައް ސަރުކާރުގެ ސަތޭކަ އިންސައްތަ ހިއްސާ އޮންނަ ކުންފުނިތަކާ ޙަވާލުކުރެވޭގޮތަށް ބާއްވާނަމަ، އެކަން އޮންނަންވާނީ އެފަދަ ކުންފުންޏަކާ ޙަވާލުކުރެވޭ މަސައްކަތް، އެހެން ތިންވަނަ ފަރާތަކާ ޙަވާލު ނުކުރެވޭގޮތަށް ކަމަށް އޭސީސީން ބުނެފައިވެއެވެ.