ދިރިއުޅުމުގެ ހަރަދުތައް މުސާރައިގެ ދެގުނައަށް އަރާތީ މިނިމަމް ވޭޖް ބޮޑު ކުރަން ޖެހޭ: ސީއެސްސީ
ސިވިލްސާރވިސްގައި އެންމެ ކުޑަ މުސާރައަކަށް އުޅެނީ 5083 ރުފިޔާ ކަމަށް ވިދާޅުވި
ސިވިލް ސަރވިސް ކޮމިޝަން (ސީއެސްސީ)ގެ ރައީސް ޑރ. އަލީ ޝަމީމް
ދިރިއުޅުމުގެ ޚަރަދުތައް މުސާރައިގެ ދެގުނައަށް އަރާތީ މިނިމަމް ވޭޖް ބޮޑު ކުރަން ޖެހޭ ކަމަށް ސިވިލް ސަރވިސް ކޮމިޝަން (ސީއެސްސީ)ގެ ރައީސް ޑރ. އަލީ ޝަމީމް ވިދާޅުވެއްޖެއެވެ.
ޝަމީމް މިހެން ވިދާޅުވީ އަންގާރަ ދުވަހުގެރޭ ބޭއްވި މިނިމަމް ވޭޖް ކަނޑައެޅުމުގެ ބިލު ޑްރާފްޓު ކުރުމަށް އެކުލަވާލި ސަބްކޮމެޓީގެ ބައްދަލުވުމުގައެވެ.
ޝަމީމް ވިދާޅުވީ މިނިމަމް ވޭޖެއް ކަނޑައެޅުމަށް ބަލާއިރު ސިވިލްސަރވިސްގައި އެންމެ ކުޑަ މުސާރައަކަށް އުޅެނީ 5083 ރުފިޔާ ކަމަށެވެ. އަދި ވެރިންގެ ގޮތުގައި ތިބޭ ފަރާތްތަކަށް ވެސް 10000 ރުފިޔާ ވެސް ނުޖެހޭ ކަމަށް ވިދާޅުވެ ޝަމީމް ވިދާޅުވީ ދިރިއުޅުމުގެ ޚަރަދުރައް އެއަށް ދެގުނައަށް އަރާ ކަމަށެވެ. އެހެން ކަމުން އެންމެ ކުޑަ މިނުން ދެވޭ އުޖޫރަ ބޮޑުވާން ޖެހޭ ކަމަށް އޭނާ ވިދާޅުވިއެވެ.
ޝަމީމް ވިދާޅުވީ ދުނިޔޭގެ ބެސްޓް ޕްރެކްޓިސް އަށް ބަލާލާއިރު އެންމެ ކުޑަމިނުން ދެވޭ އުޖޫރައެއް ކަނޑައެޅުމުގައި ފޯމިއުލާތަކެއް ގެންގުޅޭ ކަމަށް ވިދާޅުވިއެވެ.
އޭނާ ވިދާޅުވީ ރާއްޖޭގެ ޙާލަތަކީ ވަރަށް ނާޒުކު އެއްޗެއް ކަމަށާއި އެހެން ކަމުން ސަޕްލައި އެންޑް ޑިމާންޑަކަށް ނުބެލެވޭނެ ކަމަށެވެ. ނަމަވެސް ބާރގެއިނިންގް އެއީ ގެންގުޅެވިދާނެ އުޞޫލެއްކަން ފާހަގަކުރެއްވިއެވެ.
މިނިމަމްވޭޖު ކަނޑައެޅުމުގެ ބިލެއް ޑްރާފްޓު ކުރުމުގެ މަސައްކަތް ރައްޔިތުންގެ މަޖިލީހުން ކުރަމުންދާއިރު މިނިމަމް ވޭޖް ކަނޑައެޅުމަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ރިޔާސީ ވަޢުދެއްގެ އިތުރުން ސަރުކާރު ހިންގާ މައި ޕާޓީ މޯލްޑިވްސް ޑިމޮކްރަޓިކް ޕާޓީ (އެމްޑީޕީ)ގެ އެޖެންޑާ 19 ގެ ވައުދު ތަކުގެ ތެރެއިން ވައުދެކެވެ.
