ސަންގު ބަހުސްގައި އެމްޑީޕީގެ ކެންޑިޑޭޓު އާޒިމަށް ފާޅުގައި އެންޓި ކެމްޕޭންކުރުމުން އެހެން ކެންޑިޑޭޓެއްގެ ފާޑުކިޔުން، ވަކި މީހަކު ޕްރޮމޯޓުކުރާ ކަމުގެ ތުހުމަތު!

ސަންގުޓީވީން ގެނެސްދިން "ސަންގު ބަހުސް" ގައި އެމްޑީޕީގެ ކެންޑިޑޭޓު އާދަމް އާޒިމަށް ފާޅުގައި އެންޓި ކެމްޕޭން ކުރުމުން އެހެން ކެންޑިޑޭޓެއް ވެސް އެކަމަށް ފާޑު ވިދާޅުވެ، ބަހުސްގެ ޒަރިއްޔާއިން ވަކި މީހަކު ޕްރޮމޯޓުކުރާ ކަމުގެ ތުހުމަތު ކުރައްވައިފިއެވެ.

އާޒިމް ބަހުސްގައި ބައިވެރިވެވަޑައިނުގެންނެވޭ ސަބަބު ތަފްސީލާއެކު ސަންގުޓީވީއަށް އަންގާފައިވާކަމަށް އެމްޑީޕީން ބުނެފައިވާއިރު، އެ ބަހުސްގެ ތެރެއިން އެކި ފަހަރުމަތިން ވަނީ އާޒިމްއަށް ބޮޑެތި ފާޑުކިޔުންތަކެއް އަމާޒުކޮށްފައެވެ. އަދި އެ ފާޑުކިޔުންތަކަކީ ރައްޔިތުންގެ މެދުގައި ހުރި ކަންބޮޑުވުންތައްކަމަށް ބަހުސްގެ ތެރެއިން ފާހަގަކޮށްފައިވެއެވެ.

މާލެ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓު، ކުރީގެ ކޮމިޝަނަރ އޮފް ޕޮލިސް ހުސައިން ވަޙީދު ވެސް ވަނީ މި ބަހުސްގެ ތެރެއިން އެކަން ތަކުރާރުކޮށް ފާހަަގަ ކުރައްވާފައެވެ.

ހުސައިން ވަޙީދު ވަނީ ވަކި ކެންޑިޑޭޓަކު ޕްރޮމޯޓުކޮށް، ދެން ހުންނަ ކެންޑިޑޭޓު އެއްކޮށް ނައްތާލުމަށް ބަހުސްގެ އަމާޒު ހުރިކަމަށް ވިދާޅުވެފައެވެ.

ސަންގު ބަހުސްގައި ވަކި ކެންޑިޑޭޓަކު ޕްރޮމޯޓު ކުރަން މަސައްކަތް ކޮށްފައިވާ ކަމުގެ ގިނަ ފާޑުކިޔުންތަކެއް އަމާޒުވެފައިވާއިރު، ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ތަރުޖަމާނު އަނަސް އަބްދުއް ސައްތާރު ވިދާޅުވީ، ސަންގު ޓީވީން ގެނެސްދިން މޭޔަރު ބަހުސްގައި އެމްޑީޕީގެ ކެންޑިޑޭޓާމެދު އަމަލު ކުރި ގޮތާއިމެދު ނުހަނު ހިތާމަ ކުރައްވާ ކަމަށާއި، އެކަމުގެ ކަންބޮޑުވުން ބަހުސްގައި ބައިވެރިވި ކެންޑިޑޭޓުން ވެސް ފާހަގަ ކުރައްވާފައިވާ ކަމަށެވެ.

އާޒިމް ބަހުސްގައި ބައިވެރިވެވަޑައިނުގެންނެވޭ ސަބަބު ތަފްސީލާއެކު ލިޔުމުން ސަންގުޓީވީއަށް އަންގަވާފައިވާ އިރު ވެސް، އޭނާއަށް އެންޓި ކެމްޕޭނު ކޮށްފައިވާ ކަމަށާއި، އެކަމާ ޕާޓީން ހިތާމަ ކުރާކަމަށް އަނަސް ވިދާޅުވިއެވެ.

އަނަސް ވަނީ އެއީ ޒިންމާދާރުކަން ކުޑަ ކަމެއްގެ ގޮތުގައި ސިފަ ކުރައްވާފައެވެ.