ނޭޕާލުގައި މިހާރު ކުރިޔަށްދާ 13 ވަނަ ސައުތް އޭޝިއަން ގޭމްސްގެ އަންހެން ބާސްކެޓް ބޯޅަ އިވެންޓުގައި އިންޑިއާ އަތުން ރާއްޖޭގެ ގައުމީ އަންހެން ބާސްކެޓް ބޯޅަ ޓީމު ތަފާތު ބޮޑު ނަތީޖާ އަކުން ބަލިވެ ސެމީގެ ފުރުސަތު ހަނި ވެއްޖެއެވެ.

އިންޑިއާ އަތުން ރާއްޖެ ބަލިވީ 156 ޕޮއިންޓް 33 ޕޮއިންޓުންނެވެ.

މި މެޗުގެ ފުރަތަމަ ކުއާޓާގައި އިންޑިއާއިން ރާއްޖެ ކޮޅަށް 31 ޕޮއިންޓް ސްކޯ ކުރިއިރު ރާއްޖެއަށް ސްކޯ ކުރެވުނީ 8 ޕޮއިންޓެވެ. މި ހާފުގައި އިންޑިއާއިން އެޓީމުގެ ތަޖުރިބާކާރު ކުޅުންތެރިންގެ ބޭނުން ވަނީ ވަރަށް ރަނގަޅަށް ހިފައިފައެވެ.

މެޗުގެ ދެވަނ ކުއާޓާގައި އިންޑިއާއިން 64 ޕޮއިންޓް ސްކޯ ކުރިއިރު، މި ކުއާޓާގައި ރާއްޖެ އަށް ސްކޯ ކުރެވިފައިވަނީ އެންމެ 19 ޕޮއިންޓެވެ. މި ކުއާޓާގައި ވެސް އިންޑިއާއިން އެޓީމުގައި ތިބި ދިގު ކުޅުންތެރިންގެ ބޭނުން ހިފައި ރާއްޖެ ކޮޅަށް ވަނީ ގިނަ ޕޮއިންޓް ތަކެއް ސްކޯ ކޮށްފައެވެ.

މެޗުގެ ތިންވަނަ ކުއާޓާގައި އިންޑިއާއިން 102 ޕޮއިންޓް ވަނީ ހަމަ ކޮށްފައެވެ. މި ކުއާޓާގައި ރާއްޖޭގެ ކުޅުންތެރިންގެ ފަރާތުން ދަށް ކުޅުމެއް ފެނިގެންދިޔައިރު މި ކުއާޓާގައި ރާއްޖެއަށް ސްކޯކުރެވިފައިވަނީ 26 ޕޮއިންޓެވެ.

މެޗުގެ ހަތަރުވަނަ ކުއާޓާއަށް ދެ ޓީމުން ވެސް ނިކުތީ ބޮޑެތި ބަދަލުތަކަކާއި އެކުގައެވެ. އެގޮތުން ރާއްޖެއިން މި ކުއާޓާގައި ޒުވާން ކުޅުންތެރިންނަށް ވަނީ ފުރުސަތު ދީފައެވެ. މި ކުއާޓާގައި އިންޑިއާއިން ވަނީ 156 ޕޮއިންޓް ހަމަކޮށްފައެވެ. މި ކުއާޓާގައި ރާއްޖެއަށް ހަމަ ކުރެވުނީ 33 ޕޮއިންޓެވެ.

ހުކުރު ދުވަހު ހެނދުނު ބާސްކެޓް ބޯޅަ ފިރިހެން ޓީމު ބަންގާޅު އާއި ދެކޮޅަށް މެޗު ކުޅެފައިވާއިރު މި މެޗުން ރާއްޖެ ބަލިވީ 78 ޕޮއިންޓް 67 ޕޮއިންޓުންނެވެ.

މި މުބާރާތުގައި ގައުމީ އަންހެން ބާސްކެޓް ބޯޅަ ޓީމުގެ ދެވަނަ މެޗުގައި ލަންކާއާއި ދެކޮޅަށް ނިކުންނާނީ އާދީއްތަ ދުވަހުގައެވެ.