ކުރީގެ ރައީސް ޔާމީން މިނިވަންކުރަން ގައުމީ ހަރަކާތެއް ބާއްވަނީ
30 ނޮވެމްބަރު 2019 | ހޮނިހިރު 12:58ރާއްޖޭގެ ހުރިހާ ދާއިރާއެއް ތަމްސީލް ކުރާނެ
ޕީޕީއެމް އަދި ޕީއެންސީން ބޭއްވި ނޫސްވެރިންގެ ބައްދަލުވުމުގެ ތެރެއިން
ކުރީގެ ރައީސް އަބްދުﷲ ޔާމީން މިނިވަންކުރުމަށް ކުރާ މަސައްކަތުގެ ތެރެއިން ގައުމީ ހަރަކާތްތަކެއް ނުވަތަ ބޮޑު މުޒާހަރާއެއް ބާއްވަން ނިންމާފައިވާ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ހޮނިހިރު ދުވަހު ޕީޕީއެމް/ޕީއެންސީން ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ހުކުރު ދުވަހުގެ ރޭ ޕީޕީއެމް/ޕީއެންސީ ޖޮއިންޓް ކައުންސިލްގެ ބައްދަލުވުމެއް ބޭއްވި ކަމަށާއި، ވަރަށް މުހިންމު ގަރާރެއް ފާސްކޮށްފައިވާ ކަމަށެވެ.
އެގޮތުން ބުދަ ދުވަހުގެ ރޭ ގައުމީ ހަރަކާތެއް ނުވަތަ ބޮޑު މުޒާރަހާއެއް ބާއްވަން ނިންމާފައިވާ ކަމަށާއި، މިގައުމީ ހަރަކާތް ބާއްވަނީ ރާއްޖޭގެ ހުރިހާ ދާއިރާއެއް ތަމްސީލްވާ ގޮތަށް ކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ކޮންމެ ރެއަކު ސަރުކާރާ ދެކޮޅަށް އަޑުއުފުލުމުގެ ގޮތުން ސިލްސިލާ މުޒާހަރާ ކުރިއަށްދާނެ ކަމަށެވެ. އަދި އަންނަ ހުކުރު ދުވަހުގެ ރޭ ކާނިވާ ސަރަހައްދުގައި ބޮޑު މުޒާހަރާއެއް ބޭއްވުމަށް ތައްޔާރުވަމުން އަންނަ ކަމަށެވެ.
