ރާއްޖޭގައި ފަތުރުވެރިކަން ތަރައްގީކޮށް، ކުރިއެރުވުމަށްޓަކައި އެ އަތޮޅުތަކުގައި ހުރި ގޮންޖެހުންތަކާއި އިތުރަށް ރަނގަޅު ކުރަން ހުރި ކަންކަން ދެނެގަތުމުގެ ބޭނުމުގައި ޓުއަރިޒަމް މިނިސްޓަރ އަލީ ވަހީދު ޅ. އަތޮޅަށް ކުރެއްވި ދަތުރުފުޅު ނިންމަވާލައްވައިފިއެވެ.
މިނިސްޓަރ ކުރައްވާ ރަސްމީ ދަތުރުތަކުގެ ސިލްސިލާގެ ދަށުން ވަނީ ނ އަތޮޅަށާއި ރ އަތޮޅަށް ވަޑައިގެންފައެވެ. މި ދަތުރުފުޅުގައި މ،ރ،ޅ އަތޮޅުގެ ހުރިހާ ކައުންސިލްތަކާއި ރިސޯޓުތައް އަދި ގެސްޓްހައުސްތަކާއެކު ފަތުރުވެރިކަމުގެ މަސްލަހަތުވެރިންނާއި މުޖުތަމައުތައް ގުޅުވައިދިނުމުގެ މަހާސިންތާގެ ނަމުގައި އެއް ދުވަހުގެ ބައްދަލުވުމެއް ބާއްވާ ފުޅާ ދާއިރާއެއްގައި ޚިޔާލު ބަދަލުކޮށްފައިވެއެވެ.
ޓުއަރިޒަމް މިނިސްޓްރީއިން މައުލޫމާތު ދިން ގޮތުގައި މިނިސްޓަރ ކުރައްވާ މި ދަތުރުތަކުގެ މަގުސަދުތަކަކީ ރައްޔިތުންނަށް ވަޒީފާގެ ފުރުސަތުތައް އިތުރު ކުރެވޭނެ ގޮތްތައް ހޯދައިދިނުމާއި ފަތުރުވެރިކަމުގެ ސިނާއަތުގެ ތެރެއިން އަތޮޅުގެ އާއްމު ރައްޔިތުންނަށް ހުރި އެހެނިހެން ފުރުސަތުތައް އިތުރުކުރުމެވެ. މީގެ އިތުރުން ފަތުރުވެރިކަމުގެ ދާއިރާއިން "ކޯޕަރޭޓް ސޯޝަލް ރެސްޕޮންސިބިލިޓީ" ގެ ދަށުން އަތޮޅަށް ލިބެން ޖެހޭ ފައިދާތައް އިތުރުކުރުންވެސް ހިމެނެއެވެ.
