މި ދައުރަށް ކަނޑައެޅި މަސައްކަތުގެ ތެރެއިން ނުނިމެނީ މިނިމަމް ވޭޖްގެ ބިލު އެކަނި

މި ދައުރުގައި ރައްޔިތުންގެ މަޖިލީހުން ގިނަ ބިލުތަކެއްގެ މަސައްކަތް ކޮށްފައިވެއެވެ. އެގޮތުން މި ދައުރަށް ކަނޑައަޅާފައިވާ މަސައްކަތްތަކުގެ ތެރެއިން ނުނިންމިފައިވަނީ އެންމެ ކުޑަ މިނުން ދެވޭ އުޖޫރަ (މިނިމަމް ވޭޖު)ގެ ބިލުގެ މަސައްކަތް އެކަންޏެވެ. މިނިމަމް ވޭޖުގެ ބިލު ޑްރާފްޓު ކުރުމުގެ މަސައްކަތް ކުރުމަށް އެކުލަވާލާފައިވާ ކޮމެޓީން ދަނީ އެ މަސައްކަތް ކުރަމުންނެވެ.

މި ދައުރުގައި މަޖިލީހުން ޖުމްލަ 11 ބިލެއް ފާސްކޮށްފައިވެއެވެ.

ޖުމްލަ 11 ބިލެއް މި ދައުރުގައި ފާސްކޮށްފައިވާއިރު ކޮމެޓީ މަރުޙަލާގައި 8 ބިލެއް ވާކަން ފާހަގަކޮށްލެވެއެވެ.

މީގެ އިތުރުން މި ދައުރުގައި ފުރަތަމަ ކިއުން އިއްވުމަށްފަހު އިތުރު މަސައްކަތްތަކެއް ކުރެވިފައި ނުވާ 4 ބިލެއް ވާކަން ފާހަގަކޮށްލެެވެއެވެ.

މިދައުރަށް 23 ބިލު ހުށަހަޅާފައިވާއިރު މިދިޔަ ދައުރުގައި ހުށަހަޅާފައިވާ ބިލުތަކުގެ ތެރެއިން 16 ބިލެއްގެ މަސައްކަތް މިދައުރުގައި ކޮށްފައިވެއެވެ.

އަދި މިދައުރުގެ އެންމެ ފަހު ޖަލްސާގައި ވެސް 10 ބިލެއްގެ ފުރަތަމަ ކިއުން އިއްވާފައިވެއެވެ.

19 ވަނަ ރައްޔިތުންގެ މަޖިލީހުގެ ދެ ދައުރު ނިންމާ މެންބަރުން ޗުއްޓީއަށް ވަޑައިގެންފައިވާއިރު ޗުއްޓީއަށް އެވަޑައިގަތީ ޖަލްސާތަކާއި ކޮމިޓީތަކުގައި މުޅި ޖުމުލަ 569 ގަޑިއިރާއި 57 މިނެޓް މަސައްކަތް ކުރެއްވުމަށްފަހުއެވެ. އެގޮތުން 77 ޖަލްސާ ވަނީ ބާއްވާފައިވާއިރު ފުރަތަމަ ދައުރުގައި ބޭއްވި 47 ޖަލްސާ ބާއްވާފައިވެއެވެ. އަދި ދެވަނަ ދައުރުގައި 30 ޖަލްސާ ބާއްވާފައިވެއެވެ.