ކަންކަން ތަންފީޒު ކުރުމުގެ ގާބިލްކަން މިސަރުކާރުގެ ނެތް
މާލެ ސިޓީ ކައުންސިލަށް އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމް ވާހަކަދައްކަވަނީ
ދޭއްބައި އަހަރުގެ ތެރޭގައި ކުރީގެ ރައީސް އިބްރާހިމް މުހައްމަދު ސާލިހުގެ ބޯހިޔާވަހިކަމުގެ ސިޔާސަތު ތަންފީޒު ކުރާނެ ކަމަށާއި، ބްރިޖުން އަވަށްތަކަށް ދެވޭގޮތް ހަދާނެ ކަމަށް މާލެ ސިޓީ ކައުންސިލަށް އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމް ވިދާޅުވެއްޖެއެވެ.
"ވާނެ، ކުރާނެ" ޝިއާރުގެ ދަށުން އާޒިމް ކުރިއަށްގެންދެވި ކެމްޕޭނު ރަސްމީކޮށް ނިންމުމުގެ ރަސްމިއްޔާތުގައި އާޒިމް ވިދާޅުވީ ކުރީގެ ރައީސް ސާލިހުގެ ސަރުކާރުގައި ބޯހިޔާވަހިކަމަށް ފުރިހަމަ ހައްލެއް ހޯއްދަވައިދެއްވާފައިވާ ކަމަށާއި، ޕްރޮޖެކްޓް ފައްޓަވައިދެއްވާފައިވާ ކަމަށެވެ. މި މައްސަލަ ހައްލު ހޯދައިދީފައިވާ ކަމަށް ބުނުމުގެ އެއްވެސް ހައްގެއް މިސަރުކާރަށް ނުލިބޭނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިސަރުކާރަށް މިމަޝްރޫއު ފެށުމުގެ ގޮތުން ކުރާނެ ކަމެއް ނެތް ކަމަށާއި، ބްރިޖުން ގުޅާލެވޭ ރަށްތަކުން ގޯތިތައް ދޫކޮށްފައިވާ ކަމަށެވެ. މިސަރުކާރަށް ކުރަން އޮތް މަސައްކަތަކީ އެކަން ތަންފީޒު ކުރުން ކަމަށާއި، އެކަން ވެސް ނުކުރެވޭ ކަމަށެވެ. އެއީ މިސަރުކާރުގައި މިކަންކަން ތަންފީޒު ކުރުމުގެ ގާބިލްކަން ނެތުމުން ދިމާވާކަމެއްގެ ގޮތުގައި އާޒިމް ސިފަކުރެއްވިއެވެ.
ފުށިދިއްގަރުފަޅު ހިއްކާ ރަސްމާލެ ނަމުގައި އެސަރަހައްދު ތަރައްގީ ކުރަމުންދާތީ އެކަމަށް އާޒިމް ވަނީ ފާޑު ވިދާޅުވެފައެވެ.
އާޒިމް ވިދާޅުވީ މިސަރުކާރުން މަސައްކަތް ކުރަނީ ދޯންޏަށް ރައްޔިތުން އަރުވައިގެން ކަނޑުގައި ވަރަށް ހާލުން ދެވޭ ހިސާބަށް ރައްޔިތުން ގެންދަން ކަމާށާއި، އެކަން އެގޮތަށް ކުރުމަށް ފުރުސަތު ނުދޭނެ ކަމަށެވެ. ރައްޔިތުން ގެންދާނީ ބްރިޖުން ދެވޭ އަވަށް ތަކަށް ކަމަށް އާޒިމް ވިދާޅުވިއެވެ.
މާލެސިޓީގެ މައްސަލަތަކަށް އިޝާރާތް ކުރައްވައި އާޒިމް ވިދާޅުވީ މޭޔަރު ކަމަށް ކުރިމަތިލެއްވީ މިމައްސަލަތައް ހައްލު ކުރުމަށް ކަމަށެވެ.
އާޒިމް ވިދާޅުވީ އެމްޑީޕީން މިނިކުތީ މާލޭގެ ތޮއްޖެހުން ރަނގަޅުކޮށް، މާލެ ތަރައްގީ ކުރުމަށް ކަމަށެވެ. މާލޭގެ ޚިދުމަތްތައް ރަނގަޅުކޮށް، ޓްރެފިކް، ޓްރާސްޕޯޓު ރަނގަޅު ކުރާނެ ކަމަށާއި، ކުށް މަދުކޮށް، އަދިވެސް ހުރި އެތައް ކަމަކަށް ހައްލު ހޯދައިިދޭނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މާލޭސިޓީގައި ވަރަށް ގިނަ މަސައްކަތްތައް ކުރަން އެބައޮތް ކަމަށާއި، މޭޔަރު ކަމަށް ވާދަކުރައްވަނީ 30 އަހަރުގެ ތަޖުރިބާގެ އަލީގައި ކަމަށެވެ. އަދި މިހާތަނަށް ހަވާލުކުރި ހުރިހާ ޒިންމާއެއް ވަރަށް ފުރިހަމައަށް އަދާކޮށް، ރައްޔިތުންނަށް ނަތީޖާ ދައްކައިދީފައިވާ ކަމަށް އާޒިމް ވިދާޅުވިއެވެ. ޒިންމާތައް އަދާނުކުރެވޭ މީހަކު މޭޔަރު ކަމަށް ވާދަކުރައްވަން ނުވާނެ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިހާރުގެ ރައީސް ޑރ.މުހައްމަދު މުއިއްޒު މޭޔަރުގެ މަގާމުގައި ހުންނެވިއިރު ވެސް މައްސަލަތައް ހައްލު ކުރުމަށް ފުރުސަތު ލިބިވަޑައިގެންނެވި ނަމަވެސް އެއްވެސް މައްސަލައަކަށް ހައްލު ހޯދާދީފައިނުވާ ކަމަށެވެ. ނަމަވެސް މޭޔަރު ކަމަށް ކުރިމަތިލެއްވި ހިސާބުން ހިޔާލުތައް ވަގަށް ނަގައި، ބައެއް މައްސަލަތަކަށް ހައްލު ހޯދައިދޭނެކަން ރައްޔިތުންނަށް އަންގައިދިނުމުގެ ގޮތުން އެއްބަސްވުންތަކުގައި ސޮއިކުރަމުންދާ ކަމަށް އާޒިމް ވިދާޅުވިއެވެ. ނަމަވެސް މިއީ ރައްޔިތުންނަށް ހެޔޮ އެދިގެން ކުރާ ކަމެއް ނޫން ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ އެމްޑީޕީއަކީ ކަންކަން ކުރާނެ ޕާޓީއެއް ކަމަށާއި، އެމްޑީޕީގެ ސަރުކާރުގައި ފޮތް ފަންސޫރަށް، ބޭސްފަރުވާއަށް، ހިލޭ ޑިގްރީއަށް ސަލާންޖެހުން ހުއްޓުވި ކަމަށެވެ. އަދި ރައްޔިތުންނަށް ފަސޭހަވާނެ ހުރިހާ ކަމަމާއި، އެލަވަންސްތައް ހައްގުވާ ފަރާތްތަކަށް އެކަންކަން މަގުފަހިކޮށްދީ އެލަވަންސްތައް ދޫކުރަން ފެށީ އެމްޑީޕީގެ ސަރުކާރުގައިކަން އާޒިމް ފާހަގަކުރެއްވިއެވެ. ކުރީ ސަރުކާރުގައި ކޮންމެ 11 ދުވަހަކުން ރާއްޖޭގެ ރަށްރަށުގައި ތަރައްގީގެ ޕްރޮޖެކްޓްތައް ނިންމާފައިވާ ކަމަށާއި، މިއަދު އެކަންކަން ހުއްޓިފައިވާ ކަމަށް އާޒިމް ވިދާޅުވިއެވެ.
އާޒިމް ވަނީ މިއަދު މިހާލަތު ބަދަލުކޮށް ދޮގުހަދާ އޮޅުވާލާ ސަރުކާރަށް އިތުރު ފުރުސަތެއް ނުދިނުމަށް ހޮނިހިރު ދުވަހު ބާއްވާ މާލެސިޓީ ކައުންސިލްގެ ބައި-އިލެކްޝަންގައި ރައްޔިތުން ނުކުމެ ވޯޓު ދިނުމަށް އެދިވަޑައިގެންފައެވެ.
