ކައުންސިލްތަކުގެ މައްޗަށް ބާރު ފޯރުވުމުގެ ވިސްނުމެއް މަޖިލީހުގެ ނެތް، ބޭނުމަކީ ކައުންސިލްތައް ބާރުވެރިކުރުވުން: ވައްޑެ
ލާމަރުކަޒީ ގާނޫނަށް ވަނީ ބޮޑެތި އިސްލާހުތަކެއް ގެނެސްފައި
އުނގޫފާރު ދާއިރާގެ މެންބަރު މުހައްމަދު ވަހީދު
ލާމަރުކަޒީ ގާނޫނަށް ގެނެވޭ އެންމެ ބޮޑު އިސްލާހަކީ ކައުންސިލަތަކަށް މަސައްކަތް ކުރެވޭނެ އެކަށޭނެ މުއްދަތެއް ދިނުމަށް ގާނޫނަށް ބަދަލު ގެނައުންކަމަށް އުނގޫފާރު ދާއިރާގެ މެންބަރު މުހައްމަދު ވަހީދު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ލާމަރުކަޒީ ބިލު ދިރާސާ ކުރި ލާމަރުކަޒީ ކޮމިޓީގެ ނައިބު މުގައްރިރުކަން ވެސް ކުރައްވާ މުހައްމަދު ވަހީދު ވިދާޅުވީ ގާނޫނަށް ގެނެވެނު އިސްލާހުތަކުގެ ތެރެއިން ފެނުނު އެންމެ ބޮޑު އިސްލާހަކީ ކައުންސިލަރުންނަށް އެކަށޭނެ މަސައްކަތްތައް ކުރަން މުއްދަތު ދިނުން ކަމަށެވެ. އަދި ކައުންސިލަރުންނަށް އެކަށީގެންވާ ޖާގަދޭން އެބަޖެހޭ ކަމަށާއި އެއާއެކީގައި އެބޭފުޅުން ކޮޅަށް ތެދުވެ އިރުއިރުކޮޅާ މާލޭގެ މިނިސްޓްރީތަކަށް އައިސް ސަލާންޖަހަން ނުޖެހި ރަށުން ގެވަޅު ދެވޭނެ ގޮތް ނުވަތަ ވިޔަފާރިއަށް ބިންދެވޭނެ ގޮތް އެފަދަ ކަންކަން ކުރެވޭނެ މިނިވަންކަން އޮންނަން ޖެހޭނެ ކަމަށެވެ.
ވަހީދު ވިދާޅުވީ ޖަޒީރާ ރާއްޖޭގައި ހުރި ކަންކަން ހާސިލްވުމަށްޓަކައި ވަރަށް ބޮޑަށް ކޮށާލެވޭ މަގަކަށް މި ބިލު ވެގެންދާނެ ކަމަށެވެ. އަދި މި ބިލާއެކީގައި ގެނެވޭ ބަދަލުތަކުގެ ތެރޭގައި މާލީ މިނިވަންކަން ފޯރުކޮށްދިނުމާއި، އިގްތިސޯދީ ގޮތުން ހަރަކާތްތެރިވާނެ ޖާގަ ފޯރުކޮށްދިނުމާއި، އެންމެން ބައިވެރިވެވޭނެ ފުރުސަތު ފަހިކޮށްދިނުން އަދި އާބާދީގެ ދެބައިކުޅަ އެއްބަޔަށް ތަމްސީލުވެވޭނެ ޖާގަ ހޯދައި ދެވޭނެ ކަމަށެވެ.
މީގެ އިތުރުން އަތޮޅު ކައުންސިލުން ހުރިހާ ރަށަކަށް ބައިވެރިވެވޭނެ ޖާގަ ހަދައިދިނުމާއި އަދި މި ބަދަލުތައް ވެގެންދާނެ ހަގީގަތުގައި ވެސް ވަރަށް ބޮޑު އިންގިލާބީ ބަދަލުތަކެއް ގެނުވާނެ ބަދަލުތަކަށް ކަމަށް ވަހީދު ވިދާޅުވިއެވެ.
ވަހީދު ވިދާޅުވީ ކަން މިހެން އޮތްނަމަވެސް މަޖިލީހާ ހިސާބުން ފިޔަވަޅު އެޅުނީމަ ނުވަތަ ރަށެއްގެ ކައުންސިލަކަށް މަޖިލީހުން ފިޔަވަޅު އެޅުމުގެ ބާރު އޮންނަން ޖެހޭނެ ކަމަށެވެ. އަދި އެހެން އެއްވެސް އިދާރާއަކަށް އެ ފުރުސަތު އޮވެގެން ނުވާނެ ކަމަށާއި، އެމީހުންނަށް ހައްގު މަގާމާއި ހައިބަތު ހޯދައި ދިނުމަށް މަޖިލީހުން މަސައްކަތް ކުރާނެ ކަމަށެވެ. މި ބިލު ފާސްވެ ގާނޫނަކަށްވެ މި ހުރިހާ އިހްތިޔާރެއް ކައުންސިލްތަކަށް ލިބުމުން ތަރައްގީގެ ފޮނި މީރުކަން ރައްޔިތުންނަށް ލިބިގެންދާ ބިލަކަށް މި ބިލު ވެގެންދާނެ ކަމަށް ވަހީދު ވިދާޅުވިއެވެ.
