މަސްވެރިކަމުގެ ސިނާއަތުގެ އެންމެ މުހިއްމު ބައިވެރިންނަކީ އޮޑިވެރިންނާއި މަސްވެރިން
މަސްވެރިންގެ ފޯރަމް ފެށުމުގެ ރަސްމިއްޔާތު
ރާއްޖޭގެ 15 އަތޮޅުން މަސްވެރިންނާއި އޮޑިވެރިން ތަމްސީލުވާ ގޮތަށް މިނިސްޓްރީ އޮފް ފިޝަރީޒް އެގްރިކަލްޗަރ އެންޑް މެރިން ރިސޯސަސްއިން ކުރިއަށްގެންދާ މަސްވެރިންގެ ފޯރަމް ފަށައިފިއެވެ.
ދެ ދުވަހުގެ މުއްދަތަށް ކުރިއަށްގެންދާ މި ފޯރަމް ރަސްމީ ގޮތުން ފެށުމަށް އާދިއްތަ ދުވަހު ބޭއްވި ރަސްމިއްޔާތުގައި ވާހަކަދައްކަވަމުން ފިޝަރީޒް މިނިސްޓަރ ޒަހާ ވަޙީދު ވިދާޅުވީ، މަސްވެރިކަމުގެ ސިނާޢަތުގެ އެންމެ މުހިއްމު ބައިވެރިންނަކީ އޮޑިވެރިންނާއި މަސްވެރިންގެ އިތުރުން މި ސިނާޢަތުގައި ޙަރާކާތްތެރިވާ އެކި ފަރާތްތައް ކަމަށާއި، މި ފޯރަމުގައި ރާއްޖޭގެ 15 އަތޮޅުން މަސްވެރިންނާއި އޮޑިވެރިން ތަމްސީލު ވެގެންދިއުމުން އުފާ ކުރައްވާ ކަމަށެވެ.
އެގޮތުން މިފަދަ ފޯރަމެއް ބޭއްވުމުގެ މުހިއްމުކަމަށް އަލިއަޅުވާލައްވާ މިނިސްޓަރ ވިދާޅުވީ، މަސްވެރިކަމުގެ ސިނާޢަތަށް ޢަމާޒުކޮށް މިފަދަ ފޯރަމެއް ބޭއްވުމުގެ މަޤްޞަދަކީ މަސްވެރިކަމުގެ ސިޔާސަތުތައް ބައްޓަންކުރުމާއި މަސްވެރިކަމުގެ ސިނާޢަތުގައި ދިމާވެފައިވާ ބައެއް ގޮންޖެހުންތަކާއި ގުޅޭގޮތުން ފުޅާ ދާއިރާއެއްގައި މަޝްވަރާކުރުން ކަމަށެވެ.
މިނިސްޓަރ އިތުރަށް ވިދާޅުވީ، މި ފޯރަމުގައި އެންމެ އަހައްމިއްޔަތުކަމެއް ދީގެން މަޝްވަރާ ކުރާނީ އިންޑިއާ ކަނޑުގައި މަސްވެރިކަމުގައި މަސް ބާނާނެ މިންވަރު ކަނޑައެޅުމާއި ގުޅޭ (ކެޗް އެލޮކޭޝަން) އާއި ބެހޭ ގޮތުންކަމަށެވެ. އަދި އިންޑިއާ ކަނޑުގެ ރީނދޫ އުރަހަ ކަންނެލީގެ ސްޓޮކް ރަތް ދަރަޖައިގައި ގިންތި ކުރެވިފައިވާ ދުވަސް ވަރެއްގައި މިކަންކަމާ ބެހޭގޮތުން ވެސް މަޝްވަރާ ކުރުން ކޮންމެހެން މުހިއްމު ކަމަށް ވިދާޅުވިއެވެ.
މިއަހަރުގެ މަސްވެރިންގެ ދުވަހަށް ތައްޔާރު ވުމަށް ގިނަ ޙަރަކާތްތަކެއް ރާވަމުންދާއިރު، މި ފޯރަމަކީވެސް 39 ވަނަ މަސްވެރިންގެ ދުވަހާއި ގުޅިގެން ފިޝަރީޒް މިނިސްޓްރީން އިންތިޒާމުކޮށްގެން ކުރިއަށްގެންދާ ފޯރަމެކެވެ.
މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ މިމަހުގެ ދިހަ ވަނަ ދުވަހުގެރޭ ހުޅުމާލެ ސެންޓަރލް ޕާކު ޞަރަހައްދުގައެވެ.
