ތިމަރަފުށީގެ ސިއްހީ ޚިދުމަތަށް ގެންނަންޖެހޭ ބަދަލުތައް އަންނާނީ ބަޖެޓްގެ ތެރެއިން ލިބޭ މިންވަރަކުން: މިނިސްޓަރ
2 ޑިސެމްބަރު 2019 | ހޯމަ 05:54ހޮސްޕިޓަލް އެޅުމަށް ކުރެހުމާއި ލިޔެކިޔުމުގެ ގޮތުން ކުރަންޖެހޭ މަސައްކަތް ނިމިފައިވާ ކަމަށް މިނިސްޓަރ ވިދާޅުވި
ހެލްތު މިނިސްޓަރ އަބްދުﷲ އަމީން
ތ. ތިމަރަފުށީގެ ސިއްހީ ޚިދުމަތަށް ގެންނަންޖެހޭ ބަދަލުތައް ކުރިޔަށް އޮތް އަހަރުގެ ބަޖެޓް ފާސްވެގެންދިޔުމުން ބަޖެޓްގެ ތެރެއިން ފަހިވާ މިންވަރެއްގެ މައްޗަށް ބަލާ އެ މަސައްކަތް ކުރިޔަށްދާނެކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެ އެވެ.
ހޯމަ ދުވަހުގެ ޖަލްސާގައި ތިމަރަފުށީ ދާއިރާގެ މެމްބަރ އަބްދުﷲ ރިޔާޒު ތިމަރަފުށީ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް މިއަހަރުގެ ބަޖެޓްގައި ހިމަނާ މިހާތަނަށް އަމަލީ ގޮތުން އެއްވެސް މަސައްކަތެއް ފަށާފައިނުވާތީ ހޮސްޕިޓަލްގެ އަމަލީ މަސައްކަތް ފެށޭނެ ތާރީޚާއި ގުޅޭގޮތުން އެއްސެވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ހޮސްޕިޓަލް އެޅުމަށް ކުރެހުމާއި ލިޔެކިޔުމުގެ ގޮތުން ކުރަންޖެހޭ މަސައްކަތް ވަނީ ނިމިފައިކަމަށެވެ. މިއަހަރުގެ ބަޖެޓްގައި މިމަސައްކަތަށް ހިމަނާފައިވަނީ 1 މިލިއަން ރުފިޔާ ކަމަށާއި މިއީ އެމަސައްކަތް ކުރުމަށް އެކަށޭނެ ފައިސާ އެއް ނޫންކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ތިމަރަފުއްޓަކީ އެއަރޕޯޓް ހުރި ރަށަކަށްވާތީ އެރަށުގެ ސިއްހީ ނިޒާމަށް ބަދަލު ގެންނައިރު އެކަމަށް އިސްކަންދެއްވާނެ ކަމަށެވެ.
ތިމަރަފުށީ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށް މިއަހަރުގެ ބަޖެޓްގައި ހިމަނާފައިވާއިރު މިއަހަރުގެ މާރޗް މަހުގެ ތެރޭގައި ހޮސްޕިޓަލް އަޅާނެކަމަށް ސަރުކާރުން ވަނީ އިއުލާންކޮށްފަ އެވެ. އަދި ހޮސްޕިޓަލްގެ ކުރެހުން ކައުންސިލަށް ހުށަހަޅައި އެޕްރޫވް ކޮށްފައިވާއިރު، ހޮސްޕިޓަލް އިމާރާތްކުރުމަށް ވަނީ ބިންވެސް ވަކިކޮށްފަ އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓަށް ބަހުސްކުރައްވަމުން އަބްދުﷲ ރިޔާޒު ވަނީ އަންނަ އަހަރުގެ ބަޖެޓްގައި ހޮސްޕިޓަލް ތަރައްގީކުރުން ހިމަނާފައި ނެތުމަކީ ރައްޔިތުންގެ އެންމެބޮޑު ކަންބޮޑުވުން ކަމަށް ވިދާޅުވެފަ އެވެ.
